العىس ايتۋ كۇنى جانە پارتيا كۇنى قارساڭىندا «AMANAT» پارتياسىندا ۇزدىك باستاۋىش پارتيا ۇيىمى مەن ۇزدىك قوعامدىق قابىلداۋ بولمەسى بايقاۋى قورىتىندىلاندى. ءىس-شاراعا بەينەكونفەرەنتسبايلانىس ارقىلى ەلىمىزدىڭ بارلىق ايماعىنداعى 3700 باستاۋىش پارتيا ۇيىمى مەن 225 قوعامدىق قابىلداۋ بولمەسىنىڭ وكىلدەرى قاتىستى.

سۋرەتتى تۇسىرگەن: ءالي عالىم.

ءماجىلىس سپيكەرى، «AMANAT» پارتياسىنىڭ توراعاسى ەرلان قوشانوۆ باستاۋىش پارتيا ۇيىمدارى پارتيانىڭ نەگىزگى تىرەگى ەكەنىن اتاپ ءوتتى. ولار پارتيانىڭ قوعامداعى بەدەلىن قالىپتاستىرادى. حالىق سۇرانىسىنا العاشقىلاردىڭ ءبىرى بولىپ ءۇن قاتىپ، الەۋمەتتىك ماسەلەلەردى شەشۋگە كومەكتەسەدى، پارتيالىق جوبالارعا بەلسەندى قاتىسىپ، مەملەكەتتىك باستامالاردى ءتۇسىندىرۋ جۇمىسىن جۇرگىزەدى. ال پارتيانىڭ قوعامدىق قابىلداۋ بولمەلەرىنە كەلىپ تۇسەتىن وتىنىشتەر سانى جىل ساناپ ارتىپ كەلەدى. بۇل ازاماتتاردىڭ «AMANAT» پارتياسىنا دەگەن جوعارى سەنىمىنىڭ جارقىن كورىنىسى.

«ءبىزدىڭ پارتيا مەملەكەت باسشىسىنىڭ ستراتەگيالىق باعىتىن بەلسەندى جۇزەگە اسىرىپ، ناقتى ىستەر ارقىلى پرەزيدەنتتىڭ ناعىز قوعامدىق تىرەگى ەكەنىن كۇن سايىن دالەلدەپ كەلەدى. ەلىمىزدە جۇرگىزىلىپ جاتقان رەفورمالار پارتيالىق جۇيەنىڭ دامۋىنا سەرپىن بەرىپ، ساياسي باسەكەلەستىكتى كۇشەيتە ءتۇستى. جاڭا جاعدايدا «AMANAT» پارتياسى بارلىق بيلىك دەڭگەيىندە ءوز كوشباسشىلىعىن ءساتتى ساقتاپ كەلەدى. بۇعان باستاۋىش پارتيا ۇيىمدارى وراسان ۇلەس قوسىپ وتىر. ءبىزدىڭ بەلسەندىلەرىمىز ەلىمىزدىڭ بارلىق اۋماعىندا ورتاق ماقسات پەن يگى ءىس جولىندا كۇندىز-ءتۇنى جۇمىس ىستەپ كەلەدى. ولار – پارتيانىڭ نەگىزگى قوزعاۋشى كۇشى ءارى الداعى جەڭىستەرىنىڭ كەپىلى»، – دەدى ول.

سۋرەتتى تۇسىرگەن: ءالي عالىم.

سونداي-اق ەرلان قوشانوۆ قازاقستاندىقتاردىڭ ناقتى ماسەلەلەرىن شەشۋگە باعىتتالعان پارتيالىق جوبالاردىڭ جوعارى سۇرانىسقا يە ەكەنىن اتاپ ءوتتى. پرەزيدەنت «اۋىل اماناتى» جانە «قارىزسىز قوعام» جوبالارىن جوعارى باعالادى. قوعام تاراپىنان ۇلكەن قولداۋ تاپتى. بۇل جوبالار اۋىلداعى كاسىپكەرلىكتى دامىتۋعا جانە ازاماتتاردىڭ قارجىلىق ساۋاتىن ارتتىرۋعا كومەكتەسەدى. «جەر اماناتى» جوباسى پايدالانىلماي جاتقان 12 ملن گەكتار جەردى مەملەكەت مەنشىگىنە قايتارۋعا مۇمكىندىك بەردى. ال پارتيانىڭ جاڭا «تسيفرلىق قوعام» جوباسى ازاماتتاردىڭ تسيفرلىق ساۋاتىن ارتتىرۋعا جانە ولاردى ينتەرنەت-الاياقتاردان قورعاۋعا باعىتتالعان.

سونىمەن قاتار، پارتيانىڭ «حالىقپەن بىرگە!» سايلاۋالدى باعدارلاماسى جۇيەلى جۇزەگە اسىرىلىپ، حالىقتىڭ تۇرمىسىن جاقسارتۋدا. بۇل – «AMANAT» پارتياسى مەن ۇكىمەت اتقارىپ جاتقان جۇمىستىڭ نەگىزگى باسىمدىقتارىنىڭ ءبىرى. سايلاۋالدى ۋادەلەردى ورىنداۋ اياسىندا 400 مىڭنان استام جاس ازامات جۇمىسقا ورنالاستىرىلدى، جوعارى وقۋ ورىندارىنداعى ستۋدەنتتەردىڭ شاكىرتاقىسى 80%-عا ۇلعايتىلدى، 270 مەديتسينالىق مەكەمە،

375 مىڭ وقۋشىعا ارنالعان 254 مەكتەپ سالىندى. اۋىلعا جۇمىس ىستەۋگە بارعان مەديتسينا قىزمەتكەرلەرىنە 10 ملن تەڭگەگە دەيىن كوتەرمە اقى تولەنىپ، زياندى ەڭبەك جاعدايىندا جۇمىس ىستەيتىن ماماندارعا ارنايى تولەمدەر قاراستىرىلدى.

