قازاقستان ءىرى حالىقارالىق سپورتتىق جارىستاردى قابىلدايتىن ورتالىق رەتىندەگى مارتەبەسىن بارعان سايىن نىقتاي تۇسۋدە.

جىل سايىن ەلىمىزدە بەدەلدى جارىستاردىڭ سانى ارتۋدا. بۇل الەمدىك سپورت قاۋىمداستىعىنىڭ سەنىمىن جانە رەسپۋبليكامىزدىڭ جاھاندىق دەڭگەيدەگى بەدەلىن مويىنداۋدىڭ ايقىن كورىنىسىنە اينالۋدا. 2025–2028 جىلدار ارالىعىندا قازاقستان ونداعان الەم چەمپيوناتتارى مەن كۋبوكتارىن، سونداي-اق ءتۇرلى سپورت تۇرلەرىنەن بىرقاتار ءىرى حالىقارالىق تۋرنيرلەردى وتكىزەدى.

مۇنداي ناتيجەگە مەملەكەت باسشىسىنىڭ تاپسىرمالارى اياسىندا قازاقستان رەسپۋبليكاسىنىڭ تۋريزم جانە سپورت مينيسترلىگىنىڭ جۇيەلى جۇمىسىنىڭ ارقاسىندا قول جەتكىزىلدى. ەل پرەزيدەنتى سپورتتىڭ ۇلتتىق رۋحتى نىعايتۋدا، جاستاردى قولداۋدا، سالاۋاتتى ۇلت قالىپتاستىرۋدا، سونداي-اق ەلدىڭ الەمدىك ارەناداعى وڭ ءيميدجىن ىلگەرىلەتۋدە شەشۋشى ءرول اتقاراتىنىن بىرنەشە رەت اتاپ وتكەن.

2025 جىلدىڭ العاشقى جارتىسىندا قازاقستان بىرقاتار ماڭىزدى جارىستاردى قابىلدادى. اتاپ ايتاتىن بولساق، الماتىدا فريستايل-اكروباتيكا مەن موگۋلدان جاسوسپىرىمدەر اراسىنداعى الەم چەمپيوناتى، استانادا دزيۋدودان «Qazaqstan Barysy Grand Slam» حالىقارالىق ءتۋرنيرى، World Boxing اياسىنداعى بوكستان الەم كۋبوگى، تاەكۆوندودان رەيتينگتىك «Kazakhstan Open» ءتۋرنيرى جانە باسقا دا جارىستار. جىل سوڭىنا دەيىن ەلىمىزدە تاعى ونعا جۋىق ءىرى حالىقارالىق دودالار وتەدى.

2026 جىلى سپورت كۇنتىزبەسىنە ەنگەن شىمكەنتتەگى ستەند اتۋدان ISSF الەم كۋبوگى، استاناداعى جۇزۋدەن الەم كۋبوگىنىڭ كەزەڭى جانە الماتىداعى تاەكۆوندودان فينالدىق گران-پري وتەدى. ال 2027 جىل ەرەكشە مانگە يە بولماق. سەبەبى، قازاقستان دزيۋدو، بوكس، ۇستەل تەننيسى جانە ستەند اتۋدان الەم چەمپيوناتتارىن وتكىزەدى. بۇل وتاندىق سپورتتى دامىتۋدىڭ جاڭا كەزەڭى ءارى حالىقارالىق ىنتىماقتاستىقتى نىعايتۋدىڭ ماڭىزدى قادامى بولماق. 2028 جىلى ەلىمىز تاعى دا ءوز مارتەبەسىن ايقىنداپ، استانادا اۋىر اتلەتيكادان الەم چەمپيوناتىن جانە الماتىدا فريستايلدان الەم كۋبوگىنىڭ كەزەڭىن قابىلدايدى.

«مەملەكەت باسشىسىنىڭ سپورت سالاسىنداعى دايەكتى ساياساتى قازاقستانعا ءىرى الەمدىك تۋرنيرلەردى قابىلداۋ مۇمكىندىگىن بەرىپ وتىر. الەم چەمپيوناتتارى مەن كۋبوكتارىنىڭ حالىقارالىق فەدەراتسيالار اياسىندا ءوتۋى، بۇل ءبىزدىڭ كۇش-جىگەرىمىزدىڭ مويىندالۋى، سپورتتىق ينفراقۇرىلىمدى دامىتۋ، جاڭا بۋىن سپورتشىلاردى تاربيەلەۋ جانە ەلدىڭ حالىقارالىق ءيميدجىن نىعايتۋ. ءبىز الداعى ۋاقىتتا دا قازاقستاننىڭ الەمدىك سپورتتاعى كوشباسشىلار قاتارىنان نىق ورىن الۋى ءۇشىن ەڭبەك ەتە بەرەمىز»، – دەدى قازاقستان رەسپۋبليكاسىنىڭ تۋريزم جانە سپورت ءمينيسترى ەربول مىرزابوسىنوۆ.

ايتا كەتۋ كەرەك، حالىقارالىق جارىستار تەك سپورتتىق جەتىستىكتەردىڭ ارتۋىنا عانا ەمەس، ەل ءۇشىن كەڭ مۇمكىندىكتەر اشۋعا دا ىقپال ەتەدى. ولار وڭىرلىك ينفراقۇرىلىمدى دامىتۋعا سەرپىن بەرەدى، سونداي-اق تۋريستەردى تارتادى، جاڭا ەكونوميكالىق مۇمكىندىكتەر تۋعىزادى جانە جاستاردىڭ سپورتقا دەگەن تۇراقتى قىزىعۋشىلىعىن قالىپتاستىرادى. وسىلايشا، وتكىزىلگەن ءار چەمپيونات سپورت سالاسىنا عانا ەمەس، قازاقستاننىڭ الەۋمەتتىك جانە مادەني دامۋىنا دا قوسىلعان ۇلەس بولىپ تابىلادى.

Abai.kz