كەلەس وزەنىنىڭ سۋى ميكروبيولوگيالىق تۇرعىدان لاستانعان. بۇل تۋرالى تۇركىستان وبلىسىنىڭ سانيتاريالىق-ەپيدەميولوگيالىق باقىلاۋ دەپارتامەنتى مالىمدەدى.

سارىاعاش اۋداندىق سانيتاريالىق-ەپيدەميولوگيالىق باقىلاۋ باسقارماسىنىڭ ماماندارى «سارىاعاش تۇرمىس» مەملەكەتتىك كاسىپورنىنا جوسپاردان تىس تەكسەرۋ جۇرگىزىپ، مەكەمەگە قاراستى كارىز جۇيەسىنەن ءۇش ورەسكەل زاڭبۇزۋشىلىق انىقتاعان.

انىقتالعان كەمشىلىكتەرگە بايلانىستى زاڭدى تۇلعاعا 160 ايلىق ەسەپتىك كورسەتكىش كولەمىندە اكىمشىلىك ايىپپۇل سالىندى جانە نۇسقاما بەرىلدى.

سونداي-اق، سارىاعاش اۋدانىنا قاراستى كوكتەرەك ەلدى مەكەنىندەگى كارىز جۇيەسىنە قاتىستى ماسەلەلەر جەرگىلىكتى اتقارۋشى ورگاننىڭ قاراۋىنا ۇسىنىس حات ارقىلى جولداندى.

مەكەمە تاراپىنان كەلەس وزەنىنىڭ سۋىنان ميكروبيولوگيالىق جانە ۆيرۋسولوگيالىق كورسەتكىشتەرگە زەرتتەۋ ماقساتىندا سىناما الىپ، زەرتتەۋ ءۇشىن ۇلتتىق ساراپتاما ورتالىعى تۇركىستان وبلىسى بويىنشا فيليالىنىڭ شىمكەنت قالالىق بولىمشەسىنە تاپسىرىلعان.

زەرتتەۋ ناتيجەسىندە لاكتوزا وڭ ىشەك تاياقشالارىنىڭ يندەكسى سانيتارلىق نورمادان اسىپ كەتكەنى بەلگىلى بولدى.

نورماتيۆ بويىنشا 1 دم³ سۋداعى شەكتى كورسەتكىش 5000-نان اسپاۋى ءتيىس بولسا، كەلەس وزەنىندەگى كورسەتكىش 9100-گە جەتكەن.

— بۇل كەلەس وزەنىنىڭ ميكروبيولوگيالىق تۇرعىدا لاستانعانىن بىلدىرەدى. وزەن سۋى اۋىزسۋ رەتىندە پايدالانۋعا جارامسىز، دەگەنمەن بالىقتارعا زيانى جوق، — دەلىنگەن تۇركىستان وبلىسىنىڭ سانيتاريالىق-ەپيدەميولوگيالىق باقىلاۋ دەپارتامەنتى اقپاراتىندا.

ەكولوگيالىق تالاپتار دا ساقتالماعان

سارىاعاش اۋدانىنىڭ كوكتەرەك ەلدى مەكەنىندە كەلەس وزەنىنە كارىز سۋىنىڭ توگىلۋى بويىنشا الەۋمەتتىك جەلىدە جاريالانعان ۆيدەوعا بايلانىستى تۇركىستان وبلىسى بويىنشا ەكولوگيا دەپارتامەنتى دە «سارىاعاش-تۇرمىسقا» جوسپاردان تىس تەكسەرۋ جۇرگىزدى.

سارقىندى سۋ سىناماسىن الىپ، تالداۋ ناتيجەسىندە ەكولوگيا كودەكسىنىڭ 106 جانە 222-باپتارىنىڭ تالاپتارىنىڭ بۇزىلعانىن انىقتادى.

وسىعان بايلانىستى اكىمشىلىك قۇقىق بۇزۋ تۋرالى كودەكسىنىڭ نەگىزىندە حاتتاما تولتىرىلدى.

سارقىندى سۋداعى لاستاۋشى زاتتاردىڭ شوعىرلانۋى مىناداي:

نيتراتتار — 0,78 مگ/دم³

نيتريتتەر — 0,206 مگ/دم³

فوسفاتتار — 1,9 مگ/دم³

سۋلفاتتار — 900,78 مگ/دم³

حلوريدتەر — 241,1 مگ/دم³

انيوندى بەتتىك بەلسەندى زاتتار — 0,36 مگ/دم³

امموني — 22,66 مگ/دم³

سۋتەك كورسەتكىشى (رن) — 7,4

قۇرعاق قالدىق — 2293,0 مگ/دم³

ەكولوگيا كودەكسىنىڭ 216-بابىنىڭ 2-تارماعىنا سايكەس، رۇقسات ەتىلگەن توگىندىلەر نورماتيۆتەرىنە دەيىن تازارتىلماعان سارقىندى سۋلاردى سۋ وبەكتىلەرىنە نەمەسە جەر بەدەرىنە توگۋگە تىيىم سالىنادى.

ال 222-باپتىڭ 8-تارماعىندا تازارتىلۋ دارەجەسىنە قاراماستان، مۇنداي سۋلاردى اۋىزسۋ كوزدەرى مەن سانيتاريالىق قورعاۋ ايماقتارىنا توگۋگە جول بەرىلمەيتىنى ناقتى جازىلعان.

ماماندار تۇرعىندارعا وزەن سۋىن تۇتىنباۋ كەرەگىن ەسكە سالادى. ولاردىڭ ايتۋىنشا، وزەن سۋىن اۋىز سۋ رەتىندە نەمەسە تۇرمىستىق ماقساتتا پايدالانباعان دۇرىس. سەبەبى بۇل ادام دەنساۋلىعىنا كەرى اسەر ەتۋى مۇمكىن.

ايتا كەتەيىك، بۇدان بۇرىن سارىاعاش ساناتوريىنەن اققان كارىز سۋى كەلەس وزەنىنە قۇيىلعانى ءمالىم بولعان ەدى.

Abai.kz