رەسەيدە ۆلاديمير مەدينسكي دەگەن بار. ۋكراينا بويىنشا رەسەيدىڭ ەكى كەزەك «باس كەلىسسوزشىسى». سول الگىندە ۋكراينامەن كەلىسسوز ءھام كەلىسىم تۋرالى سويلەپ وتىرىپ، ازەربايجاننىڭ قاراباعىن تىلگە تيەك ەتتى.

مەدينسكي: «شىنايى بىتىمگە قول جەتكىزبەستەن، ۋاقىتشا اتىستى توقتاتۋدىڭ سوڭى ارمەنيا مەن ءازىربايجان اراسىنداعى داۋلى ءوڭىر — قاراباق سياقتى بولادى. ول كەزدە بۇكىل ايماق اۋقىمدى ءبىر قاراباققا اينالادى.

ۋاقىت وتە كەلە ۋكراينا ناتو-مەن جانە وداقتاستارىمەن بىرگە اليانسقا مۇشە بولىپ، بۇل جەرلەردى كەرى قايتارۋعا تىرىسادى. مۇنىڭ سالدارى — جەر پلانەتاسىنىڭ اقىرى، ياعني يادرولىق سوعىسقا اكەلىپ سوقتىرادى.

ماسكەۋ «ەشكىم مويىنداماعان، الايدا يادرولىق سوعىسقا سەبەپ بولۋى مۇمكىن اۋقىمدى ءبىر قاراباقتىڭ» پايدا بولۋىن قالامايدى»، - دەدى كوپىرىپ وتىرىپ.

انىعى:

رەسەيدىڭ ۋكراينادان تارتىپ العان اۋماقتارى – الەم مويىنداماعان، وككۋپاتسيالانعان، اننەكتسيالانعان، باسقىنشىلىق سوعىسپەن الىنعان اۋماقتار.

ال قاراباق – بۇل ءازىربايجان زاڭدى جەرى. بۇۇ شەڭبەرىندە مويىندالعان اۋماق. ءتىپتى، 44 كۇندىك سوعىستان سوڭ، ارمەنيانىڭ ءوزى «مويىنداعان» اۋماق.

الايدا، «پلاگياتچيك» مەدينسكي بۇل ەكەۋىنىڭ ايىرماسى جەر مەن كوكتەي ەكەنىن اجىراتا الماي، ساۋاتسىز سالىستىرۋ جاسادى. سايكەسىنشە، جاۋابى كوپ كۇتتىرمەدى.

ءازىربايجان ءسىم-ءى رەسەي پرەزيدەنتىنىڭ كومەكشىسى ۆلاديمير مەدينسكيگە «ءوز قۇزىرەتىنە كىرمەيتىن ماسەلەلەرگە ارالاسپاۋ» جونىندە اشىق تۇردە ەسكەرتۋ جاسادى.

«ەسكە سالعىمىز كەلەدى: قاراباق — ەجەلدەن ءازىربايجان جەرى. رەسەي قاراباقتى ءازىربايجان اۋماعى رەتىندە بۇرىن دا مويىنداعان، قازىر دە سول ۇستانىمدا. بۇل رەتتە مينسك توبىنىڭ تەڭ توراعاسى بولعان ەلدىڭ پرەزيدەنتىنىڭ كومەكشىسى ءوز مەملەكەتىنىڭ ۇستانىمىن نە تۇسىنبەي وتىر، نە تۇسىنگىسى كەلمەيدى دەگەن سۇراق تۋىندايدى.

رەسەي پرەزيدەنتىنىڭ كومەكشىسى رەسەي مەن ۋكراينا اراسىنداعى سوعىستى قاراباقتاعى جاعدايمەن سالىستىرىپ وتىر. مۇنداي سالىستىرۋ ورىنسىز، سەبەبى ءازىربايجان ەشقاشان وزگە مەملەكەتتەردىڭ اۋماقتىق تۇتاستىعىن بۇزعان ەمەس جانە ەشبىر ەلگە قارسى باسقىنشىلىق سوعىس جۇرگىزبەگەن. مەدينسكي مىرزاعا ءوز قۇزىرەتىنە جاتپايتىن ماسەلەلەر بويىنشا جاڭساق پىكىر ءبىلدىرىپ، مەملەكەتارالىق قارىم-قاتىناسقا نۇقسان كەلتىرمەۋدى ۇسىنامىز»، - دەدى توتەسىنەن.

Abai.kz