قوستانايعا كوشىپ كەلگەن قازاق: «رەسەيدىڭ پروۆينتسياسى سەكىلدى، قازاقستاندا جۇرگەنىڭدى سەزىنبەيسىڭ...»

ەكى جىل بۇرىن قوستانايعا قونىس اۋدارعان بەلگىلى پەداگوگ سارسەنبەك باقىتۇلىنىڭ ايتۋىنشا ءوڭىر ءالى كۇنگە دەيىن قازاقىلانباعان قالپىندا قالىپ وتىر. وڭىردە قازاق مۇددەسى ءۇشىن جۇمىس ىستەپ جاتقان ازاماتتاردىڭ سانى ساناۋلى. وسى جولدا جۇرگەن بەلسەندىلەر كوپتەگەن كەدەرگىمەن بەتپە-بەت كەلۋدە دەپ جازادى Ertenmedia.kz.

«قوستانايعا كەلگەلى تۇسىنگەنىم، بۇل قالانىڭ اتى قازاق بولعانىمەن، زاتى ورىس. سولتۇستىكتەگى كورشىنىڭ پروۆينتسياسى ما دەرسىڭ. وڭىردەگى 70 پايىزدان استام بالا ورىس تىلىندە وقيدى. قازاق مەكتەپتەرىنىڭ جايى ءماز ەمەس»، - دەيدى سارسەنبەك باقىتۇلى.

ايتۋىنشا، قازاق مەكتەبىنە بارعان بالالاردىڭ كوپشىلىگى انا تىلىنەن ماقۇرىم. «تازا قازاق مەكتەبىندە وقيتىن بالام «ەشكىممەن سويلەسە المادىم. دوس تاپپادىم. اكە، كەتەيىكشى» دەپ كۇندە مازامدى الادى. ءتىپتى ءبىر جولى «ءوزىمىزدىڭ قازاقستانعا قايتايىقشى» دەپ ءوتىندى. "بۇل قازاقستان عوي" دەسەم، سەنبەيدى. قوستاناي ابدەن ورىستانعان. تۇتاس قالانىڭ كەلبەتى وسىنداي. ءوز ەلىڭدە جۇرسەڭ دە، وگەيسىڭ. ۇلتتىق باعىت دەگەندى مۇلدە ۇمىتقان»، - دەپ قىنجىلادى اۆتور.

پەداگوگتىڭ پايىمداۋىنشا، ورىستانعان قوستانايدىڭ قازاقى وڭىردەن كەلگەن بالانىڭ ساناسىنا وسىنشالىقتى اسەر ەتۋى، جاعدايدىڭ قانشالىقتى كۇردەلى ەكەنىن كورسەتەدى.

«تۋعالى ورىستانعان ورتادا وسكەن وسىنداعى قازاقتىڭ قىز-جىگىتتەرى رەسەي ءۇشىن سوعىسقا اتتانىپ جاتسا، تاڭعالۋعا بولمايدى. ولار كرەمل پروپاگانداسىنىڭ قۇرباندارى. بيلىك سولتۇستىككە مۇلدەم باس قاتىرمايدى. توقاەۆتان باستاپ، اكىم-قارالارعا دەيىن جالتاق پوزيتسيا ۇستانادى»، - دەيدى سارسەنبەك باقىتۇلى.

بۇعان دەيىن اشكەرە ءوڭىر اكىمى قۇمار اقساقالوۆتىڭ توقاەۆتىڭ ەسكەرتۋىنە قۇلاق اسپاي وتىرعانىن جازعان ەدى.

Abai.kz