تۇركياداعى ەرەۋىل بۇگىن جەتىنشى كۇنگە جالعاستى. كەشە ەردوعان تەلەارنالار ارقىلى ەرەۋىلدىڭ دۇربەلەڭگە ۇلاسقانىن ايىپتاپ، رەسپۋبليكالىق حالىق پارتياسىن جۇرتتى جەلىكتىرۋدى توقتاتۋعا شاقىرىپ، جارالانعان ساقشىلار مەن بۇلىنگەن مۇلىكتەر ءۇشىن جاۋاپكەرشىلىك ارقالايتىندارىن ەسكەرتتى.

ىشكى ىستەر مينيسترلىگىنىڭ مالىمەتىنشە العاشقى بەس كۇندە 1133 ەرەۋىلشى تۇتقىندالعان. اراسىندا باق وكىلدەرى بار.123 قۇقىق قورعاۋ قىزمەتكەرى جارالانعان. ەرەۋىل وتكىزۋگە تىيىمدى ءساۋىردىڭ 1-نە دەيىن ۇزارتقان. سوعان قاراماي ىستامبۇل مەن يزميردە قارسىلىق توقتاماي تۇر.

سارسەنبى كۇنى تۇتقىندالعان ەكرام يماموعلى قىزمەتتەن شەتتەتىلىپ، ءىسى سوتقا جەتكەنىمەن، ونى ەلەپ جاتقان ەشكىم جوق. رەسپۋبليكالىق حالىق پارتياسى ونى 2028 جىلعى پرەزيدەنت سايلاۋىنا باستى ۇمىتكەر رەتىندە بەكىتتى.

ەكرام يماموعلى 2019 جىلى ىستامبۇل قالاسىنىڭ اكىمى بولىپ سايلانعان. وتكەن جىلعى سايلاۋدا حالىق تاعى دا ونى تاڭدادى. ول ەل ىشىندە ەردوعانعا بىردەن-ءبىر باسەكەلەس تۇلعا رەتىندە تانىلعان. شەتەلدىك ساراپشىلار ەكرامنىڭ تۇتقىندالۋىنىڭ ساياسي استارى بار، ەردوعاننىڭ ماقساتتى ارەكەتى دەپ سانايدى. ولاردىڭ پايىمىنشا ەردوعان اقش پەن ەۋروپانىڭ ءوزارا ارازدىعى كۇشەيگەن ۇرىمتال كەزدى پايدالانىپ، ساياسي ۇپايىن تۇگەندەمەك.

دەموكرات بايدەن پرەزيدەنت بولىپ تۇرعاندا تۇركياداعى كىسىلىك قۇقىق ماسەلەسىن قاتاڭ سىناپ كەلگەن. قازىرگى اق ءۇي باسشىسى ترامپ دەموكراتيانى ۇرتوقپاق ەتەتىن ونداي ساياساتتان باس تارتقان. تۇركياداعى ەرەۋىل تۋرالى اقش مەملەكەتتىك دەپارتامەنتىنىڭ ءباسپاسوز وكىلى: "ەكىنشى ءبىر ەلدىڭ ىشكى ىسىنە پىكىر بىلدىرە المايمىز", - دەدى.

انگليا مەن فرانتسيا دا تۇركياداعى بيلىككە نارازىلىقتى سىرتتاي باقىلاپ تۇر. ولاردىڭ ءوز ەسەبى بار. ەۋروپا سيريانى قايتا قۇرۋ مەن ۋكرايناعا بىتىمگەرلىك كۇشتەرىن جىبەرۋدە ەردوعاننىڭ كومەگىنە مۇقتاج.

ەردوعاننىڭ بيلىكتە جۇرگەنىنە شيرەك عاسىرعا تايادى. 2003-2014 جىلدارى ءۇش كەزەك ۇكىمەتباسى بولدى. 2014 جىلى پرەزيدەنتىككە اۋىستى. سودان بەرى بيلىكتى بەرمەي كەلەدى. سول سەبەپتى ونى پۋتين مەن لۋكاشەنكومەن سالىستىراتىندار كوپ.

Abai.kz