بۇگىن ماجىلىستەگى «AMANAT» فراكتسياسىنىڭ مۇشەلەرى وزگەرگەن ۋاقىت بەلدەۋىنىڭ حالىقتىڭ فيزيكالىق جانە پسيحيكالىق دەنساۋلىعىنا، ەڭبەك ونىمدىلىگىنە جانە ەنەرگەتيكالىق رەسۋرستاردى تۇتىنۋعا اسەرى تۋرالى زەرتتەۋ ناتيجەلەرى بويىنشا ۇكىمەت ەسەبىن تىڭدادى.

بۇل زەرتتەۋ جۇمىسى «AMANAT» فراكتسياسىنىڭ ۇسىنىمىن ىسكە اسىرۋ شەڭبەرىندە 6 باعىت بويىنشا جۇرگىزىلدى. بەدەلدى عالىمدار مەن ساراپشىلار، عىلىمي ينستيتۋتتار تارتىلدى. زەرتتەۋ بارىسىندا گەوگرافيالىق پارامەترلەرى ۇقساس ءار ءتۇرلى مەملەكەتتىڭ تاجىريبەسى نازارعا الىندى.

دەپۋتاتتار الدىندا پرەمەر-ءمينيستردىڭ ورىنباسارى ەرمەك كوشەرباەۆ ءسوز سويلەدى.

– سالىستىرمالى تالداۋ جۇمىسى ەۋروپاداعى كوپتەگەن دامىعان ەلدەردە قازاقستانعا ۇقساس تاڭ اتۋ جانە كۇن باتۋ مەرزىمى بار ەكەنىن كورسەتتى. اتالعان مەملەكەتتەر وسىنداي جاعدايدا بەلسەندى دامىپ كەلەدى. ادامي كاپيتالدى دامىتۋ بويىنشا دا جوعارى كورسەتكىشتەرگە يە. وسىعان بايلانىستى ۇكىمەت بىرىڭعاي ۋاقىت بەلدەۋىن ەنگىزۋ تۋرالى شەشىمدى قولداي وتىرىپ، ونى تولىق نەگىزدەلگەن دەپ سانايدى، – دەدى ۆيتسە-پرەمەر.

سۋرەت: ءالي عالىم.

سونداي-اق ول زەرتتەۋ ناتيجەلەرى بىرىڭعاي ۋاقىت بەلدەۋىنە كوشۋ ەلدەگى ءبىلىم بەرۋ پروتسەسىنىڭ ناتيجەلەرىنە تەرىس اسەر ەتپەگەنىن، سونداي-اق جكو مەن كوشەدەگى قىلمىس جاعدايىنا ايتارلىقتاي اسەرىن تيگىزبەگەنىن راستادى.

سونىمەن قاتار بۇگىندە شىعىس قازاقستان وبلىسىنىڭ جەتى اۋدانىندا جۇمىس كەستەسىنە تۇزەتۋ ەنگىزىلدى. بۇل باستاما جەرگىلىكتى تۇرعىندار تاراپىنان كەڭ قولداۋ تاپتى.

حالىق قالاۋلىلارىنىڭ سۇراقتارىنا ساۋدا جانە ينتەگراتسيا ءمينيسترى ارمان شاققاليەۆ، عىلىم جانە جوعارى ءبىلىم ءمينيسترى ساياسات نۇربەك جانە ۇكىمەتتىڭ وزگە دە وكىلدەرى جاۋاپ بەردى.

ا. شاققاليەۆتىڭ ايتۋىنشا، الدىن الا دەرەكتەر حالىق ءومىرىنىڭ نەگىزگى كورسەتكىشىنە جانە ەكونوميكانىڭ نەگىزگى سالالارىنىڭ جۇمىس ىستەۋىنە وزگەرگەن ۋاقىت بەلدەۋىنىڭ تيگىزگەن تەرىس اسەرىن انىقتاعان جوق.

سۋرەت: ءالي عالىم.

