ءماجىلىستىڭ جالپى وتىرىسىندا دەپۋتات نارتاي سارسەنعاليەۆ جەكە مەنشىك مەكتەپتەردىڭ جاپپاي جابىلاتىنى تۋرالى مالىمەتتەر تاراي باستاعانىنا الاڭداۋشىلىق ءبىلدىردى.

— ەلىمىزدە 300 مىڭنان استام وقۋ ءبىلىم الاتىن 800 جەكە مەنشىك مەكتەپ بار. ولارعا مەملەكەتتىك تاپسىرىس توقتاتىلادى ەكەن دەپ جاتىر. ەرتەڭ بىرقاتارى جابىلامىز دەگەن حابارلاماسىن ايتىپ جاتىر. ولاردى قارجىلاندىرۋ جەرگىلىكتى بيۋدجەتكە ءتۇستى. ەرتەڭ ولاردىڭ ءبارى جابىلىپ قالسا، 300 مىڭ وقۋشىنى قايدا جىبەرەمىز، — دەپ سۇرادى دەپۋتات.

وقۋ-اعارتۋ ءمينيسترى عاني بەيسەمباەۆ جەرتولە مەن مەكتەپكە ساي ەمەس عيماراتتا ۇيىمداستىرىلعان جەكە مەنشىك مەكتەپتەر عانا جابىلاتىنىن ايتتى.

— ءبىزدى سول جەكە مەنشىك مەكتەپتە وقىپ جاتقان 300 مىڭ بالانىڭ ساپالى ءبىلىم الۋى مينيسترلىكتى وتە قاتتى الاڭداتادى. ءبىز جوعارى اۋديتورلىق پالاتانىڭ تەكسەرۋى ناتيجەسىندە دە جەكە مەنشىك مەكتەپتەردەگى ءبىلىمنىڭ ساپاسىنا ۇلكەن سۇراقتار تۋىنداعانىن كورىپ وتىرمىز. راس، ەگەر جەكە مەنشىك مەكتەپتەر جابىلاتىن بولسا، مىنا جەرتولەلەردە، مەكتەپكە تيەسىلى ەمەس عيماراتتاردا ورنالاسۋى ءبىرىنشى كەزەكتە سەبەپ بولادى. سونداي-اق، وتە ساپالى ءبىلىم كورسەتىپ وتىرعان (جەكە مەنشىك — رەد.) مەكتەپتەرىمىز بار. ولارعا ەشقانداي قاۋىپ ءتونىپ وتىرعان جوق. مۇنى ناقتى ايتا الامىن، — دەدى مينيستر.

بۇل ماسەلە ۇكىمەت قابىرعاسىندا دا كوتەرىلگەن ەدى.

Abai.kz