قازاقستاندا ورتالىق ازيا تاريحىنداعى العاشقى ءارى ەڭ قۋاتتى سۋپەركومپيۋتەرلىك كلاستەر ورناتىلدى. ونىڭ ونىمدىلىگى شامامەن 2 ەكزافلوپس كولەمىندە، بۇل – ءوڭىر ءۇشىن بۇرىن-سوڭدى بولماعان كورسەتكىش.

سۋپەركومپيۋتەر جاساندى ينتەللەكت پەن جوعارى ءونىمدى ەسەپتەۋلەرگە ارنالىپ، NVIDIA H200 گرافيكالىق چيپتەرى نەگىزىندە جيناقتالعان. جۇيەنى ورناتۋ جانە ىسكە قوسۋ قر تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ Tier III سەنىمدىلىك دەڭگەيىندەگى جاڭا دەرەكتەر ورتالىعىندا جۇزەگە اسىرىلۋدا.

بۇل — مەملەكەت باسشىسىنىڭ ۇلتتىق تسيفرلىق ينفراقۇرىلىمدى قۇرۋ جانە جاساندى ينتەللەكت ەكوجۇيەسىن دامىتۋ جونىندەگى جولداۋىن ىسكە اسىرۋداعى ماڭىزدى قادام.

جوبا تەك كاسىبي ماماندارعا عانا ەمەس، بۇكىل ەلدىڭ تسيفرلىق دامۋ دەڭگەيىن ارتتىرۋعا باعىتتالعان. سۋپەركومپيۋتەر قۋاتى قازىرگى تاڭدا دەنساۋلىق ساقتاۋ، ەنەرگەتيكا، ءبىلىم بەرۋ، مەملەكەتتىك باسقارۋ سياقتى سالالاردا كەڭىنەن قولدانىلماق.

ەڭ باستىسى — سۋپەركومپيۋتەردىڭ رەسۋرستارى بارشاعا قولجەتىمدى بولادى. ونى:

نەيروندىق جەلىلەردى وقىتاتىن ستارتاپتار،

عىلىمي زەرتتەۋلەر جۇرگىزەتىن ۋنيۆەرسيتەتتەر،

جاساندى ينتەللەكتتى وندىرىستىك ۇدەرىستەرگە ەنگىزەتىن عىلىمي ورتالىقتار مەن كومپانيالار پايدالانا الادى.

سۋپەركومپيۋتەردىڭ جەتكىزىلۋى قازاقستاندا جوعارى ءونىمدى ەسەپتەۋلەر ەكوجۇيەسىن قالىپتاستىرۋعا جول اشتى. وسى ورايدا ەل تاريحىندا العاش رەت جوعارى تەحنولوگيالىق جابدىقتاردى كەدەندىك باج سالىعى مەن ققس-تان بوساتۋ مەحانيزمى ەنگىزىلدى. بۇل قادام قازاقستاندى حالىقارالىق IT-كومپانيالار مەن دەرەكتەر ورتالىعى وپەراتورلارى ءۇشىن تارتىمدى ەتەدى.

ايتا كەتەيىك، بۇل باستاما ءابۋ-ءدابيدىڭ تاق مۇراگەرى شەيح حالەد بەن مۇحاممەد بەن زايد ءال ناحاياننىڭ استاناعا رەسمي ساپارى كەزىندە جۇزەگە استى. ساپار اياسىندا Presight (G42) كومپانياسىنىڭ قازاقستانداعى شەتەلدىك كەڭسەسى اشىلىپ، مينيسترلىك پەن Presight اراسىندا سۋپەركومپيۋتەرلىك كلاستەر قۇرۋ جونىندە كەلىسىمگە قول قويىلدى.

تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ بۇل جوبانى ەلدىڭ تسيفرلىق ەگەمەندىگىن نىعايتاتىن، جي تەحنولوگيالارىن دامىتۋعا جانە حالىقارالىق IT-ويىنشىلاردى تارتۋعا باعىتتالعان ستراتەگيالىق باستاما دەپ اتادى.

جوبا – 2029 جىلعا دەيىنگى جاساندى ينتەللەكتتى دامىتۋ تۇجىرىمداماسىن جۇزەگە اسىرۋداعى ماڭىزدى كەزەڭدەردىڭ ءبىرى جانە قازاقستاننىڭ زاماناۋي IT-ينفراقۇرىلىمىنىڭ نەگىزىن قالايدى.

Abai.kz