پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين الماتى وبلىسىنا جۇمىس ساپارىندا ءوڭىردىڭ اۋىل شارۋاشىلىعى تاۋارىن وندىرۋشىلەرىمەن كەزدەستى. ارنايى ەكونوميكالىق ايماقتاعى عىلىمي-يننوۆاتسيالىق نىسانداردى ارالاپ، يادرولىق فيزيكا ينستيتۋتىنىڭ جۇمىسىمەن تانىستى.

الماتى وبلىسىندا ەگىس ناۋقانى بەلسەندى ءجۇرىپ جاتىر. بيىل اۋىل شارۋاشىلىعى داقىلى 436,8 مىڭ گەكتارعا دەيىن جەتكىزىلدى. بۇل وتكەن جىلمەن سالىستىرعاندا 13 مىڭ گەكتارعا ارتىق. «كەڭ دالا» باعدارلاماسى بويىنشا بيىل كوكتەمگى ەگىس جۇمىسىنا وبلىس شارۋالارىنا 15,7 ملرد تەڭگە جەڭىلدىكپەن قارجى ءبولىنىپ، 32 وندىرۋشىگە قاراجات بەرىلگەن.

«اۋىل اماناتى» باعدارلاماسى بويىنشا ەكى جىلدا جالپى قۇنى 10,8 ملرد تەڭگە بولاتىن 1 361 قارىز الۋشى جەڭىلدىكپەن نەسيە العان. 2025 جىلى 2,5 ملرد تەڭگە كولەمىندە تاعى 211 قارىز بەرىلمەك.

بيىلعى ءبىرىنشى توقساننىڭ قورىتىندىسى بويىنشا وڭىردەگى اوك سەكتورىنا سالىنعان ينۆەستيتسيا كولەمى 13,2 ملرد تەڭگەنى قۇرادى. بۇل وتكەن جىلمەن سالىستىرعاندا 2 ەسەگە كوپ. بيىل وبلىستا جوسپار بويىنشا 33,5 ملرد تەڭگە سوماسىنا 17 ينۆەستيتسيالىق جوبا ىسكە اسىرىلماق. ونىڭ 11-ءى شارۋالارعا 2,5%-دىق جەڭىلدىكپەن، سقو تاجىريبەسىن تاراتۋ باعدارلاماسى بويىنشا ىسكە اسىرىلادى. بۇل كۇندە 103 جاڭا جۇمىس ورنى قۇرىلعان التى جوبا ورىندالىپ ۇلگەرگەن.

«بايسەركە اگرو» جشس وقۋ ورتالىعىندا وتكىزىلگەن ۆيتسە-پرەمەرمەن كەزدەسۋگە 20-دان استام فەرمەر قاتىستى. كەزدەسۋ بارىسىندا سەرىك جۇمانعارين ۇكىمەتتىڭ ديقانداردى قولداۋعا ايرىقشا نازار اۋدارۋىنىڭ ناتيجەسىندە 2025 جىلعى ءبىرىنشى توقساننىڭ قورىتىندىسىنا سايكەس، اۋىل شارۋاشىلىعى سالاسى 3,7% ەكونوميكالىق ءوسۋدى كورسەتكەنىن اتاپ ءوتتى.

«مەملەكەتتىڭ شارۋالاردى قولداۋىن سەزىنىپ وتىرعاندارىڭىز داۋسىز. ەگەر 2022 جىلى كوكتەمگى ەگىس پەن ەگىن جيناۋعا جەڭىلدىكپەن 70 ملرد تەڭگە بەرىلسە، بۇگىندە 5%-بەن 700 ملرد تەڭگە، سوعان ۇقساس مولشەرلەمەمەن تەحنيكا ليزينگىنە تاعى 200 ملرد تەڭگە ءبولىندى»، — دەپ اتاپ ءوتتى ۆيتسە-پرەمەر.

