قازاقستان رەسپۋبليكاسىنىڭ تۋريزم جانە سپورت مينيسترلىگى بىرقاتار باق-تا تاراعان "بالالارعا سپورتپەن اينالىسۋعا تىيىم سالىندى" دەگەن اقپاراتقا بايلانىستى رەسمي مالىمدەمە جاسادى.

مينيسترلىك 2025 جىلعى 16 شىلدەدە شىققان №133 بۇيرىققا قاتىستى مۇنداي ءتۇسىندىرۋ شىندىققا جاناسپايدى جانە بۇرمالانعان اقپارات ەكەنىن اتاپ ءوتتى.

مينيسترلىكتىڭ مالىمەتىنشە، قازاقستاندا 4 پەن 17 جاس ارالىعىنداعى 5,1 ميلليوننان استام بالا مەن ءجاسوسپىرىم سپورتپەن تۇراقتى تۇردە شۇعىلدانادى، جانە ولاردىڭ سپورت سەكتسيالارىنا، مەكتەپتەرىنە نەمەسە دايارلىق باعدارلامالارىنا قاتىسۋىنا ەشقانداي شەكتەۋ قويىلماعان.

ماسەلە تەك جارىستارعا قاتىسۋ ءۇشىن ەڭ تومەنگى جاس شەگىن ەنگىزۋ تۋرالى بولىپ وتىر. بۇل – حالىقارالىق تاجىريبەدە قالىپتاسقان نورما جانە جاس سپورتشىلاردىڭ دەنساۋلىعىن قورعاۋعا باعىتتالعان.

جارىستار – سپورتتىق دايىندىقتىڭ ءبىر بولىگى، ءارى ولار بەلگىلى ءبىر فيزيكالىق جانە ەموتسيونالدىق جۇكتەمەمەن بايلانىستى. وسىعان بايلانىستى مينيسترلىك جارىستارعا قاتىسۋ ءۇشىن ەڭ تومەنگى جاس شەگىن بەلگىلەدى. بۇل شارا ەڭ الدىمەن بالالاردىڭ دەنساۋلىعىن قورعاۋعا جانە جاس كەزىندەگى جاراقات الۋ قاۋپىن ازايتۋعا باعىتتالعان، – دەلىنگەن مينيسترلىك حابارلاماسىندا.

جاس شەكتەۋلەرى سپورت فەدەراتسيالارىنىڭ ۇسىنىستارى نەگىزىندە ازىرلەنىپ، دەنساۋلىق ساقتاۋ مينيسترلىگىمەن كەلىسىلگەن. بۇل وزگەرىس بالالاردى سپورت مەكەمەلەرىنە قابىلداۋ ۇدەرىسىنە اسەر ەتپەيدى.

سوندىقتان دا "سپورتپەن اينالىسۋعا تىيىم سالىندى" دەگەن حابارلامالار شىندىققا ساي ەمەس. مۇنداعى اڭگىمە تەك جارىستارعا قاتىسۋعا قويىلاتىن جاس تالاپتارى تۋرالى بولىپ وتىر، – دەپ ناقتىلادى مينيسترلىك.

Abai.kz