پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين ءماجىلىستىڭ جالپى وتىرىسىنان كەيىن سالىق كودەكسىنىڭ جوباسىنداعى سوڭعى وزگەرىستەرگە توقتالدى.

بۇدان كەيىن قوسىلعان قۇن سالىعى 16 پروتسەنت بولادى. قوسىلعان قۇن سالىعىنىڭ شەگى 40 ملن تەڭگە مولشەرىندە بەلگىلەنەدى. ياعني بۇرىن كاسىپكەر ساتاتىن تاۋاردىڭ نەمەسە كورسەتەتىن قىزمەتتىڭ باعاسىنا ۇستىنەن 12 پايىز ندس قوساتىن بولسا، ەندى ءدال سول تاۋارعا 16 پايىز قوسۋعا مىندەتتى. بۇل تاۋارلار مەن قىزمەتتەردىڭ باعاسىن بەلگىلى ءبىر دەڭگەيدە ءوسىرۋى مۇمكىن.

ندس شەگى (سالىقتى تولەۋگە مىندەتتى بولاتىن كىرىستىڭ تومەنگى مەجەسى) بۇرىنعىداي 20 000 اەك (شامامەن 69 ملن تەڭگە) ەمەس، 40 ملن تەڭگەگە دەيىن تومەندەتىلدى.

ونىڭ ايتۋىنشا «40 ملن تەڭگە» ورتاق شەشىم ەكەن. ۇكىمەت پەن دەپۋتاتتاردىڭ كونسترۋكتيۆتى ۇستانىمىنىڭ ارقاسىندا وسىنداي ىمىراعا قول جەتكىزىلگەن.

«بىراق مۇنداي شەك بولعاندا 160 مىڭ سالىق تولەۋشىدەن ايىرىلاتىنىمىزدى ايتقىم كەلەدى. سونداي شامامەن 400 ملرد تەڭگەدەي قوسىمشا بيۋدجەت تۇسىمىنەن قاعىلامىز. ءبىزدىڭ بيزنەسمەندەر ۇكىمەت تە، پارلامەنت تە وسىنداي ىمىراعا بارۋعا دايىن ەكەنىن ءتۇسىنسىن دەپ ايتىپ تۇرمىن»، - دەيدى سەرىك جۇمانعارين.

ۇلتتىق بانك توراعاسى تيمۋر سۇلەيمەنوۆ ۇكىمەتتىڭ قوسىلعان قۇن سالىعىن كوتەرۋ باستاماسى قولدايتىنىن، ققس-تى كوتەرۋ تۋرالى جاڭالىقتار ينفلياتسياعا دا اسەر ەتىپ جاتقانىن جەتكىزدى.

ۇكىمەت مۇشەلەرى بيۋدجەتتىڭ ايتارلىقتاي كىرىستەن قاعىلاتىنىنا قاراماستان، بيلىك بۇل شەشىمدى بيزنەستىڭ تىنىسىن اشۋ ماقساتىندا سانالى تۇردە قابىلداپ وتىر دەيدى.

ەندى ءبىر جاقتان ۇكىمەت جەكە كاسىپكەرلەردى تىركەۋگە قاتىستى تالاپتاردى قاتاڭداتۋدى كوزدەپ وتىر.

جاڭا ەرەجەگە سايكەس، بۇرىن سالىق زاڭناماسىن بۇزعاندار نەمەسە اتىنا تىركەلگەن بەلسەندى ەمەس جەكە كاسىپكەرلىگى بار ازاماتتارعا الداعى ۋاقىتتا يپ اشۋ قيىنداي تۇسەدى.

«جەكە كاسىپكەرلىكتى تىركەۋ ءتارتىبىن كۇشەيتەمىز. بۇعان قاتىستى ءتيىستى زاڭنامالىق نورمالار دايىندالدى. سالىقتىق زاڭ بۇزۋشىلىق جاساعاندار نەمەسە بۇرىننان اشىلعان، الايدا جۇمىس ىستەمەيتىن يپ-لارى بار ادامدار ءۇشىن جاڭا يپ تىركەۋ ەداۋىر كۇردەلى راسىمگە اينالادى»، – دەيدى ۇكىمەت باسشىسىنىڭ ورىنباسارى.

جاڭا سالىق كودەكسىندە ققس-نان بولەك باسقادا وزگەرىستەر بار.

ول جايىندا جۇمانعارين: ء"بىز سالىقتاردى، تولەمدەر مەن الىمداردى قىسقارتامىز. 12 سالىقتىڭ ورنىنا 11 بولادى. 10 تولەمنىڭ 2-ءىن الىپ تاستاۋ ۇسىنىلادى: جارنامانى ورنالاستىرعانى جانە ليتسەنزيالاردى پايدالانعانى ءۇشىن تولەمدەر. 3 تولەمدى بىرىكتىرۋ ۇسىنىلادى: سۋ رەسۋرستارىن پايدالانۋ ءۇشىن، ورماندى پايدالانۋ ءۇشىن جانە جانۋارلار دۇنيەسىن پايدالانۋ ءۇشىن تولەمدەر. تابيعي رەسۋرستاردى پايدالانعانى ءۇشىن تولەم بولادى. بۇل تولەمدەردەگى مولشەرلەمەلەر سانى 77-گە قىسقارادى. سونىمەن قاتار ۇكىمەت الىمداردىڭ 6 ءتۇرىن قىسقارۋدى ۇسىنىپ وتىر. ولار بويىنشا مولشەرلەمەلەردىڭ 34 ءتۇرى الىنىپ تاستالماق.

سونداي-اق مەملەكەتتىك باجدىڭ 5 ءتۇرى الىنىپ تاستالادى، ولار بويىنشا مولشەرلەمەلەر 51-گە قىسقارادى.  ءبىز سالىق جەڭىلدىكتەرىن وڭتايلاندىرامىز.

سالىق دەكلاراتسيالارىنىڭ دەرەكتەرى بويىنشا سوماسى 3,4 ترلن تەڭگە 453 نورما جەڭىلدىك دەپ تانىلدى. بۇگىنگى تاڭدا سوماسى 1,3 ترلن تەڭگەدەن استام 128 سالىق جەڭىلدىگىن الىپ تاستاۋ ۇسىنىلىپ وتىر" -  دەدى.

ۇلتتىق ەكونوميكا ءمينيسترى بۇل ماسەلەنى وڭتايلاندىرۋ ءۇشىن اشىق جاڭا جۇيە قۇرىلىپ جاتقانىن باسا ايتتى.

Abai.kz