«Qazaq Balyq» قاۋىمداستىعىنىڭ الماتى فيليالىنىڭ توراعاسى، «بالىق مەكتەبى» جاستار اراسىندا بالىق شارۋاشىلىعىن تانىمال ەتۋ مەكتەبىنىڭ نەگىزىن قالاۋشى مارلەن ءتۇرسىنالى بالىق ءوسىرۋ سالاسىن دامىتۋ بويىنشا ءوز ۇسىنىسىن ايتتى. ونىڭ ايتۋىنشا، بالىق شارۋاشىلىعىن دامىتۋدىڭ 2021-2030 جىلدارعا ارنالعان مەملەكەتتىك باعدارلاماسى سالانىڭ دامۋىنا ايتارلىقتاي سەرپىن بەرگەن. سونىمەن قاتار، سۋ تاپشىلىعى جاعدايىندا بالىق ءوسىرۋدى ودان ءارى ءتيىمدى دامىتۋ ءۇشىن جەم-ءشوپ قۇنىن سۋبسيديالاۋدا، باسسەيندەرگە جەر استى سۋىن پايدالانۋ ءۇشىن ۇڭعىمانى بۇرعىلاۋ شىعىنىن جابۋ ماقساتىمەن سۋعا جەڭىلدىكتى تاريف ەنگىزۋدە، ونىمگە ۆەتەريناريالىق قۇجات الۋ پروتسەسىن وڭايلاتۋدا، تسيفرلاندىرۋدا مەملەكەتتىڭ قولداۋى قاجەت.

سەرىك جۇمانعارين اشم-گە بارلىق ۇسىنىستى ەگجەي-تەگجەيلى قاراپ، بالىق شارۋاشىلىعىن قولداۋ مۇمكىندىگىن پىسىقتاۋدى تاپسىردى.

سونداي-اق كەزدەسۋدە فەرمەرلەر سۋبسيديا تولەۋ كەشىكتىرىلەتىنىن جەتكىزدى. ۆيتسە-پرەمەر قازىرگى ۋاقىتتا بارلىق وڭىردە سۋبسيديا الۋعا ءوتىنىم وسى ماقساتقا بيۋدجەتتەن جىل سايىن بولىنەتىن قاراجات كولەمىنەن ەداۋىر اسىپ ءتۇسىپ جاتقانىن ايتتى. فەرمەرلەردى اوك سالاسىنداعى ينۆەستيتسيالىق جوبالاردى 6% جەڭىلدىكپەن سالالىق قارجى ينستيتۋتتارى ارقىلى قارجىلاندىرۋ مۇمكىندىگىن پايدالانۋعا شاقىردى.

سونىمەن قاتار سەرىك جۇمانعارين فەرمەرلەردى كوپ پايدا اكەلەتىن داقىل ەگۋ ارقىلى ادەتتەگى بيداي القابىن قىسقارتا وتىرىپ، ەگىندى ارتاراپتاندىرۋعا، ءداندى داقىل وڭدەۋدى دامىتۋعا شاقىردى.

پرەمەر-ءمينيستردىڭ ورىنباسارى جۇمىس ساپارى شەڭبەرىندە «يننوۆاتسيالىق تەحنولوگيالار پاركى» اەا نىساندارىن ارالادى. ونىڭ اۋماعىندا بۇگىندە اەا قۇرىلعان ساتتەن بەرگى جالپى ينۆەستيتسيا كولەمى 205 ملرد تەڭگە 182 كومپانيا ورنالاسقان. شامامەن 7 مىڭ جۇمىس ورنى اشىلىپ وتىر. 820 جۇمىس ورنى اشىلاتىن 129,4 ملرد تەڭگە سوماسىنداعى تاعى 12 جوبا سالىنۋدا.

سونداي-اق ۆيتسە-پرەمەر قازاقستانداعى اتوم سالاسىنىڭ ىرگەلى تەحنولوگيالارى مەن ونىمدەرىن، ونىڭ ىشىندە ونەركاسىپكە ارنالعان راديويزوتوپتار مەن راديوفارمپرەپاراتتاردى جاساۋعا دەيىنگى زەرتتەۋ مەن ازىرلەمەنىڭ تولىق تسيكلىن جۇزەگە اسىراتىن جالعىز عىلىمي ۇيىم – يادرولىق فيزيكا ينستيتۋتىنىڭ قىزمەتىمەن تانىستى. سوڭعىسى، فتور-18, يود-131 جانە مو-99 راديويزوتوپى نەگىزىندە جاسالىپ، ونكولوگيالىق اۋرۋلاردى دياگنوستيكالاۋ مەن ەمدەۋ ءۇشىن قولدانىلادى. ونەركاسىپكە ارنالعان راديويزوتوپ ەۋروپاعا ەكسپورتتالادى. ەلىمىزدىڭ مۇناي-گاز ونەركاسىبىندە قولدانىلادى.

Abai.kz