بوكستان كىشى الەم چەمپيوناتى اتالىپ كەتكەن "ستراندجا" كۋبوگى اياقتالدى. ۇلتتىق قۇرامانىڭ باس باپكەرى قايرات ءساتجانوۆ جارىستى قورىتىندىلاپ، الداعى دايىندىقتارى تۋرالى ايتىپ بەردى. تولىعىراق Olympic.kz ماتەريالىندا.

ماۋسىم بيىل قارقىندى ءجۇرىپ جاتىر. جىلدىڭ باسىنان بەرى قازاقستاندىق سپورتشىلار يسپانيا مەن سەربياداعى حالىقارالىق تۋرنيرلەرگە قاتىسىپ، جوعارى ناتيجەلەر كورسەتتى.

ال بولگارياداعى "ستراندجا" ءتۋرنيرىنىڭ فينالدىق كەزەڭىنە 14 بوكسشى شىقتى. اقتىق سىننىڭ ناتيجەسىندە قازاقستان قۇراماسى 5 التىن، 9 كۇمىس، 4 قولا مەدال جەڭىپ الدى. وسىلايشا ۇلتتىق قۇراما ءوز رەكوردىن جاڭارتىپ، جالپىكوماندالىق ەسەپتە ءبىرىنشى ورىنعا كوتەرىلدى. بۇعان دەيىن 2022 جىلى وتكەن "ستراندجا" تۋرنيرىندە وتانداستارىمىز 2 التىن، 2 كۇمىس، 5 قولا مەدال العان.

باس باپكەر قايرات ءساتجانوۆ قازاقستاندىق بوكسشىلاردىڭ ونەرىنە باعا بەردى

جارىس جوعارى دەڭگەيدە ءوتتى. اتالمىش تۋرنيرگە وليمپيادا جەڭىمپازدارى، ازيا چەمپيوناتىنىڭ جۇلدەگەرلەرى، سونىمەن قاتار ەۋروپا چەمپيوناتىنىڭ جەڭىمپازدارى قاتىستى. دەي تۇرعانمەن ءبىزدىڭ جىگىتتەر ءوز بابىندا بولدى. جارىستا كەرەمەت ونەر كورسەتتى.

63,5 كەلىدە قوس قازاقستاندىق بوكسشى جولىقتى. ياعني، مۇحاممەدسابىر بازاربايۇلى مەن ەرتۋعان زەينۋللينوۆ. ەكى سپورتشى دا جوعارى دەڭگەيدەگى بوكس ۇلگىسىن كورسەتە ءبىلدى. الايدا ەرتۋعان زەينۋللينوۆ ءوزىنىڭ شيراق ەكەنىن تاعى ءبىر رەت دالەلدەدى.

سۋرەت: olympic.kz سايتىنان الىندى.

ءوز كەزەگىندە تورەحان سابىرحان 67 كەلى سالماقتا تەحنيكا جاعىنان جوعارى دەڭگەيدەگى بوكس ۇلگىسىن كورسەتتى. قازاقستاندىق سپورتشى فينالعا دەيىن جەتىپ، اقتىق سىندا ازىربايجاندىق زاۋر گاحرامانوۆپەن كەزدەستى. ناتيجەسىندە تورەحان سابىرحان ايقىن باسىمدىقپەن جەڭىسكە جەتتى. بۇل تورەحاننىڭ ەرەسەكتەر اراسىنداعى العاشقى جارىسى بولدى. سوعان قاراماستان، 18 جاسار جىگىت التىن مەدالدى جەڭىپ الىپ، ءتۋرنيردىڭ "ەڭ ۇزدىك بوكسشىسى" اتاعىن يەلەندى.

71 كەلى سالماقتا تاعى دا قوس قازاقستاندىق بوكسشى قولعاپ ءتۇيىستىردى. ياعني، ابىلايحان ءجۇسىپوۆ پەن فارۋح توقتاسىنوۆ ءوزارا مىقتىنى انىقتادى. ءۇش راۋندتىڭ قورىتىندىسى بويىنشا ابىلايحان التىننان القا تاقسا، فارۋح كۇمىس مەدال يەلەندى.

ال تيمۋر نۇرسەيىتوۆ 75 كەلى سالماقتىڭ فينالدىق باسەكەسىندە سابىرجان اققالىقوۆپەن كەزدەسۋى كەرەك ەدى.  الايدا تيمۋر جاراقاتىنا بايلانىستى شارشى الاڭعا شىقپاي قالدى. سايكەسىنشە سابىرجان ءتۋرنيردىڭ جەڭىمپازى اتاندى. الايدا تيمۋر نۇرسەيىتوۆ تە تۋرنير بارىسىندا وسالدىق تانىتقان جوق. سپورتشى جارتىلاي فينالدا 2024 جىلعى ازيا چەمپيوناتىنىڭ جەڭىمپازى جاۆوحير ۋمماتاليەۆتى جەڭدى.

