ەلىمىزدە ىشكى جانە كەلۋ ءتۋريزمىن دامىتۋعا باعىتتالعان مەملەكەتتىك قولداۋدىڭ 7 نەگىزگى تەتىگى جۇزەگە اسىرىلىپ كەلەدى. بۇل تۋرالى تۋريزم جانە سپورت مينيسترلىگىنىڭ ءباسپاسوز قىزمەتى ءمالىم ەتتى.

بۇل شارالار كاسىپكەرلەرگە تۋريزم سالاسىندا جاڭا مۇمكىندىكتەر اشۋعا، ينفراقۇرىلىمدى جاقسارتۋعا جانە قىزمەت ساپاسىن ارتتىرۋعا مۇمكىندىك بەرەدى.

1. تاۋ شاڭعىسى كۋرورتتارىن جابدىقتاۋ
اسپالى جولدار، قار تازالاۋ تەحنيكاسى مەن جاساندى قار جابدىقتارىن ساتىپ الۋ شىعىندارىنىڭ 25%-ى مەملەكەت تاراپىنان وتەلەدى.

2. جول بويىنداعى سەرۆيس نىساندارىنا قولداۋ
موتەل، جانارماي بەكەتى، تاماقتانۋ ورنى، ءدارىحانا سەكىلدى نىسانداردى سالۋعا كەتكەن شىعىننىڭ 10%-ى سۋبسيديالانادى.

3. تۋريستىك وبەكتىلەردى سالۋ نەمەسە جاڭعىرتۋ
قىزمەت كورسەتۋ نىساندارىن سالۋ مەن جاڭعىرتۋ شىعىندارىنىڭ 10%-ى وتەلەدى.

4. تۋريستىك اۆتوبۋستار ساتىپ الۋعا وتەماقى
سىيىمدىلىعى 8 ورىننان اساتىن اۆتوبۋستاردى ساتىپ العان كاسىپكەرلەرگە شىعىننىڭ 25%-ى قايتارىلادى. اۆتوبۋستار كەمىندە 5 جىل تۋريستىك ماقساتتا قولدانىلۋى ءتيىس.

5. كەلۋ ءتۋريزمىن ىنتالاندىرۋ
شەتەلدىك تۋريست تارتقان ءاربىر وتاندىق تۋروپەراتورعا ءبىر تۋريست ءۇشىن 15 000 تەڭگە كولەمىندە سۋبسيديا تولەنەدى (تۋريست ەلدە كەمىندە 4 كۇن، 3 ءتۇن بولۋى جانە eQonaq جۇيەسىندە تىركەلۋى شارت).

6. بالالارعا ارنالعان اۋە بيلەتتەرىن سۋبسيديالاۋ
18 جاسقا دەيىنگى بالالار ىشكى تۋريزم تۋرپاكەتى اياسىندا ەل ىشىندە تەگىن ۇشا الادى. بۇل جاعدايدا اۋە بيلەتتەرىنىڭ قۇنى تولىقتاي سۋبسيديالانادى.

7. سانيتارلىق-گيگيەنالىق توراپتارعا قولداۋ
تۋريستىك ايماقتار مەن جول بويىنداعى سانيتارلىق-گيگيەنالىق توراپتاردى ۇستاۋعا اي سايىن 83 300 تەڭگە كولەمىندە وتەماقى بەرىلەدى.

مينيسترلىكتىڭ مالىمەتىنشە، بۇل قولداۋ شارالارى تۋريستىك ونىمدەردىڭ تارتىمدىلىعىن ارتتىرىپ، سالاداعى كاسىپكەرلىك بەلسەندىلىكتى كۇشەيتۋگە باعىتتالعان.