دەنساۋلىق ساقتاۋ ءبىرىنشى ۆيتسە-ءمينيسترى تيمۋر سۇلتانعازيەۆ بىرىڭعاي ۋاقىت بەلدەۋىن ەنگىزۋ قادامى دەنساۋلىق ساقتاۋ سالاسىنا وڭ وزگەرىس الىپ كەلگەنىن، اۋرۋلار سانىنىڭ تومەندەگەنىن اتاپ ءوتتى. ماسەلەن، جەدەل جاردەم شاقىرتۋ سانى 0,4%-عا، جۇرەك-قان تامىرلارى اۋرۋلارىمەن سىرقاتتانۋ كورسەتكىشى 3,5%-عا، پسيحيكالىق جانە مىنەز-قۇلىق بۇزىلىسى 1,6%-عا، جاراقاتتانۋ كورسەتكىشى 3,3%-عا، قاتەرلى ىسىكتەر كورسەتكىشى 1,7%-عا تومەندەگەنى بايقالدى. ياعني، ۋاقىتتى ۇتىمدى ءبولۋ – قوعامدىق دەنساۋلىققا وڭ اسەرىن تيگىزۋدە.

– مەملەكەت باسشىسى «انا ءتىلى» گازەتىنە بەرگەن سۇحباتىندا ۇكىمەت ۋاقىت بەلدەۋىن اۋىستىرۋدىڭ ازاماتتاردىڭ تۇرمىسىنا جانە ەل ەكونوميكاسىنا اسەرىن جان-جاقتى زەرتتەۋى ءتيىس ەكەنىن اتاپ ءوتتى. بۇگىن ۇكىمەت «AMANAT» فراكتسياسىنىڭ دەپۋتاتتارىنا وسى عىلىمي زەرتتەۋدىڭ قورىتىندىسىن تانىستىردى. ول عالىمداردىڭ، ساراپشىلاردىڭ قاتىسۋىمەن وتكىزىلىپ، قازاقستاندا بىرىڭعاي ۋاقىتتى ەنگىزۋ تۋرالى شەشىمنىڭ عىلىمي نەگىزدىلىگىن كورسەتتى، – دەدى ءماجىلىس سپيكەرى ەرلان قوشانوۆ.

تالقىلاۋ جۇمىسىن قورىتىندىلاي كەلە، دەپۋتاتتار ۇكىمەتتىڭ عىلىمي-زەرتتەۋ ناتيجەسىن قابىلدادى. دەپۋتاتتار زەرتتەۋ قورىتىندىسىن قالىڭ بۇقاراعا جەتكىزۋدىڭ ماڭىزىن اتاپ ءوتتى.

سۋرەت: ءالي عالىم.

سونىمەن قاتار، دەپۋتاتتار ۇكىمەتكە جەرگىلىكتى بيلىك ورگاندارىمەن، ماسليحاتتارمەن بىرلەسىپ، ەلىمىزدىڭ بىرىڭعاي ۋاقىت بەلدەۋىنە كوشۋىنىڭ ماڭىزى مەن عىلىمي نەگىزى تۋرالى ارنايى ءتۇسىندىرۋ جۇمىسىن جۇرگىزۋدى ۇسىندى. بۇل جۇمىسقا عالىمداردى، ساراپشىلار توبىنىڭ وكىلدەرىن، قوعامدىق پىكىر كوشباسشىلارىن بەلسەندى تارتۋ كەرەك. باق پەن الەۋمەتتىك جەلىلەردە ءتيىستى اقپاراتتىق جۇمىس ۇيىمداستىرۋ قاجەت.

سونىمەن قاتار، حالىق سۇرانىسى مەن شەتەلدىك تاجىريبەنى ەسكەرە وتىرىپ، جەرگىلىكتى جەرلەردە جۇمىس كەستەسىن وزگەرتۋ تاجىريبەسىن جالعاستىرۋ كەرەك.

Abai.kz