فرانتسيانىڭ ايگىلى Lefigaro گازەتى وتكەن اپتادا وسىنداي تاقىرىپپەن ماقالا جاريالاپ، "جاڭا جىبەك جولى" ايدارىنىڭ ءتورتىنشى ءبولىمىن قازاقستانعا ارناعان.

قورعاس كەدەن بەكەتىن ارالاپ كورگەن گازەت ءتىلشىسى قازاقستان مەن قىتاي ەكى تاراپتىڭ شەكارا ايماعىندا ورنالاسقان حالىق سانىنىڭ الشاقتىعىنا ەرەكشە تاڭدانىس بىلدىرگەن. قىتايدىڭ قورعاس قالاسىنىڭ جان سانى 1 ميلليون ادام دەپ كورسەتىلسە، قازاقستاننىڭ نۇر جولىندا بار بولعانى 5 مىڭ ادام، جالپى جانكەنت ءوڭىرىنىڭ حالىق سانى 140 مىڭ ادام ەكەنى جازىلادى. "قىتاي  مەن قازاقستاننىڭ ورتاق شەكاراسى 1500 شاقىرىمعا جۋىقتايدى، قىتايدىڭ شەكارا وڭىرىندە 25 ميلليوننان استام حالىق تۇرادى، بۇل- بۇكىل قازاقستاننىڭ حالىق سانىنان دا كوپ" دەپ جازادى.

قورعاس كەدەن بەكەتىنەن بۇرىن تاۆار عانا وتسە، ەكى ەل ۆيزاسىز بايلانىستى جولعا قويعاننان كەيىن ادام اعىنىنىڭ توۆار اعىنىنان كەم تۇسپەيتىنىنە كۋا بولعانىن، قازاقستاننىڭ قىتايدىڭ ء"بىر جول، ءبىر بەلدەۋ" جوباسىنداعى ماڭىزدى ەل ەكەنىن، قازاقستاننىڭ 2025- جىلدىڭ العاشقى جارتىسىندا قىتاي تارابىنىڭ 23 ميلليارد دوللار ينۆەستيتسياسىنا قول جەتكىزگەنىن جازادى.

ۋكراينا-رەسەي سوعىسى، ورتا شىعىستاعى تۇراقسىزدىق، ترامپتىڭ ساۋدا سوعىسىنىڭ اسەرىنەن قىتاي ءۇشىن قازاقستاننىڭ ماڭىزى ارتا تۇسكەن. باسىلىم بۇرىنعى پرەزيدەنت نۇرسۇلتان نازارباەۆتى رەسەيشىل دەپ سيپاتتاسا، پرەزيدەنت توقاەۆتىڭ قىتايدا وقىعانىن، جۇمىس ىستەگەنىن العا تارتىپ، ونى قازىرگى كەزدەدەگى الەم جەتەكشىلەرىنىڭ ىشىندە قىتاي توراعاسىمەن ءتىلماشسىز سويلەسە الاتىن جالعىز ادام دەپ سيپاتتاعان.

قىتايدىڭ ورتا ازياداعى ىقپالىنىڭ ارتۋى كرەملدىڭ ۇيقىسىن قاشىرىپ وتىر دەيدى باسىلىم. قازاقستان بيلىگى گەوساياسي تەپە-تەڭدىكتى ساقاۋ ءۇشىن ەل اۋماعىندا سالىناتىن اەس قۇرلىسىن ورىس پەن قىتايدىڭ كومپانياسىنا تابىستاعانىن جازادى. سونىمەن بىرگە قازاقستاندىق ساياساتتانۋشىلاردىڭ پىكىرىن دە بەرۋدى ۇمىتپاعان. ساياساتتانۋشى دوسىم ساتاەۆتىڭ پىكىرىنشە: "قىتاي ورتا ازيامەن بايلانىسىن ءارتاراپتاندىرۋ ءۇشىن وزبەكستانمەن، قىرعىزتانمەن تەمىر جول قاتىناسىن دا دامىتىپ وتىر ەكەن". ال قىتايتانۋشى رۋسلان ءىزىموۆ بولسا: "قۇرىلىق جولىنىڭ تەڭىز جولىنىڭ ورىنىن باسا المايتىنىن، تەڭىز تاسىمالى كەدەرگىگە ۇسشىراسا عانا ماڭىزى ارتاتىنىن" العا تارتقان.

Abai.kz