اقتاۋداعى ۇشاق اپاتىنا بايلانىستى ءازىربايجان مەن رەسەي اراسى سۋىپ كەتكەنى بەلگىلى. بۇل سۋىستىق سوڭعى كۇندەرى جاڭاشا سيپات الا باستادى. ءازىربايجان مەن رەسەي اراسىنداعى قارىم-قاتىناستار 27 ماۋسىمدا ەكاتەرينبۋرگتە ۇلتى ازەربايجان 50-دەن استام ادام ۇستالعاننان كەيىن ۋشىعىپ كەتتى. ورىس قۇقىق قورعاۋ ورىندارىنىڭ رەيدى كەزىندە ەكى ادام قازا تاۋىپ، تاعى ەكەۋى اۋىر جاراقات العان. رەسمي باكۋ بۇل وقيعاعا كىنالىلەردى جاۋاپقا تارتۋدى تالاپ ەتتى.

كەلەڭسىز وقيعادان كەيىن ءازىربايجاندا رەسەيدىڭ مەملەكەتتىك جانە جەكە مەكەمەلەرى جوسپارلاعان بارلىق بىرلەسكەن مادەني ءىس-شارالار توقتاتىلدى. ءازىربايجان مادەنيەت مينيسترلىگى مۇنداي شەشىمنىڭ قابىلدانۋىنا رەسەيدىڭ ەكاتەرينبۋرگ قالاسىندا رەسەيلىك قۇقىق قورعاۋ ورگاندارىنىڭ «ءازىربايجان ۇلتى وكىلدەرىنە قارسى ماقساتتى تۇردە جاساعان ارەكەتتەرى سەبەپ بولعانىن» اتاپ ءوتتى.

وسىعان بايلانىستى رەسەيلىكتەردىڭ قاتىسۋىمەن وتەدى دەپ جوسپارلانعان كونتسەرتتەر، فەستيۆالدەر، كورمەلەر، سپەكتاكلدەر مەن وزگە دە مادەني ءىس-شارالار پىشاقپەن كەسكەندەي شورت توقتاتىلدى.

ءازىربايجاننىڭ پارلامەنتتىك دەلەگاتسياسى رەسەي فەدەراتسياسى جينالىسىنىڭ پارلامەنتارالىق ىنتىماقتاستىق جونىندەگى كوميسسيا وتىرىسىنا قاتىسپاۋدى ۇيعاردى.

دۇيسەنبى، 30 ماۋسىم كۇنى ازىربايجانداعى كرەملگە جاقىن «Sputnik ءازىربايجان» باسىلىمىنىڭ رەداكتسياسىنا پوليتسيا ءتىنتۋ جۇرگىزگەن. بىرنەشە ادام ۇستالعان. ءىىم الاياقتىق، زاڭسىز كاسىپكەرلىك جانە قىلمىستىق جولمەن الىنعان مۇلىكتى زاڭداستىرۋ باپتارى بويىنشا قىلمىستىق ءىس قوزعاعان.

رەسەيدىڭ سىرتقى ىستەر مينيسترلىگى ءازىربايجان ەلشىسىن شاقىرتىپ، «باكۋدىڭ دوستىققا جات ارەكەتتەرىنە جانە جۋرناليستەردىڭ زاڭسىز ۇستالۋىنا» بايلانىستى نارازىلىق ءبىلدىردى.

ءازىربايجان ىشكى ىستەر مينيسترلىگىنىڭ قىزمەتكەرلەرى باكۋدە يراننان ەسىرتكى تاسىمالداپ، ونى ينتەرنەت ارقىلى ساتۋمەن جانە كيبەرالاياقتىقپەن اينالىسقان ۇيىمداسقان قىلمىستىق توپ مۇشەلەرى دەگەن كۇدىكپەن بىرنەشە ادامدى ۇستاعان.

