گەرمانيادا XXXII جازعى ۋنيۆەرسيادا ويىندارى ءوز مارەسىنە جەتتى. اتالعان ءدۇبىرلى دودادا قازاقستاندىق تاەكۆوندوشىلار ەرەكشە كوزگە تۇسكەن بولاتىن. بۇل تۋرالى ۇوك ءمالىم ەتتى.

بۇل جارىستا جەرلەستەرىمىز سەگىز مەدالعا قول جەتكىزدى. قۇراما ساپىندا جالعىز التىن مەدالدى ساميرحون اباباكيروۆ يەلەندى. وسىلايشا قازاقستان قۇراماسى ءوز تاريحىنداعى ەڭ ۇزدىك كورسەتكىشىن تىركەدى.

تاەكۆوندو جارىستارى 17-23 شىلدە ارالىعىندا ۇيىمداستىرىلدى. اتالعان سپورت ءتۇرى بويىنشا سايىستار گەرمانيانىڭ ەسسەن قالاسىندا ءوتتى. جالپى ەرلەر، ايەلدەر جانە كوماندالىق، ارالاس كوماندالىق سىندار بويىنشا 24 مەدال جيىنتىعى ساراپقا سالىندى.

قازاقستان قۇراماسى العاشقى كۇننەن-اق ءساتتى ونەر كورسەتتى. ناتيجەسىندە سەگىز مەدالعا قول جەتكىزدى. ونىڭ بىرەۋى التىن. ال قالعانى قولا مەدال.

جەكەلەي سايىستا قولا مەدال يەلەنگەندەر: دامير شۋلەنوۆ (68 كەلىگە دەيىن), نوديرا احمەدوۆا (49 كەلىگە دەيىن), تاميرلان تىلەۋلەس (58 كەلىگە دەيىن), باتىرحان تولەۋعالي (80 كەلىگە دەيىن), بەيبارىس قابلان (87 كەلىدەن جوعارى). كوماندالىق سايىستا ايەلدەر قۇراماسى جارىستىڭ جارتىلاي فينالىنا دەيىن جەتىپ، قولا مەدال ەنشىلەدى. سونىمەن قاتار ارالاس كوماندالار اراسىنداعى ايقاستا دا وتانداستارىمىز جەڭىس تۇعىرىنىڭ ءۇشىنشى ساتىسىنان كورىندى.

ال قۇراماداعى جالعىز التىن مەدالدى 63 كەلىگە دەيىنگى سالماقتا ساميرحون اباباكيروۆ جەڭىپ الدى. قازاقستاندىق تاەكۆوندوشى فينالعا دەيىن جەتىپ، تۇركيا ەلىنىڭ وكىلىن جەڭدى.

وتانداسىمىز جارىستان كەيىن Olympic.kz سايتىنا سۇحبات بەرگەن بولاتىن. ول جارىسقا دەيىنگى دايىندىعى مەن الداعى ماقساتتارى جايلى ايتىپ بەردى.

— 2024 جىلعى وليمپيادادان كەيىن ءوزىمنىڭ جەكە باپكەرىم نۇرسۇلتان ماماەۆپەن بىرگە دايىندالدىم. جالپى دايىندىق جۇمىستارى جاقسى ءوتتى. سونىمەن قاتار بۇعان دەيىن جىبەرگەن قاتەلىكتەردى تالداپ، سولارمەن جۇمىس ىستەدىك، — دەدى سپورتشى.
ودان بولەك، ساميرحون اباباكيروۆ ۋنيۆەرسيادا الدىنداعى تۋرنيرلەرگە نە ۇشىن قاتىسپاعانىن ايتتى.

— ۋنيۆەرسيادا الدىنداعى تۋرنيرلەرگە جاراقاتىما بايلانىستى قاتىسا المادىم. وقۋ-جاتتىعۋ جيىندارىنا دا بارۋعا مۇمكىندىك بولمادى. سوعان قاراماستان جاراقاتىمدى تولىق ەمدەپ، جەكە باپكەرىممەن جوسپارلى تۇردە دايىندىق جۇرگىزدىم. قازىر بارلىعى جاقسى. كىشكەنە ەم-دوم شارالارىن جۇرگىزىپ، ءارى قاراي جاتتىعۋعا كىرىسەتىن بولامىن، — دەپ ءبولىستى ساميرحون اباباكيروۆ.
ەندىگى ۇلتتىق قۇرامانىڭ باستى ماقساتى قىتايدا وتەتىن الەم چەمپيوناتى ەكەنى ءسوزسىز. وسىعان بايلانىستى ۋنيۆەرسيادانىڭ التىن جۇلدەگەرى ساميرحون قازىرگى دەڭگەيى جانە الداعى جوسپارلارى جايلى ايتىپ بەردى.

— 2024 جىلعى وليمپيادامەن سالىستىرعاندا قازىر ءوز-وزىمە دەگەن سەنىمدىلىگىم ارتتى. شىنايى سپورتتىق بابىمدا كەلە جاتىرمىن دەۋگە تولىق نەگىز بار. الداعى باستى ماقساتىم — قىتايدا وتەتىن الەم چەمپيوناتىندا توپ جارۋ. سونىمەن قاتار 2028 جىلعى وليمپيادا ويىندارىندا قازاقستانعا تاريحي التىن مەدال سىيلاۋ، — دەپ قورىتتى ساميرحون اباباكيروۆ.

Abai.kz