مەملەكەت باسشىسىنىڭ تاپسىرماسىنا سايكەس اۋىل تۇرعىندارىنىڭ دەنساۋلىعىن جاقسارتۋعا باعىتتالعان جۇيەلى جۇمىستار مەن «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى شەڭبەرىندە اقجايىق اۋدانىنىڭ كونەككەتكەن اۋىلىندا جاڭا فەلدشەرلىك-اكۋشەرلىك پۋنكتى قولدانىسقا بەرىلدى.

اشىلۋ سالتاناتىنا باتىس قازاقستان وبلىسىنىڭ اكىمى ناريمان تورەعاليەۆ قاتىسىپ، اۋىل تۇرعىندارىن مەديتسينالىق نىساننىڭ اشىلۋىمەن قۇتتىقتادى.

«اقجايىق اۋدانىنىڭ كونەككەتكەن اۋىلىندا جاڭا فەلدشەرلىك-اكۋشەرلىك پۋنكتتىڭ اشىلۋى – بارشامىز ءۇشىن قۋانىشتى ءارى ماڭىزدى وقيعا. بۇل — مەملەكەت باسشىسىنىڭ تاپسىرماسىنا سايكەس اۋىل تۇرعىندارىنىڭ دەنساۋلىعىن قورعاۋعا باعىتتالعان جۇيەلى جۇمىستىڭ جانە «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسىنىڭ ناقتى ناتيجەسى»،– دەدى وبلىس اكىمى ناريمان تورەعاليەۆ.

جالپى 2023-2025 جىلدارى وبلىستا 50 جاڭا مەديتسينالىق نىسان سالۋ كوزدەلگەن بولسا، سونىڭ 39-ى بۇگىندە ىسكە قوسىلدى.

قالعان نىسانداردىڭ قۇرىلىس جۇمىستارى اياقتالۋىنا وراي قولدانىسقا بەرىلەدى.

كونەككەتكەن اۋىلىندا سالىنعان جاڭا مەديتسينالىق نىساننىڭ اۋماعى 260 شارشى مەتردەن اسادى. كۇنىنە 40-قا جۋىق ادامدى قابىلداۋعا قاۋقارلى بۇل پۋنكتتىڭ جوبالىق قۇنى – 207 ميلليون تەڭگەدەن استام. قۇرىلىس جۇمىستارىن «جيەنباي» جشس جۇرگىزىپ، تاپسىرىس بەرۋشى رەتىندە وبلىستىق قۇرىلىس باسقارماسى جۇمىس اتقاردى.

كونەككەتكەن اۋىلىنىڭ تۇرعىنى، اۋىلدىق وعامدىق كەڭەستىڭ توراعاسى تۇرعان ساپارعاليەۆ اۋىلدا زاماناۋي ۇلگىدە سالىنعان ەمحانا ءۇشىن مەملەكەت باسشىسىنا ريزاشىلىعىن ءبىلدىردى.

«وبلىس كولەمىندە ەكى جىلدا 50 مەديتسينالىق نىسان سالۋ - ۇلكەن جۇمىس. پرەزيدەنتىمىزدىڭ حالىق يگىلىگى ءۇشىن جاساعان قولداۋىنا العىسىمىز شەكسىز. مەملەكەت باسشىسى اۋىل تۇرعىندارىنا كوپ كوڭىل ءبولىپ وتىر. ەم الۋ ءۇشىن اۋدان ورتالىعىنا نەمەسە قالاعا باراتىنبىز. ەندىگى كەزەكتە ساپالى ەمدى ءوز اۋىلىمىزدا دا الۋعا بولادى”،- دەدى تۇرعان ساپارعاليەۆ.

Abai.kz