رەسەي پرەزيدەنتى ۆلاديمير پۋتين 19 ءساۋىر كۇنى كەشكە ۋكرايناداعى بارلىق اسكەري ءىس-قيمىلداردى ۋاقىتشا توقتاتۋ تۋرالى بۇيرىق بەردى. ۋكراينا باسشىسى ۆلاديمير زەلەنسكي بۇل باستامانى قولداپ، تىنىشتىق كەزەڭىن 30 كۇنگە ۇزارتۋدى ۇسىندى.

پاسحاداعى ءبىتىم اياسىندا تۇتقىندار الماسۋى بولدى. ءار تاراپتان 246 ادام بوساتىلدى. سونىمەن قاتار، ۋكرايناعا 31 جارالانعان اسكەري قىزمەتكەر قايتارىلىپ،ال رەسەي 15 جارالانعان ساربازدى الدى.

«ناش ۆىحود» قوعامدىق قوزعالىسى جاريالاعان ۋكراينا بوساتقان ادامدار تىزىمىندە ەكى قازاقستان ازاماتى بار. ولاردىڭ مالىمەتىنشە، تۇتقىندار الماسۋ ناتيجەسىندە 2005 جىلى تۋعان ەگامبەرديەۆ شەرحان جۇمانازارۇلى مەن 2002 جىلى تۋعان ورداباەۆ ەربولات دۋلاتۇلى بوستاندىققا شىققان.

بۇل – ۋكراينا تاراپىنان رەسەيمەن الماسۋ اياسىندا ورتالىق ازيا ەلدەرىنىڭ ازاماتتارىن بەرۋىنىڭ العاشقى جاعدايى ەمەس. 2024 جىلعى شىلدە ايىندا قىرعىزستان ازاماتى الىشەر تۇرسىنوۆ قايتارىلعان بولاتىن.

2025 جىلدىڭ باسىنان بەرى رەسەي مەن ۋكراينا ءۇش رەت تۇتقىندار الماسۋىن جۇزەگە اسىردى.

دەرەككوزى: qaz365.kz

Abai.kz