ماۋسىمنىڭ 13-ىندە باستاعان شابۋىلىن: "يراننىڭ ۋران بايىتۋ قۇرىلىمدارىن جوق قىلۋ", - دەپ تۇسىندىرگەن ترامپ پەن نەتانياحۋدىڭ تۇپكى جوسپارى بەلگىلى بولدى.

"يراننىڭ رۋحاني كوسەمى اياتوللا حامەنەيدىڭ جاسىرىنعان جەرىن بىلەمىز، 48 ساعاتتا شارتسىز بەرىلمەسە كوزىن جويامىز", - دەپ اشىق ايتا باستادى. ەكى سىبايلاستىڭ يران يسلام رەسپۋبيكاسىن وزگەرتىپ، حاليفات قۇرۋ جوسپارىن نەتانياحۋ اق ۇيگە العاشقى شەتەلدىك قوناق بولىپ بارعاندا اقىلداسىپ، ءپىسىرىپ العانى انىق.

يزرايل يرانعا جالپى اۋە سوققىسىنان كەيىن، اقپاراتتىق شابۋىلعا، عالامتور داۋىرىندەگى شەكتەن القىعان ۇرىس تاسىلىنە كوشتى. جانارماي بەكەتتەرىن بومبالاپ، دۇربەلەڭ تۋدىردى. يران بانكتەرىنە حاككەرلىك شابۋىل جاساپ، تسيفرلىق جۇيەسىن ىستەن شىعاردى. يراننىڭ زاڭ ورگاندارىنىڭ، اقپارات ورگاندارىنىڭ عيماراتىن تالقانداپ، ونى يران حالقىنىڭ قالاۋىمەن بولعانداي ەتىپ كورسەتتى. ءيزرايلدى تاۋەلسىز ەلگە سوعىس اشۋشى ەمەس، كەرىسىنشە اشىنعان حالىقتى ديكتاتوردان قۇتقارۋشى ەتىپ جارنامالاۋعا جانىن سالىپ جاتىر.

يراننىڭ اسكەريلەرى "قۋعىنداعى بۇرىنعى پاتشا مۇراگەرلەرىمەن بايلانىسقا شىقتى، ولاردى ەلگە كەلىپ، بيلىكتى قولعا الۋعا شاقىردى" دەگەن اقپاراتتار تاراتتى.

كۇللى الەم ەكەۋدىڭ تۇپكى جوسپارىن ءبىلىپ، ىشتەي باقىلاپ وتىر. ساۋد ارابياسى باستاعان 21 مۇسىلمان ەلى ءيزرايلدىڭ شابۋىلىن ايىپتاعانىمەن، ىشتەي جويىتتەرگە بولىسىپ وتىر. اقش بازاسى ورنالاسقان ەلدەردى ايتپاعاندا، ساۋد ارابياسى كوگىنەن ۇشقان ءيزرايلدىڭ بومبالاۋشى ۇشاعىنا كوز جۇما قاراپ، يران ۇشاقتارىن قاعىپ تاستاپ وتىر. سيريانىڭ جاڭا باسشىسى دا جويىتتەرگە بولىسىپ، ءوزىنىڭ جەرى مەن كوگىن اسكەري ماقساتتا پايدالانۋعا رۇقسات بەردى.

يراننىڭ ەكى سەنىمدى وداقتاسى - رەسەي مەن قىتاي دا جاعدايدى ديپلوماتيالىق جولمەن رەتتەۋدى ايتۋدان باسقاعا بارماي وتىر. يراننىڭ شانحاي ىنتىماقتاستىق ۇيىمىنىڭ بەلدى مۇشەسى ەكەنىن ايتساق تا جەتكىلىكتى.

يزرايل قورعانىس ءمينيسترى 86 جاستاعى حامەنەيگە: "بەرىلمەسە، ساددام قۇسايىننىڭ اياعىن قۇشاتىنىن", - ايتىپ سەس كورسەتتى.

ساددامنان كەيىنگى يراكتىڭ، كاددافيدان كەيىنگى ليۆيانىڭ قانداي كۇيگە تۇسكەنىن الەم جۇرتى ءبىلىپ وتىر. اقش-تىڭ اۋعانستانعا ورناتقان دەموكراتيالىق بيلىگىنىڭ ءبىر تۇندە قالاي كۇيرەگەنىنە دە كۇللى الەم كۋا بولدى.

ترامپ پەن نەتانياحۋدىڭ يران دا ورناتپاق بولعان "جاڭا حاليفاتىنىڭ" دا باياندى بولارى، ورتا شىعىستىڭ بەيبىت ايماققا اينالا قويۋى ەكىتالاي.

Abai.kz