اق ۇيدە وتكەن تاريحي كەزدەسۋدەن كەيىن ۋكراينا پرەزيدەنتى ۆلاديمير زەلەنسكي مەن رەسەي پرەزيدەنتى ۆلاديمير ءپۋتيننىڭ الدا قايدا كەزدەسەتىنى تۋرالى الەمدىك باق ءجيى جازىپ جاتىر.

وسىنداي ساتتە ءار ەل ءوز الاڭىن ۇسىنىپ، بەيبىتشىلىككە ءبىر قادام قالعان تاريحي وقيعاعا ارالاسقى كەلەتىن سياقتى.

مىسالى، تۇركيا اتالعان كەزدەسۋدىڭ ءوز ەلىندە وتكەنىن قالايدى.

ال فرانتسيا پرەزيدەنتى ەممانۋەل ماكروننىڭ ايتۋىنشا، ۋكراينا پرەزيدەنتى ۆلاديمير زەلەنسكي مەن رەسەي پرەزيدەنتى ۆلاديمير ءپۋتيننىڭ كەزدەسۋى ەۋروپادا ءوتۋى كەرەك. ول كەزدەسۋدى جەنەۆادا وتكىزۋدى ۇسىندى.

سەيسەنبى كۇنى فرانتسۋزدىق «TF1 Info» ارناسىندا كورسەتىلگەن سۇحباتىندا ماكروننان اقش پرەزيدەنتى دونالد ترامپ پەن بىرنەشە ەۋروپالىق مەملەكەت پەن ۇكىمەت باسشىلارىنىڭ ۆاشينگتونداعى كەزدەسۋىنەن كەيىن جاريالانعان بۇل كەزدەسۋدىڭ ەۋروپادا ءوتۋى ءتيىس پە دەگەن سۇراق قويىلعاندا ول: «بۇل جاي عانا بولجام ەمەس، بۇل – ۇجىمدىق ەرىك»، – دەپ جاۋاپ بەردى.

«بۇل بەيتاراپ ەلدە وتەدى، مۇمكىن شۆەيتساريادا، مەن جەنەۆادا ءوتۋىن قولدايمىن، نە بولماسا باسقا ەلدە. سوڭعى رەت ەكىجاقتى كەلىسسوزدەر ىستامبۇلدا بولعان ەدى»، – دەپ ەسكە سالدى ماكرون.

ال دۇيسەنبى كۇنى يتاليا پرەمەر-ءمينيسترى دجوردجا مەلوني كەزدەسۋدى ريمدە وتكىزۋدى ۇسىنعان بولاتىن.

اقش اكىمشىلىگىنىڭ اعا وكىلى «Reuters» اگەنتتىگىنە بەرگەن مالىمەتىنە سايكەس، اق ءۇي جاريالاعان ۋكراينا مەن رەسەي پرەزيدەنتتەرى اراسىنداعى كەلىسسوزدەر ۆەنگريادا ءوتۋى مۇمكىن.

ماسكەۋ ازىرگە مۇنداي كەزدەسۋگە كەلىسكەنىن رەسمي تۇردە جاريالاعان جوق.

18 تامىزدا ۋكراينا پرەزيدەنتى جانە ەۋروپالىق وداقتاستارىمەن كەزدەسكەننەن كەيىن اقش پرەزيدەنتى دونالد ترامپ ۆلاديمير پۋتين مەن ۆلاديمير زەلەنسكيدىڭ بەتپە-بەت كەزدەسۋىنە دايىندىق ءجۇرىپ جاتقانىن مالىمدەدى.

اق ۇيدەگى كەلىسسوزدەرگە قاتىسقان گەرمانيا كانتسلەرى فريدريح مەرتس بۇل كەزدەسۋدىڭ الداعى ەكى اپتا ىشىندە ءوتۋى كۇتىلىپ وتىرعانىن ايتتى.

ۆەنگريا پرەمەر-ءمينيسترى ۆيكتور وربان رەسەيمەن ىنتىماقتاستىقتى جالعاستىرۋعا كۇش سالىپ، ۋكرايناعا اسكەري كومەك كورسەتۋگە قارسى شىقتى. ول ماسكەۋگە بارىپ، پۋتينمەن كەزدەسكەن، سونداي-اق كيەۆكە بارىپ، زەلەنسكيمەن دە كەلىسسوزدەر جۇرگىزگەن.

جاۋلاسقان ەكى ەل باسشىلارى الدا قايدا كەزدەسەتىنى تۋرالى ءالى ناقتى شەشىم جوق.

Abai.kz