سۋرەتتى تۇسىرگەن: ءالي عالىم.

سونداي-اق، پارتيا توراعاسى مەملەكەت باسشىسىنىڭ «تازا قازاقستان» باستاماسىن ىسكە اسىرۋ، ەڭبەك ادامدارىنا قولداۋ كورسەتۋ جانە جۇمىسشى ماماندىقتارى جىلى شەڭبەرىندە جۇمىسشى كادرلاردى دايارلاۋ، سونداي-اق الداعى ۇلى جەڭىستىڭ 80 جىلدىعىن مەرەكەلەۋ بويىنشا بپۇ-نىڭ بەلسەندى جۇمىس ىستەۋىنىڭ ماڭىزىنا توقتالدى.

ەرلان قوشانوۆ پارتيا ارقاشان حالىقتىڭ جانىنان تابىلۋى كەرەك ەكەنىن اتاپ ءوتتى. ول قوعامدىق قابىلداۋ بولمەلەرىنىڭ جۇمىسىن كۇشەيتۋگە شاقىرىپ، ءىرى كاسىپورىندار مەن ءوندىرىس ورىندارىندا كوشپەلى فورماتتا ازاماتتاردى قابىلداۋدى ۇسىندى. مۇنداي ءتاسىل تۇرعىنداردى تولعاندىرعان ماسەلەلەردى جەدەل، تىكەلەي سول جەردە شەشۋگە جانە حالىقپەن بارىنشا ءتيىمدى ءوزارا قارىم-قاتىناس ورناتۋعا مۇمكىندىك بەرەدى.

كەزدەسۋدە بپۇ-نىڭ وڭ تاجىريبەلەرى اتاپ ءوتىلدى. باتىس قازاقستان وبلىسىنداعى «اقسايگازسەرۆيس» باستاۋىش پارتيا ۇيىمى سۋ تاسقىنىنان زارداپ شەككەن ازاماتتارعا ارناپ ءوز قاراجاتى ەسەبىنەن 42 تۇرعىن ءۇي سالدى. اتىراۋ وبلىسىنداعى بەلسەندىلەر ۇزىندىعى 21 شاقىرىمدى قۇرايتىن بوگەت تۇرعىزىپ، ءوڭىردى سۋ باسۋدان ساقتاپ قالدى. مۇنداي مىسالدار بپۇ-نىڭ جوعارىدان نۇسقاۋ بەرۋدى كۇتپەستەن، قيىن جاعدايدا ادامدارعا ءاردايىم كومەككە كەلۋگە دايىن ناقتى كۇش ەكەنىن دالەلدەيدى.

سۋرەتتى تۇسىرگەن: ءالي عالىم.

بۇدان سوڭ، بايقاۋ قورىتىندىسى جاريالاندى. قازىلار القاسىنىڭ شەشىمىمەن الماتى وبلىسىنداعى «فيرما «بەنت» بپۇ، استاناداعى «بالالاردى وڭالتۋدىڭ ۇلتتىق ورتالىعى» كەاق بپۇ جانە شىمكەنتتەگى «ءبىلىم جانە عىلىم» بپۇ ۇزدىك باستاۋىش پارتيا ۇيىمى رەتىندە تانىلدى. ال قوعامدىق قابىلداۋ بولمەلەرى اراسىندا پارتيانىڭ تۇركىستان وبلىستىق فيليالىنىڭ قوعامدىق قابىلداۋ بولمەسى مەن پارتيانىڭ الماتى قالاسى الاتاۋ اۋداندىق فيليالىنىڭ قوعامدىق قابىلداۋ بولمەسى جەڭىسكە جەتتى. سونداي-اق، حالىققا زاڭگەرلىك كومەك كورسەتۋگە باعىتتالعان «قۇقىقتىق كومەك» جوباسىن جۇزەگە اسىرۋدا ەرەكشە جەتىستىككە جەتكەن پارتيانىڭ سولتۇستىك قازاقستان وبلىستىق فيليالى مەن پارتيانىڭ اتىراۋ وبلىسى قۇرمانعازى اۋداندىق فيليالىنىڭ قوعامدىق قابىلداۋ بولمەلەرى ۇزدىك دەپ تانىلدى.

سونىمەن قاتار، «AMANAT» پارتياسىنىڭ توراعاسى ءتۇرلى سالادا ەڭبەك ەتىپ جۇرگەن ەلىمىزدىڭ 16 بەلسەندى ازاماتىنا پارتيا بيلەتىن تابىستادى. ولاردىڭ قاتارىندا قازاقستاننىڭ ەڭبەك سىڭىرگەن قايراتكەرى، جازۋشى-دراماتۋرگ، مەملەكەتتىك سىيلىقتىڭ لاۋرەاتى روزا مۇقانوۆا، دۇنيەجۇزى قازاقتارى قاۋىمداستىعى توراعاسىنىڭ ورىنباسارى ادىلبەك الپىسباي، قازاقستان تاەكۆوندو فەدەراتسياسىنىڭ ۆيتسە-پرەزيدەنتى قايرات دۇيسەنوۆ، «استانا وپەرا» تەاترىنىڭ ءسوليسى نازىم ساعىنتاي، «التىن دومبىرا» ايتىسىنىڭ جەڭىمپازى، ايتىسكەر اقىن مەيىربەك سۇلتانحان، ينجەنەر-ەنەرگەتيك ازامات تاباروۆ، مەتاللۋرگ يۆان بەلكوۆ جانە باسقا دا ازاماتتار بار.

Abai.kz