قوستانايدا 102 ميلليون تەڭگەنىڭ التىنىن ۇرلاعان قازاقستاندىق ايەل راقىمشىلىققا ءىلىنىپ، جازاسى جەڭىلدەتىلدى.

قوستانايدا "ك" جشس-نىڭ بۇرىنعى بۋحگالتەرى 102 ميلليون تەڭگەدەن استام سوماعا باعالاناتىن التىن بۇيىمداردى ديرەكتوردىڭ سەيفىنەن ۇرلاعانى ءۇشىن سوتتالدى.

بۋحگالتەر ديرەكتورىنىڭ جەكە التىن بۇيىمدارى ساقتالعان سەيفتەن جاسىرىن تۇردە التىنداردى ۇرلاعان. ول قىلمىستىق ارەكەتتەرىنىڭ ناتيجەسىندە جابىرلەنۋشىگە جالپى سوماسى 102 ميلليون تەڭگەدەن اساتىن اسا ءىرى مولشەردە ماتەريالدىق زالال كەلتىرىلگەن.

ديرەكتور بۋحگالتەرگە سەيف ساقتالعان جەرگە ەمىن-ەركىن كىرۋگە مۇمكىندىك بەرگەن. سول سەبەپتى ول ۇرلىقتى كوزگە تۇسپەي جۇزەگە اسىرعان.

ەسەپشى قر قك 188-بابىنىڭ 4-بولىگى 3-تارماعى بويىنشا "اسا ءىرى مولشەردە، زاڭسىز ساقتاۋ ورنىنا ەنۋ ارقىلى جاسالعان ۇرلىق" بويىنشا كىنالى دەپ تانىلدى. تەرگەۋ نۇسقاسى بويىنشا، ول كومپانيا باسشىسىنىڭ سەنىمىن پايدالانىپ، قىزمەتتىك سەيفتە ساقتالعان زەرگەرلىك بۇيىمداردى ۇرلاپ كەتكەن، - دەپ جازىلعان سوت حابارلاماسىندا. 

جابىرلەنۋشى ەسەپشىگە قاتاڭ جازا تاعايىنداۋدى سۇراپ، كەلتىرىلگەن شىعىن ءالى تولىق وتەلمەگەنىن ايتقان. ال مەملەكەتتىك ايىپتاۋشى 6 جىل 3 اي باس بوستاندىعىنان ايىرۋدى سۇرادى.

قر كونستيتۋتسياسىنىڭ 30 جىلدىعىنا وراي جاريالانعان راقىمشىلىق تۋرالى زاڭدى قولدانا وتىرىپ، سوت ر.-عا 4 جىل 9 اي 13 كۇن باس بوستاندىعىنان ايىرۋ جازاسىن تاعايىندادى. جازاسىن ورتاشا قاۋىپسىزدىك دەڭگەيىندەگى تۇزەۋ مەكەمەسىندە وتەيدى، - دەپ حابارلادى قوستاناي وبلىستىق سوتى.

جابىرلەنۋشىنىڭ ازاماتتىق تالاپ-ارىزى ءىشىنارا قاناعاتتاندىرىلدى. ۇرلانعان مۇلىكتىڭ ءبىر بولىگى قايتارىلعان.

ۇكىم ءالى زاڭدى كۇشىنە ەنگەن جوق.