بازاربەك-ابەنوۆ تاندەمى فارماتسەۆتيكاداعى فارستى اشكەرەلەدى

ءماجىلىس دەپۋتاتتارى مۇرات ابەنوۆ پەن باقىتجان بازاربەك ەلدەگى فارماتسەۆتيكا سالاسىندا ميللياردتاعان قارجىنىڭ زاڭسىز اينالىمعا تۇسكەنىن ايتىپ، باس پروكۋرور بەرىك اسىلوۆقا رەسمي ساۋال جولدادى.

ولار سالاداعى سىبايلاس جەمقورلىق پەن كولەڭكەلى سحەمالاردى ءتۇپ-تامىرىمەن تەكسەرۋدى تالاپ ەتۋدە، دەپ حابارلايدى Ertenmedia.kz.

دەپۋتاتتار ءوز حاتىندا جوعارى اۋديتورلىق پالاتانىڭ (جاپ) تەكسەرۋ قورىتىندىسىنا سۇيەنە وتىرىپ، «سك-فارماتسيا» جشس مەن دەنساۋلىق ساقتاۋ مينيسترلىگىنە قاراستى مەكەمەلەردىڭ ارەكەتىنەن مەملەكەتكە ميللياردتاعان شىعىن كەلگەنىن مالىمدەدى.

اقپاراتقا سايكەس، «سك-فارماتسيا» ءدارى-دارمەك پەن مەديتسينالىق بۇيىمداردى نارىق باعاسىنان بىرنەشە ەسە قىمباتقا ساتىپ العان.

كەي پرەپارات نارىقتىق قۇنىنان 40 پايىزدان 365 پايىزعا دەيىن جوعارى باعامەن الىنعان. ماسەلەن، قۇنى مىڭ تەڭگە بولاتىن تاۋارلار ون، ءتىپتى ءجۇز ميلليونداعان تەڭگەگە ساتىپ الىنعان.

وعان قوسا، جوسپارلاۋدىڭ ناشارلىعىنان 2022-2023 جىلدارى 2,8 ملرد تەڭگەگە الىنعان دارىلەر پايدالانىلماي، جارامسىز بولىپ قالعان. ال جالپى، ءتيىمسىز جوسپارلاۋ مەن باقىلاۋدىڭ جوقتىعىنان كەلگەن شىعىن كولەمى 17,2 ملرد تەڭگەنى قۇراعان.

دەپۋتاتتار حاتتا ناقتى مىسالداردى دا كەلتىرەدى.

ماسەلەن، 2024 جىلى «كازمەدپروم» جشس بىرىڭعاي ديستريبيۋتورعا 8 ملرد 85 ملن تەڭگەگە 62 ميلليون جۇپ مەديتسينالىق قولعاپ جەتكىزگەن.

بىراق ءدال سول كەزەڭدە كومپانيا تايلاندتان 87 ملن جۇپ قولعاپتى 3 ملرد 987 ملن تەڭگەگە ساتىپ العان. ياعني تاۋار باعاسى ەكى ەسەدەن ارتىق قىمباتقا ساتىلعان.

سونىمەن قاتار، حاتتا دەنساۋلىق ساقتاۋ مينيسترلىگىنە قاراستى ۇلتتىق دارىلىك زاتتار ساراپتاماسى ورتالىعىنىڭ دا ارەكەتى سىنعا الىنعان. ساراپتاما ورتالىعى ءدارى-دارمەكتەردى نارىققا شىعارۋ كەزىندە بىرقاتار كومپانيانىڭ مۇددەسىن زاڭسىز قورعاعان دەگەن كۇدىك بار.

مىسالى، كەيبىر ءدارى-دارمەكتى تىركەۋ مەرزىمى 210 كۇننىڭ ورنىنا 450, ءتىپتى 1270 كۇنگە دەيىن سوزىلعان. ال ءلوببيى كۇشتى كومپانيالارعا ساراپتاما نەبارى 25 كۇندە جاسالىپ كەلگەن.

دەپۋتاتتار مۇنىڭ سوڭى ءدارى-دارمەك باعاسىنىڭ نەگىزسىز قىمباتتاۋىنا، باسەكەنىڭ جويىلۋىنا جانە مەملەكەت قارجىسىنىڭ تالان-تاراجعا تۇسۋىنە اكەلگەنىن ايتىپ وتىر. ولار فارماتسەۆتيكا سالاسىنداعى جەمقورلىق جۇيەسىنىڭ مەملەكەتكە عانا ەمەس، حالىقتىڭ دەنساۋلىق ساقتاۋ جۇيەسىنە دەگەن سەنىمىنە نۇقسان كەلتىرەتىنىن جەتكىزدى.

وسىعان بايلانىستى دەپۋتاتتار باس پروكۋروردان اتالعان فاكتىلەردى رەسمي تۇردە تىركەپ، «سك-فارماتسيا»، «مەدسەرۆيس-پليۋس» جشس، ۇلتتىق دارىلىك زاتتار ساراپتاماسى ورتالىعى جانە دەنساۋلىق ساقتاۋ مينيسترلىگىنىڭ فارماتسەۆتيكالىق باقىلاۋ كوميتەتىنە جان-جاقتى پروكۋرورلىق تەكسەرۋ جۇرگىزۋدى تالاپ ەتتى. سونىمەن بىرگە اتالعان فاكتى بويىنشا سوتقا دەيىنگى تەرگەۋدى باستاۋدى سۇرادى.

Abai.kz