قىتاي توراعاسى سي ءتسزينپيننىڭ كەلۋىنە ساناۋلى كۇن قالعاندا، سىرتقى ىستەر ءمينيسترى مۇرات نۇرتىلەۋ كۇتپەگەن جەردەن ۋاشينگتوننان ءبىر-اق شىقتى.

مۇنىڭ استارىندا نە جاتىر؟ "بۇل جولعى ۋاشينگتون ساپارىنىڭ ساياسي سالماعى بۇعان دەيىنگى جۇزدەسۋلەردەن بولەك", - دەپ پايىمدايدى Ertenmedia.

نۇرتىلەۋ امىريكا استاناسىندا بىردەن ءۇش باعىتتا كەلىسسوز جۇرگىزدى. سەنات، ساۋدا سالاسى جانە قاۋىپسىزدىك ماسەلەسىنە جاۋاپتى ىقپالدى تۇلعالارمەن جۇزدەستى.

الدىمەن سەناتتىڭ حالىقارالىق ءىس كوميتەتىنىڭ توراعاسى جەيمىس ءريشتىڭ الدىنان ءوتتى. اڭگىمە كاكىر-شۇكىر ەمەس، ناقتى زاڭدىق كەدەرگىلەردى جويۋ توڭىرەگىندە ءوربىدى.

اسىرەسە، كەڭەس ءداۋىرىنىڭ سارقىنشاعى سانالاتىن، اقش-پەن تۇراقتى ساۋدا جاساۋعا كەدەرگى جاساپ كەلە جاتقان «دجەكسون-ۆەنيك» تۇزەتۋىن الىپ تاستاۋ اشىق تالقىلاندى. اق ءۇي الگى شەكتەۋدىڭ كوزىن قۇرتۋعا دايىن ەكەنىن اڭعارتتى. بىراق، بارتەر سۇرادى. ورنىنا قۇرىلىمدىق دەڭگەيدەگى جاقىنداسۋدى، ءسوز جۇزىندە ەمەس، ناقتى، زاڭدىق ءارى ساياسي تۇرعىدا ورنىقتىرۋدى تالاپ ەتتى. كەلەسى كەزدەسۋ اقش-تىڭ ساۋدا وكىلى جەيميسون گريرمەن ءوتتى. كەلىسسوزدە قاتارداعى الىس-بەرىس ەمەس، "high high value-added manufacturing", قازاقشا ايتقاندا، شيكىزاتتى قاراپايىم كۇيدە ساتپاي، ودان ساپاسى جوعارى، دايىن ءونىم نەمەسە جارتىلاي دايىن ءونىم جاساۋ ماسەلەسى تالقىلاندى.

امىريكا بىزدەن جاي عانا شيكىزات (سونىڭ ىشىندە سيرەك مينەرال) ساتىپ العىسى كەلمەيدى. استانانى جوعارى تەحنولوگيالىق ءوندىرىس تىزبەگىنە تارتىپ، بەيجىڭنىڭ ىقپالىنان شىعارىپ اكەتۋدى قالايدى. مۇنىڭ ىشىندە لوگيستيكانى ءارتاراپتاندىرۋ ماسەلەسى بار.

ۋاشينگتون قازاقستان ارقىلى قىتاي مەن رەسەيدى اينالىپ وتەتىن بالاما تاسىمال جولىن قالىپتاستىرۋعا مۇددەلى. ءۇشىنشى ءارى اسا ماڭىزدى كەزدەسۋ مەمحاتشى ماركو رۋبيومەن بولعان جابىق ەسىك فورماتىنداعى پىكىر الماسۋ. رۋبيو ماسكەۋ مەن بەيجىڭدى سۋقانى سۇيمەيتىن ساياساتكەر. ماركومەن مامىلەگە كەلۋ فورمالدى پروتوكول ەمەس.

دەمەك، قازاقستانعا گەوساياسي تاڭداۋ ۇسىنىلىپ وتىر. رۋبيونىڭ سوزىنەن ۇققانىمىز، استانا امىريكالىق تەحنولوگيا مەن ينۆەستيتسياعا، بەيرەسمي ديپلوماتيالىق ارنالار مەن ساياسي كەپىلدىككە جول اشاتىن ستراتەگيالىق ارىپتەستىككە باتىل بارۋى ءتيىس.

توقاەۆتىڭ توڭىرەگى بۇل ۇسىنىسقا كەت ءارى ەمەس ءتارىزدى. توق ەتەرىن ايتقاندا، نۇرتىلەۋدىڭ ۋاشينگتون ساپارى، ءبىر شاۋگىم ءشايدى تاۋىسىپ قايتقان، ءىش پىستىراتىن ىسساپارعا ۇقسامايدى. ۇستەل ۇستىندە تۇراقتى ساۋدا پارتنەرىنىڭ مارتەبەسى، ۋران، سيرەك مەتالدى وڭدەۋگە قاجەتتى ينۆەستيتسيا، لوگيستيكانى قايتا قۇرۋ، قاۋىپسىزدىك سالاسىنداعى تىعىز ارىپتەستىك سەكىلدى ماڭىزدى قۇجاتتار ءتىزىلىپ جاتىر.

امىريكاعا قىتايدىڭ ءسوزىن سويلەپ، ماسكەۋدىڭ سويىلىن سوقپايتىن سەنىمدى سەرىكتەس كەرەك. ايتقانداي، ەكى-ءۇش كۇننەن كەيىن استاناعا بەيجىڭ باسشىسى كەلەدى. نۇرتىلەۋدىڭ ۋاشينگتون ساپارىنان كەيىن اقوردانىڭ قولىندا كوزىر پايدا بولدى. توقاەۆ وسى ارقىلى ەكى الپاۋىتقا: ء"سىز-ءبىز دەسىپ، سىيلاسۋعا دايىنبىز. بىراق بىزبەن وكتەم سويلەسۋگە تىرىسپاڭدار" دەگەن سيگنال بەرىپ وتىر. وسى جولعى ويىننىڭ ستاۆكىسى جوعارى.

Abai.kz