1 شىلدە كۇنى «Report.az» اگەنتتىگى العان اقپاراتىنا سۇيەنىپ: «ۇستالعان ادامدار – رەسەي ازاماتتارى»، - دەپ حابارلادى.

وعان جاۋاپ رەتىندە رەسەيدىڭ ەكاتەرينبۋرگ قالاسىندا «ءازىربايجان-ورال» ۇيىمىنىڭ باسشىسى شاحين شيحلينسكي ۇستالعان.

بۇرىن كەڭەس قۇرامىندا بولعان ەكى ەلدىڭ ءبىر-بىرىنە قارىمتا قايتارۋ سيپاتىنداعى قاقتىعىسىنىڭ ۇزىن-ىرعاسى وسىنداي. تۋىسقان ءازىربايجان تارابى ءوز اۋماعىنداعى رەسەيدىڭ جۇمساق كۇشتەرىنىڭ ەركىنسىگەن ارەكەتىنە جاعداي ۋشىققان تۇستا توزىمسىزدىك تانىتسا، كرامل تارابى ورتا ازيا مەن كاۆكاز ايماعىنان كەلگەندەرگە مۇرىنىن شۇيىرە قارايتىن، تىزە باتىراتىن، ادامدىق قۇقىن تاپتايتىن ەسكى ادىسىنە باسىپ وتىر.

رەسەي اسكەرىنىڭ باس قولباسشىسى گەرەسيموۆتىڭ اسكەري دوقتوريناسى بويىنشا قازىرگى زامانعى سوعىس – اسكەري قارۋ-جاراقپەن اتىسۋدان عانا تۇرمايدى. اقپاراتتىق سوعىس، ەكونوميكالىق سوعىس، ەنەرگەتيكالىق بوپسا، ەسىرتكى بيزنەسى، قوعامدىق، ءدىني ۇيىمداردى جاستاردى تارتۋعا پايدالانۋ سياقتى سان-سالالى بولىپ كەلەدى.

ءازىربايدان باۋىرلاردىڭ كەڭەس ۇكىمەتى تاراي سالا، ەلتسيننىڭ داۋىرىندە-اق «رۋسسكي مير-دەن» ىرگەسىن اۋلاق سالىپ، تۇركياعا، ەۋروپاعا بەت بۇرعانى بەلگىلى. ولار بۇل قادامىن ورىس الىپبيىنەن باس تارتىپ، لاتىنشاعا كوشۋدەن باستادى.

2000 جىلى كەڭەس وداعىن قايتا ورناتۋدى كوزدەيتىن پۋتين كرەملگە بيلىككە كەلگەنگە دەيىن ۇلتتىق باعىتىن ايقىنداپ، ەڭسە تىكتەپ الدى.

پۋتين ۋكرايناعا سوعىس اشقاننان كەيىن بۇرىنعى كەڭەس وداعى قۇرامىندا بولعان ەلدەر ءوز ەگەمەندىگىنە قاۋىپ تونە باستاعانىن سەزىنە باستادى. رەسەي ساياساتكەرلەرى «كەڭەس وداعى زاڭدىق تۇرعىدان ءالى تاراعان جوق»، - دەپ ايدى اسپانعا ءبىر-اق، شىعاردى.

«بالاپان باسىنا، تۇرىمتاي تۇسىنا» كەتكەن ەلتسين داۋىرىندە شىنايى ەگەمەندىگىن زاڭدىق نەگىزدە تۇعىرلاپ، ۇلتتىق مەملەكەتكە اينالعان ەلدەر ودان ىعىپ تۇرعان جوق. ىقپايدى دا...

ءازىربايجان باۋىرلاردىڭ سوڭعى كۇندەردەگى ارەكەتى سونىڭ كورىنىسى. يلحام اليەۆتىڭ بۇل باتىل قادامى ماسكەۋگە قاراپ باس شۇلعىپ كەلە جاتقان وزگە ەلدەرگە ۇلگى بولسا، كانى؟!

ەسبول ۇسەنۇلى

Abai.kz