بۇگىن وبلىس اكىمى سەرىك شاپكەنوۆ ءۇش جاسار دىنمۇحاممەد جۇماجانمەن جانە ونىڭ اتا-اناسىمەن جۇزدەستى. ءبۇلدىرشىننىڭ قالاداعى اتىراۋ ىقشاماۋدانىنداعى ورازا ايت تويلانعان ورىندى جيناستىرىپ جۇرگەن ۆيدەوسى الەۋمەتتىك جەلىدە كەڭ تاراعان ەدى، - دەيدى وبلىس اكىمىنىڭ ءباسپاسوز قىزمەتى.

سەرىك شاپكەنوۆ دىنمۇحاممەدتىڭ تاربيەسى مەن قورشاعان ورتاعا دەگەن سۇيىسپەنشىلىگىنە ريزا بولىپ، راقمەتىن ايتتى. ول سونداي-اق قر پرەزيدەنتى اكىمشىلىگىنىڭ جەتەكشىسى ايبەك دادەبايدىڭ مەملەكەت باسشىسى اتىنان جولدانعان حاتىن تابىستادى.

— كەيدە كوپ ءسوزدىڭ ورنىنا ءبىر عانا ءىستىڭ ءوزى جەتىپ جاتادى. دىنمۇحاممەد كىشكەنتاي عانا ويىن بالاسى بولسا دا، ونىڭ ارەكەتى كوپكە وي سالدى. البەتتە، ول مۇنى بوگدە بىرەۋدەن كورىپ ەمەس، ءوزىنىڭ وتباسىندا تازالىق پەن ءتارتىپتىڭ ءمانىن ءتۇسىنىپ ءوسىپ كەلە جاتقاندىقتان جاسادى. بۇل — تەك تاربيەنىڭ ەمەس، ناعىز وتانسۇيگىشتىكتىڭ ۇلگىسى. ءوز وتانىنا شىن بەرىلگەندىكتىڭ بەلگىسى. وسىنداي ارەكەتتەر مەملەكەت باسشىسىنىڭ “تازا قازاقستان” باستاماسى ۋاقىتشا ءىس-شارا عانا ەمەس، ءار ازاماتتىڭ ءومىر سالتى بولۋى قاجەتتىگىن كورسەتەدى. كىشكەنتاي دىنمۇحاممەدتىڭ جاساعانى — تازالىقتى اركىم وزىنەن باستاۋى كەرەك دەگەن ۇندەۋ، - دەدى س. شاپكەنوۆ.

دىنمۇحاممەدتىڭ اكەسى ەرجان حايروشەۆتىڭ ايتۋىنشا، تۇرعىنداردىڭ ءبىرى ۇلىن ۆيدەوعا ءتۇسىرىپ، الەۋمەتتىك جەلىگە جۇكتەگەن.

— ءبىز ءوزىمىزدىڭ ىقشاماۋداندا ورازا ايت مەيرامىن كەڭ كولەمدە تويلادىق. ۇلىمىزدىڭ ارەكەتى بۇكىل ەلدىڭ ىقىلاسىنا بولەنەدى دەپ ويلامادىق. ونىڭ ءتىلى كەش شىقتى، سوسىن بالاباقشاعا بەردىك. سول جاقتان ۇيرەنگەنى دە بار شىعار. ءوز وتباسىمىزدا دا تازالىققا ءمان بەرەمىز، سەنبىلىكتەردەن قالمايمىز. مەن ءوز ۇلىمنىڭ ەلدىڭ پاتريوتى بوپ ەر جەتكەنىن قالايمىن، - دەيدى ە. حايروشەۆ.

كەيىن وبلىس اكىمى دىنمۇحاممەدكە ەسكەرتكىش سىيلىقتار تاپسىرىپ، اتا-اناسىنا العىس ايتتى.

ەسكە سالايىق، اتىراۋدا “تازا قازاقستان” رەسپۋبليكالىق ەكولوگيالىق اكتسياسى بەلسەندى ءجۇرىپ جاتىر.

بۇدان بولەك، ەلدى مەكەندەردى كوگالداندىرۋدىڭ ايماقتىق جوسپارى بويىنشا 63 گەكتار اۋماقتا 145700 اعاش وتىرعىزىلماق.

Abai.kz