بۇگىندە اتا-انالاردىڭ بالالار الدىنداعى مىندەتىن ورىنداۋى قاتاڭ قاداعالاۋعا الىنىپ، اليمەنت تولەۋ ماسەلەسى وزەكتى بولىپ وتىر. 

وكىنىشكە قاراي، كەي اتا-انالار بالالارىنا اي سايىن ءتيىستى اقى تولەۋدەن جالتارادى. ولاردىڭ ارقايسىسىنىڭ جاعدايى ارنايى ۆەدومستۆوارالىق كەڭەستە قارالدى. بەلگىلى بولعانداي، كەيبىر اكەلەر بالالارىنا ءتيىستى تولەمدى اۋدارۋدىڭ ورنىنا ميلليونداعان قارجىنى قۇمار ويىندارعا سالعان.

ەندى ءبىرى تۇراقتى جۇمىس ورنى مەن تابىسى بولا تۇرا ادەيى اقشا اۋدارمايدى. بۇل رەتتە قۇزىرلى ورگان وكىلدەرى سوت ورىنداۋشىلاردىڭ سالعىرتتىعىن دا سىنعا الدى. سەبەبى اليمەنت بويىنشا بورىشكەر بوپ جۇرگەن كەيبىر اتا-انالاردىڭ جالاقىسى مەن زەينەتاقىسىنان اليمەنت سوماسىن ۇستاپ قالۋ، ولاردىڭ مۇلكىن پايدالانۋعا تىيىم سالۋ سىندى باقىلاۋ شارالارى جۇيەلى جۇرگىزىلمەيدى. ءتىپتى، سوت ورىنداۋشىلاردىڭ ءبىرى بورىشكەردىڭ بىرنەشە جىل بويى تەمىر توردىڭ ار جاعىندا جازاسىن وتەپ جاتقانىن دا بىلمەيتىن بولىپ شىقتى. سوندىقتان پروكۋراتۋرا وكىلدەرى ۋاكىلەتتى ورگاندارعا انىقتالعان بۇزۋشىلىقتاردى جويۋ، باقىلاۋدى كۇشەيتۋ جانە اليمەنت ءوندىرىپ الۋ جونىندەگى قىزمەتتى جانداندىرۋ جونىندە ۇسىنىمدار مەن تاپسىرمالار بەردى.

جالپى، جىل باسىنان بەرى پروكۋراتۋرانىڭ ۇيلەستىرۋىمەن اليمەنت بويىنشا 600 ميلليون تەڭگەگە جۋىق قارىز وندىرىلگەنىن اتاپ وتكەن ءجون. بۇل باعىتتاعى جۇمىستىڭ اياسىندا 121 بورىشكەر جۇمىسقا ورنالاستىرىلىپ، 300-دەن استام بالانىڭ قۇقىقتارى قالپىنا كەلتىرىلدى.

باستىسى، اليمەنت تولەۋدەن جالتارعانى ءۇشىن 158 بورىشكەر اكىمشىلىك، تاعى 18 ازامات قىلمىستىق جاۋاپقا تارتىلدى.

Abai.kz