نەمىس كومپانياسى قازاقستاندا سۋ ۇنەمدەيتىن تەحنولوگيا ءوندىرىسىن ىسكە قوسۋ مۇمكىندىگىن قاراستىرىپ جاتىر.

سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ گەرمانيالىق BAUER كومپانياسىنىڭ پرەزيدەنتى وتتو رويسسپەن كەزدەستى.

كاسىپورىن اۋىلشارۋاشىلىق القاپتارىن سۋارۋعا ارنالعان قۇرال-جابدىقتار شىعارۋمەن اينالىسادى. تاراپتار قازاقستان اۋماعىندا نەمىس سۋارۋ جۇيەلەرىن ءوندىرۋدى ىسكە قوسۋ مۇمكىندىگىن تالقىلادى.

بۇگىندە قازاقستاندا سۋ ۇنەمدەيتىن سۋارۋ جۇيەلەرىن شىعاراتىن ءتورت وتاندىق زاۋىت جۇمىس ىستەيدى. سونداي-اق بەس شەتەلدىك زاۋىتتى ىسكە قوسۋ جوسپارلانىپ وتىر.

«مەملەكەت باسشىسىنىڭ تاپسىرماسى بويىنشا ءبىزدىڭ مينيسترلىك قازاقستانعا سۋ ۇنەمدەۋ تەحنولوگيالارىن شىعاراتىن شەتەلدىك كومپانيالاردى تارتۋ باعىتىندا جۇمىس جۇرگىزىپ جاتىر. سونىمەن قاتار شارۋالاردىڭ زاماناۋي سۋارۋ جۇيەلەرىنە كوشۋى ءۇشىن سۋبسيديا تۇرىندە بارلىق قاجەتتى جاعداي جاسالىپ جاتىر. بىلتىر وسى قولداۋدىڭ ارقاسىندا مۇنداي جۇيەلەر 158 مىڭ گەكتار ەگىس القابىنا ەنگىزىلدى»، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.

Abai.kz