قر ەكولوگيا جانە تابيعي رەسۋرستار ءمينيسترى ەرلان نىسانباەۆ ەلىمىزدە نە سەبەپتى قوقىستى وڭدەۋ جوبالارىنىڭ جۇزەگە اسۋى باياۋ ءجۇرىپ جاتقانىن ءتۇسىندىردى.

«وتكەن جىلى 94 جوبانى قولعا العانبىز. سونىڭ تەڭ جارتىسىنا جۋىعى ورتا جولدا توقتادى. ونىڭ بىردەن-ءبىر سەبەبى كومپانيالاردىڭ وزدەرى ينۆەستجوبالارىن دۇرىس جاساي الماۋى، ەكونوميكاسىن ەسەپتەپ بەرە الماۋى بولدى. ەكىنشىدەن، كوپتەگەن كومپانيالار تەحنيكا الامىز دەگەن كومپانيا بولاتىن. جوبالار ۋتيلتولەمنىڭ اقشاسىنا ىسكە اسىرىلاتىن بولعاسىن، ءبىزدىڭ باستى تالاپ — ءوزىمىزدىڭ جەرگىلىكتى اۆتوونەركاسىپتىڭ تەحنيكاسىن الۋ. كەيىن ولار قىتايدان ارزان تاپتىق دەگەن سەكىلدى ۇسىنىستار ايتتى. بىراق ءبىزدىڭ شارتىمىز وزگەرمەدى»، — دەدى ول ۇكىمەت وتىرىسىندا.

ءمينيستردىڭ ايتۋىنشا، تەحنيكا الۋعا بەرىلگەلى وتىرعان نەسيەنىڭ شارتى وتە قولايلى: 15 جىلعا 3 پايىزبەن جانە العاشقى ەكى جىل كانيكۋلى بار.

«تاعى ءبىر سەبەبى — اكىمدىكتەر تاراپىنان دەر كەزىندە تەزدەتىپ جەر بەرىلمەۋى. وسى سەبەپتى جوبالاردىڭ 40 پايىزى جۇزەگە اسپاي قالدى»، — دەدى مينيستر.

سونداي-اق ۆەدومستۆو باسشىسى مۇنداي جوبانى قولعا الۋعا نيەتتى، بىراق قۇجات جاعىنا شورقاق كاسىپكەرلەرگە كومەك كورسەتىلەتىنىن ايتتى. دالىرەك ايتقاندا، وڭىرلەردە بيىلدان باستاپ مۇنداي ءار جوباعا جەرگىلىكتى اكىمدىكتەن ءبىر-ءبىر مامان بەكىتىلىپ، سوعان جاۋاپتى بولادى.

Abai.kz