قىتاي بيلىگى بىرنەشە اپتا ىشىندە ءورشىپ بارا جاتقان ماسا ارقىلى تارالاتىن ۆيرۋستىق اۋرۋدىڭ تارالۋىنا جول بەرمەس ءۇشىن شۇعىل شارالار قابىلداپ جاتىر.

ءبىر ايعا جەتپەيتىن ۋاقىتتا چيكۋنگۋنيا دەرتىمەن 8 مىڭعا جۋىق ادام اۋىرعان. ناۋقاستاردىڭ كوپشىلىگى گۋاندۋن پروۆينتسياسىنداعى فوشان قالاسىنان تىركەلگەن. وسىعان بايلانىستى بيلىك پاندەميا كەزىندە ەنگىزىلگەن "نولدىك COVID" ساياساتىنا ۇقساس شارالاردى ەنگىزە باستادى.

بيلىك درونداردى قولدانا وتىرىپ، ماسالار كوبەيەتىن وشاقتاردى انىقتاپ جاتىر.

سونىمەن قاتار، ۆيرۋس تاراتۋشى ماسا ءتۇرىن جوياتىن ء"پىل ماسالارى" اتتى جىرتقىش دەرناسىلدەردى تابيعي ورتاعا جىبەرگەنى تۋرالى حابارلاندى.

چيكۋنگۋنيا ۆيرۋسىن جۇقتىرعاندار ارنايى "وقشاۋلاۋ ايماقتارىندا" نەمەسە اۋرۋحانالاردا جاتقىزىلىپ، توسەك-ورىندارى ارنايى تورلارمەن جابدىقتالعان. ولار ۆيرۋستى انىقتايتىن سىناما تەرىس ناتيجە كورسەتكەننەن كەيىن عانا اۋرۋحانادان شىعارىلادى.

ماسكا تاققان اسكەري قىزمەتكەرلەر ساياباقتار مەن كوشەلەردە زيانكەستەرگە قارسى ءدارى سەۋىپ ءجۇر. ال فوشان كولدەرىنە ۆيرۋس تاراتاتىن دەرناسىلدەردى جەيتىن 5 مىڭنان استام بالىق جىبەرىلگەن.

جەرگىلىكتى باق-تىڭ مالىمەتىنشە، قالا تۇرعىندارىنا بارلىق توقتاپ تۇرعان، تۇرىپ قالعان سۋدى جويۋ تاپسىرىلعان. ال ۋچاسكەلىك قىزمەتكەرلەر ءاربىر ءۇيدى تەكسەرۋگە مىندەتتەلگەن. ءۇي يەلەرى مەن كاسىپورىندار بۇل تالاپقا باعىنباسا، 10 مىڭ يۋانعا دەيىن ايىپپۇل سالىنۋى نەمەسە "جۇقپالى اۋرۋدىڭ الدىن الۋعا كەدەرگى كەلتىرگەنى" ءۇشىن قىلمىستىق جاۋاپكەرشىلىككە تارتىلۋى مۇمكىن.

فوشان قالاسىندا چيكۋنگۋنياعا قارسى دارىلەردى ساتىپ الۋ ءۇشىن ازاماتتار اتى-ءجونىن تىركەۋى مىندەتتەلگەن. ال ەكى قالا ءوز اۋماعىنا قايتىپ كەلگەن تۇرعىندارعا دەنساۋلىعىن باقىلاۋعا الۋدى تاپسىرعان.

ەسكە سالايىق، بۇعان دەيىن ماسا ارقىلى جۇعاتىن ۆيرۋس ءورشىپ,  5,6 ميلليارد ادام قاۋىپ ايماعىندا تۇرعانى حابارلانعان.

قىتايدا قاۋىپتى ۆيرۋس تارالىپ جاتقانى دا ايتىلدى.

Abai.kz