ۋكراينا شەشەنباسى رامزان قادىروۆتىڭ زۇلىمدىعىن اشكەرەلەدى:

- رامزان قادىروۆ رەسەي ءۇشىن سوعىسىپ جاتقان شەشەن جاساقتارىنا تىكەلەي بۇيرىق بەرىپ، ۋكراينالىقتاردى مۇلدە تۇتقىنعا الماي، كورگەن جەردە اتىپ تاستاۋدى بۇيىرعان.

ال رەسەي تۇتقىنعا ءتۇسىرىپ، شەشەنستانعا ايدالعان ۋكراينا تۇتقىندارىن اياۋسىز ازاپتاپ، وداردى عيماراتتاردىڭ شاتىرىنا ءتىزىپ قويىپ، دروننان قورعايتىن قالقان ەتكەن، - دەيدى ۋكراينا قاۋىپسىزدىك قىزمەتى.

بۇعان دەيىن BBC باسىلىمى شەشەنستاندى بيلەپ-توستەپ وتىرعان رامزان قادىروۆ پەن ونىڭ اۋلەتىنىڭ مانساپتارى جايلى جازعان ەدى.

رامزاننىڭ ۇلى ادام قادىروۆ ونىڭ مۇراگەرى بولۋى مۇمكىن دەپ ايتىلادى. شەشەنستان مەن رەسەيدە ول الماعان وردەن-مەدال قالماي بارا جاتىر. قازىر ادام قادىروۆ شەشەنستاندا قاۋىپسىزدىك كەڭەسىنىڭ حاتشىسى قىزمەتىن اتقارادى.

رامزاننىڭ ۇلكەن ۇلى احمات قادىروۆ 2024 جىلى دەنە شىنىقتىرۋ جانە سپورت ءمينيسترى قىزمەتىنە تاعايىندالدى. سونىمەن بىرگە «احمات» فۋتبول كلۋبىنىڭ باسشىسى تىزگىنىن قولىنا الدى.

قادىروۆتىڭ ەكىنشى ۇلى زەلىمحان «احمات» جەكپە-جەك كلۋبىنىڭ ديرەكتورى. سونىمەن بىرگە شەشەنستاننىڭ بوكس فەدەراتسياسىنىڭ پرەزيدەنتى.

رامزان قادىروۆتىڭ قىزى ايشات قادىروۆا باستاپقىدا مادەنيەت ءمينيسترىنىڭ ورىنباسارى بولدى، ارتىنشا مينيستر بولىپ تاعايىندالدى. 2023 جىلى قادىروۆتىڭ قىزى شەشەنستان ۇكىمەتىنىڭ توراعا ورىنباسارى قىزمەتىنە تاعايىندالىپ، بيۋدجەتتىڭ باسىم بولىگىن باسقارۋ مۇمكىندىگىنە يە بولدى.

رامزاننىڭ ۇلكەن قىزى، 25 جاستاعى حاديجات قادىروۆا شەشەنستان پرەزيدەنتى اكىمشىلىگىنىڭ باسشى ورىنباسارى قىزمەتىندە وتىر.

قادىروۆ تۋىستارى مەن كۇيەۋ بالالارىن دا جايلى ورىنعا جايعاستىرعان. مىسالى ايشاتتىڭ كۇيەۋى ۆيسحان ماتسۋەۆ اۋىل شارۋاشىلىعى ءمينيسترى، ال حاديجاتتىڭ كۇيەۋى ادام الحانوۆ دەنساۋلىق ساقتاۋ ءمينيسترى قىزمەتىن اتقارادى. قادىروۆتىڭ ءتورتىنشى قىزى تاباريكتىڭ كۇيەۋى رامزان ۆيسمۋرادوۆ جاستار ءىسى بويىنشا مينيسترلىكتى باسقارادى. ساراپشىلار قادىروۆقا قاتىسى بار تۋىستارىنىڭ 80-گە جۋىعى بيلىكتىڭ ءتۇرلى تارماقتارىندا قىزمەت ەتەتىنىن ايتۋدا.

رەسمي اقپارات كوزدەرى رامزان قادىروۆتىڭ 14 بالاسى بارىن ايتادى. ولاردىڭ جەتەۋى كامەلەتتىك جاسقا تولماعاندار. التى بالاسى شەشەنستانداعى ساياسي ومىرگە بەلسەندى تۇردە ارالاسۋدا.

Abai.kz