كەشە قر ءسىم باسشىسى مۇرات نۇرتىلەۋ مەن كاسىپكەر گادجي گادجيەۆ تۇتقىندالدى دەگەن اقپارات الەۋمەتتىك جەلىدە تارادى. اقپارات تاراسىمەن، كۇللى قازاقستان قوعامى ۋلارداي شۋلاسىپ جاتتى.

مۇرات نۇرتىلەۋ ەل ساياساتىنداعى اتى-زاتى بەلگىلى تۇلعالاردىڭ ءبىرى. ءارتۇرلى الەۋمەتتىك ساۋالنامالاردا الدىڭعى وندىقتا اتى اتالاتىن ادام. اسىرەسە، قازىرگىدەي جاھاندىق گەوساياسي تارتىستى كەزەڭدە ەلىمىزدىڭ سىرتقى ساياساتىنداعى بەت-بەينە ادام. مۇنداي كاتەگورياداعى ادامنىڭ «تۇتقىندالعانى» تۋرالى اڭگىمە كىم-كىمدى بولماسىن، ەلەڭ ەتكىزبەي قويماسى انىق.

ال گاپ مىنادا: مۇرات نۇرتىلەۋدىڭ تۇتقىندالعانى تۋرالى اقپارات جالعان بولىپ شىقتى.

ونى قر «جالعان اقپاراتقا قارسى ءىس-قيمىل ورتالىعى» رەسمي تۇردە تەرىستەپ: «جالعان اقپاراتقا قارسى ءىس-قيمىل ورتالىعى حابارلايدى: گۇلنار باجكەنوۆانىڭ ("Orda" جانە "Bazhkenova vs.") رەسۋرستارىندا تاراتىلعان قازاقستان رەسپۋبليكاسىنىڭ سىرتقى ىستەر ءمينيسترى مۇرات نۇرتىلەۋ مەن كاسىپكەر گادجي گادجيەۆتىڭ ۇستالعانى تۋرالى اقپارات شىندىققا جاناسپايدى. ورتالىق رەسمي مالىمدەيدى: ادەيى جالعان اقپارات تاراتۋ قوعامدىق سەنىمگە نۇقسان كەلتىرىپ، بولىپ جاتقان وقيعالارعا بۇرمالانعان كوزقاراس قالىپتاستىرادى. ازاماتتاردى ساق بولۋعا جانە تەك رەسمي، تەكسەرىلگەن دەرەككوزدەرگە سەنۋگە شاقىرامىز. قازاقستان رەسپۋبليكاسىنىڭ زاڭناماسىنا سايكەس، جالعان اقپارات تاراتۋ جانە ونىڭ تارالۋىنا جاردەمدەسۋ ءۇشىن قىلمىستىق جاۋاپكەرشىلىككە دەيىن قاراستىرىلعانىن ەسكە سالامىز»، - دەدى.

قر مادەنيەت جانە اقپارات ءمينيسترى ايدا بالاەۆا دا ءوزىنىڭ الەۋمەتتىك جەلىدەگى پاراقشاسىندا اتالعان اقپاراتتى تەرىستەپ: «كەيبىر رەسمي باق پەن ءانونيمدى تەلەگرام-ارنالاردا مەملەكەتتىك قىزمەتشىلەردىڭ ۇستالۋىنا قاتىستى راستالماعان اقپارات تارالۋدا. اقپارات تاراتقاندا ونىڭ شىنايىلىعىن تەكسەرۋ مىندەتتى. كىناسىزدىك پرەزۋمپتسياسى قاعيداسى جانە جۋرناليستىك ەتيكا بار ەكەنىن ەستەن شىعارماۋ قاجەت. كوبىنە راستالماعان «حايپ قۋعان» دەرەكتەرگە ەرەمىن دەپ، جۋرناليستەر مۇنداي مالىمەت ازاماتتارعا جانە ولاردىڭ جاقىن تۋىستارىنا زيان تيگىزۋى، ار-نامىسى مەن قادىر-قاسيەتىنە نۇقسان كەلتىرۋى، جالا بولىپ شىعۋى مۇمكىن ەكەنىن ەستە ۇستاۋى ءتيىس. ارىپتەستەردى كاسىبي باق پەن جۋرناليستەر ساقتاۋعا ءتيىس مىندەتتەمەلەردى ورىنداۋعا شاقىرامىن. سونداي-اق، جالعان اقپارات تاراتقانى ءۇشىن اكىمشىلىك ءارى قىلمىستىق جاۋاپكەرشىلىك قاراستىرىلعانىن ەسكە سالامىن»، - دەدى.

جالعان اقپارات جارعا جىعادى. زاڭدىق نورمالار قابىلدانعانىمەن، عالامتور كەڭىستىگىندەگى فەيك جاڭالىقتارعا توسقاۋىل قويۋ مۇمكىن بولماي تۇر. جالعان اقپارات ارقىلى حالىق ساناسىن مانيپۋلياتسيالاپ، كوزدەگەن ماقساتىنا جەتۋدى كوكسەيتىن ءارتۇرلى مۇددەلى توپتار دا كوپ. جالعان اقپاراتتىڭ قوعامدىق سانانىڭ دامۋىنا زيانى وراسان. مۇنداي اقپارات تۇرلەرى ادامداردىڭ ساناسىن، بىرىنشىدەن، ۋلايدى، ەكىنشىدەن، اداستىرادى. كريتيكالىق ويلاۋ، مەدياساۋات سەكىلدى تۇسىنىكتەردى ىسىرىپ قويىپ، شىندىققا جاناسپايتىن، جوق نارسەنىڭ شىرماۋىندا كەتەدى. بۇل ماتەريالدىق، مورالدىق شىعىنعا عانا ەمەس، رۋحاني سوقىرلىققا دا الىپ بارۋى عاجاپ ەمەس.

جۋرناليست – ەڭ الدىمەن قوعامدىق پىكىردى قالىپتاستىرۋشى. سوندىقتان جالعان اقپاراتپەن بەلسەندى كۇرەسۋ كەرەك. وسى تۇستا «دەزينفورماتسياعا قارسى كۇرەس ورتالىعىنىڭ» بەلسەندىلىگىن اتاپ ءوتۋ كەرەك.

Abai.kz