85 جاسقا قاراعان شاعىندا بەلگىلى عالىم سەيىت قاسقاباسوۆ قايتىس بولدى. قارالى حاباردى م.اۋەزوۆ اتىنداعى ادەبيەت جانە ونەر ينستيتۋتى جەتكىزدى.

«بۇگىن بەلگىلى ادەبيەتتانۋشى، فولكلورتانۋشى عالىم، ۇلتتىق عىلىم اكادەمياسىنىڭ اكادەميگى، فيلولوگيا عىلىمدارىنىڭ دوكتورى، مەملەكەتتىك سىيلىقتىڭ لاۋرەاتى سەيىت قاسقاباسوۆ ومىردەن ءوتتى.  مارقۇمنىڭ وتباسىنا مەن جاقىندارىنا، قازاق حالقىنا قايعىرا كوڭىل ايتامىز!»—دەلىنگەن حابارلامادا.

سەيىت قاسقاباسوۆ 1940 جىلى 24 ماۋسىم كۇنى سەمەي قالاسىندا دۇنيەگە كەلگەن. 1967 جىلى قازاق سسر عىلىم اكادەمياسىنىڭ م.و.اۋەزوۆ اتىنداعى ادەبيەت جانە ونەر ينستيتۋتىنىڭ اسپيرانتۋراسىن بىتىرگەن. 1969 جىلى «قازاقتىڭ قيال-عاجايىپ ەرتەگىلەرى» دەگەن تاقىرىپتا كانديداتتىق ديسسەرتاتسيا قورعاعان.

ەڭبەك جولىن 1970-1981 جىلدارى قازاق سسر عىلىم اكادەمياسىنىڭ قوعامدىق عىلىمدار بولىمشەسىندە عىلىمي حاتشى ءارى «قازاق سسر عىلىم اكادەمياسىنىڭ حابارلارى» اتتى جۋرنالىنىڭ جاۋاپتى حاتشىسى بولىپ باستادى. كەيىننەن قازاقستان رەسپۋبليكاسى ۇلتتىق عىلىم اكادەمياسى ادەبيەت جونە ونەر ينستيتۋتىنىڭ عىلىمي قىزمەتكەرى، قوعامدىق عىلىمدار بولىمشەسىنىڭ عىلىمي حاتشىسى، كسرو عىلىم اكادەمياسى الەم ادەبيەتى ينستيتۋتىنىڭ اعا عىلىمي قىزمەتكەرى، قازاقستان رەسپۋبليكاسى پرەزيدەنتى اپپاراتىنىڭ قىزمەتكەرى، قازاقستان رەسپۋبليكاسى مينيسترلەر كابينەتى جانىنداعى جوعارى اتتەستاتسيا كوميسسياسىنىڭ توراعاسى، ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى شىعىستانۋ فاكۋلتەتىنىڭ دەكانى، قازاقستان رەسپۋبليكاسى ۇلتتىق عىلىم اكادەمياسى ادەبيەت جانە ونەر ينستيتۋتىنىڭ ديرەكتورى قىزمەتتەرىن اتقارعان. عىلىمي-زەرتتەۋ ەڭبەكتەرى قازاق فولكلورىنىڭ تەورياسى مەن تاريحىنا، ادەبيەت پەن ونەر ماسەلەلەرىنە، ەتنوگرافيا مەن اۋىز ادەبيەتى مۇرالارىنىڭ تەكستولوگياسىنا ارنالعان.

قاسقاباسوۆتىڭ ميفولوگيا مەن پروزالىق فولكلوردىڭ شىعۋ تەگى مەن دامۋ جولدارى، فولكلورداعى ءار زامان بولمىسىنىڭ سيپاتتالۋ ەرەكشەلىكتەرى، فولكلوردىڭ كوركەمدىك ءادىسى تۋرالى تەوريالىق وي-پىكىرلەرى مەن تۇجىرىمدارى وزبەك، تاتار، تۇرىكمەن، كاراقالپاق، باشقۇرت عالىمدارىنىڭ زەرتتەۋلەرىندە قولداۋ تاۋىپ، نەگىزگە الىندى. ول — ۆ.رادلوۆ جيناعان قازاق فولكلورى ۇلگىلەرى مەن اقىن-جىراۋلار شىعارمالارى ەنگەن «التىن ساندىق»، «ەل قازىناسى - ەسكى ءسوز» جيناقتارىن قۇراستىرۋشىلاردىڭ ءبىرى. جامبىلدىڭ ورىس تىلىندەگى تاڭدامالى جيناعىنىڭ العى ءسوزى مەن تۇسىنىكتەرىن جازىپ، قۇراستىرعان.  تانىمال ەڭبەكتەرىنىڭ قاتارىندا «كازاحسكايا ۆولشەبنايا سكازكا» (1972), «قازاقتىڭ حالىق پروزاسى» (1984), «رودنيكي يسكۋسستۆا» (1986), «كولىبەل يسكۋسستۆا» (1990), «كازاحسكايا نەسكازوچنايا پروزا» (1992),«اباي جانە فولكلور» (1995), «زولوتايا جيلا» (2000), «جانازىق» (2002), «قوزى كورپەش-بايان سۇلۋ. قىز جىبەك. قازاقتىڭ عاشىقتىق جىرلارى» (2003), «XV-XVIII عاسىرلارداعى قازاق ادەبيەتى» (2005), «و فولكلورە ي نە تولكو» (2005) «ەلزەردە» (2008) سياقتى مونوگرافيالار مەن زەرتتەۋ كىتاپتارى بار.

Abai.kz