بەلگىلى مۇقاعاليتانۋشى شاياحمەت يماشۇلى ومىردەن وزدى

قۇرمەتتى حالايىق، قادىرلى دوسىمىز، مۇقاعالي اقىننىڭ ونەرىن ناسيحاتتاۋشى، رايىمبەك اۋدانىنىڭ قۇرمەتتى ازاماتى، "قۇرمەت"وردەنىنىڭ يەگەرى، كينو ونەرىنىڭ ۇزدىگى، قر كوركەم اكادەمياسى اكادەميگى، جۇرگەنوۆ   اتىنداعى ونەر اكادەمياسىنىڭ پروفەسسورى شاياحمەت يماشۇلى ومىردەن وزدى.

شاكەڭ 1951 جىلى 17 قاڭتاردا كەگەن اۋدانى، ساتى اۋىلىندا دۇنيەگە كەلگەن.

1968 جىلى سول اۋىلدا ورتا مەكتەپتى ۇزدىك بىتىرگەن. 1970 جىلى قازاق سسر-ءى مادەنيەت مينيسترلىگى جولداماسىمەن ماسكەۋ قالاسىندا اتاقتى ۆگيك ينستيتۋتىنىڭ اكتەرلىك فاكۋلتەتىنە وقۋعا تۇسەدى.

ول الەمگە چاپاەۆ رولىمەن تانىمال بولعان اتاقتى اكتەر بابوچكيننىڭ كلاسىندا وقىعان.

ۆگيك-ءتى 1974 جىلى ءبىتىرىپ، قازاقستانعا ورالدى.

"قازاقفيلم" كينوستۋدياسىندا اكتەر بولىپ قىزمەت اتقاردى. كوپتەگەن فيلمدەردە رولدەر وينادى.

ودان كەيىن، ەلىمىزدەگى كينو سالاسىن دامىتۋ جولىندا قىزمەت اتقاردى.

وسى قىزمەتىندە ءجۇرىپ

قازاق اقىنى م.ماقاتاەۆتىڭ جىرىن جانە قازاقتىڭ ودان وزگە اقىندارىنىڭ وزىق جىرلارىن حالىققا ناسيحاتتاۋمەن اينالىستى.

ونىڭ سەرگەك ساناسىمەن مۇقاعالي جىرلارىن تولىق دەرلىك، ودان وزگە جۇزدەگەن اقىنداردىڭ ۇلگىلى ولەڭدەرىن كەرەمەت اكتەرلىك شەبەرلىكپەن جاتقا وقيتىن. بەلگىلى اقىن جاركەن بودەشۇلى وعان "قازاق پوەزياسىنىڭ ءتىرى ەنتسيكلوپەدياسى" دەگەن تەڭەۋ ايتتى.

ودان كەيىن ءبىراز جىلدار جۇرگەنوۆ اكادەمياسىندا اكتەرلىك شەبەرلىك سالاسىندا ءدارىس بەردى.

شاكەڭ ستۋدەنت شاعىندا ەل پرەزيدەنتى ق.ك.توقاەۆپەن قاتار وقىعانىن، سول كەزدەگى دوستىقتارىن ەسكە الۋشى ەدى - ەل باسشىسى ەلگە ابىرويلى بولسا دەپ تىلەيتىن...

شاكەڭ كۇنى بۇگىنگە دەيىن "عۇمىرداريا" بالالار شىعارماشىلىعى ورتالىعى وتكىزەتىن كونكۋرستاردىڭ جيۋري توراعاسى بولىپ، نەبىر تالانتتاردىڭ قاينار بۇلاعىنىڭ كوزىن اشتى.

شاكەڭنىڭ ءالى دە حالقىنا قىزمەت ەتۋگە قۇشتارلىعى زور ەدى.

اتتەڭ، سۇم اجال ونى كەنەتتەن ارامىزدان الىپ كەتتى - بۇيرەكتە بۇققان ءبىر ءتۇيىر تاس دەگەنىنە جەتتى...

وسىنداي جاقسى ادام قايتپاس ساپارعا كەتتى.

باقۇل بولىڭىز، جاقسى اعا، دوس، باۋىر!

بارلىق دوستارى اتىنان: ءابدىراشيت باكىرۇلى

Abai.kz