سۋرەت: olympic.kz سايتىنان الىندى.

86 كەلى سالماقتا بەكزات نۇرداۋلەتوۆ ءتۋرنيردىڭ التىن جۇلدەگەرى اتاندى. بەكزات فينالدا نۇربەك ورالبايمەن كەزدەسۋى كەرەك بولعان، الايدا 2024 جىلعى وليمپيادا ويىندارىنىڭ كۇمىس جۇلدەگەرى شارشى الاڭعا شىقپادى.

ايتا كەتەتىن جايت، 51 كەلى سالماق دارەجەسىندە دانيال ءسابيت فينالعا شىعىپ، تۇركيالىق سامەت گۋمۋشپەن كەزدەسكەن بولاتىن. قازاقستاندىق ءۇش راۋندتىڭ قورىتىندىسى بويىنشا قارسىلاسىنان باسىم تۇسكەن ەدى، الايدا تورەشىلەر جەڭىستى تۇركيالىق سپورتشىعا سىيلادى. سونداي-اق ءدال وسىنداي جاعداي 60 كەلى سالماقتا دا قايتالاندى دەپ ويلايمىن. سەرىك تەمىرجانوۆ جەرگىلىكتى بولگار بوكسشىسى رادوسلاۆ روسەنوۆپەن كەزدەستى. ناتيجەسىندە قازاقستاندىق كۇمىس جۇلدەگە يە بولدى.

سۋرەت: olympic.kz سايتىنان الىندى.

سانجار تاشكەنباي مەن ماحمۇد سابىرحاننىڭ جاراقاتى تۋرالى

سانجار تاشكەنباي مەن ماحمۇد سابىرحان التىن مەدالعا قول جەتكىزە الار ەدى. بىراق 48 كەلى سالماقتا ونەر كورسەتەتىن سانجار ءوزىنىڭ ءبىرىنشى جەكپە-جەگىندە ساۋساعىن شىعارىپ العانىنا بايلانىستى جارىستى جالعاستىرا المادى. جارىسقا ءبىر كۇن قالعان كەزدە ماحمۇد سابىرحان تاعامدىق ينفەكتسياعا بايلانىستى جەكپە-جەككە شىعا المادى. دارىگەرلەردىڭ ايتۋىنشا، سپورتشىنىڭ جۇرەگى اينىپ، قىزۋى كوتەرىلگەن. ناتيجەسىندە 3 ناۋرىزعا دەيىن سپورتپەن شۇعىلدانۋعا بولمايدى دەگەن انىقتاما بەردى.

ودان بولەك، 92 كەلى سالماق دارەجەسىندە ساعىندىق توعامباي دايىندىق بارىسىندا ساۋساعىن سىندىرىپ العان بولاتىن. سوندىقتان ول جارىسقا قاتىسا المادى.

سۋرەت: olympic.kz سايتىنان الىندى.

الداعى جوسپارلار تۋرالى 

20 ناۋرىزدان باستاپ رەسەيدىڭ كيسلوۆودسك قالاسىندا بىرىككەن وقۋ-جاتتىعۋ جيىنى وتەدى. بۇل جيىنعا رەسەيدىڭ، وزبەكستاننىڭ، ءازىربايجاننىڭ، بەلارۋستىڭ 1-2 ءنومىرلى بوكسشىلارى قاتىسادى. ءبىر قۇرامامىز برازيليادا وتەتىن الەم كۋبوگىنا اتتانادى. ودان بولەك تاعى ءبىر قۇرامامىز ءازىربايجان مەن گرۋزيادا وقۋ-جاتتىعۋ جيىنىن وتكىزەدى. كەيىننەن 10-16 ءساۋىر ارالىعىندا "جىبەك جولى" اتتى ءىرى حالىقارالىق تۋرنيردە ونەر كورسەتەدى. سونداي-اق 13-27 ناۋرىز ارالىعىندا جاپونيا مەن كورەيا مەملەكەتتەرىنىڭ قاتىسۋىمەن جاتتىعۋ جيىنى وتەدى. ال رەسەيدە دايىندالىپ جاتقان سپورتشىلار حاباروۆسكىدە وتەتىن جارىسقا قاتىسادى.

دەرەككوزى: olympic.kz

Abai.kz