قاراعاندى وبلىسىنداعى «سارىشاعان» پوليگونىندا بىرلەسكەن «جاۋىنگەرلىك دوستاستىق – 2025» تاكتيكالىق وقۋ-جاتتىعۋى ءساتتى اياقتالدى. وقۋ-جاتتىعۋدىڭ جاۋىنگەرلىك اتىستاردى قامتىعان شەشۋشى كەزەڭىن ەلىمىزدىڭ قورعانىس ءمينيسترى، قارۋلى كۇشتەر تۇرلەرىنىڭ باس قولباسشىسىلارى، اسكەر تەكتەرىنىڭ قولباسشىلارى تىكەلەي باقىلادى.

بىرلەسكەن مانەۆرلەرگە 1500-دەن استام اسكەري قىزمەتشى، 200-گە جۋىق اسكەري جانە ارنايى تەحنيكا، سونداي-اق 30-دان اسا ۇشۋ اپپاراتتارى جۇمىلدىرىلدى. اۋە تەحنيكاسى قۇرامىندا كوپ ماقساتتى سۋ-30سم جويعىش ۇشاقتارى، سۋ-25 شابۋىلداۋشى ۇشاقتارى مەن ءارتۇرلى تيپتەگى تىكۇشاقتار بولدى.

اۆياتسيا مەن اۋە شابۋىلىنا قارسى قورعانىس اسكەرلەرىنىڭ ۇيلەسىمدى ءىس-قيمىلى بارىسىندا ۇشقىشتار شارتتى قارسىلاستىڭ اۋە شابۋىلىنا قارسى قورعانىس جۇيەسىن بۇزىپ ءوتۋ، جاقىن قاشىقتىقتاعى مانەۆرلىك اۋە شايقاسى، جەرۇستى نىساندارىن جويۋ جانە جاپپاي اۋە سوققىسىن تويتارۋ سەكىلدى تاكتيكالىق ەپيزودتاردى پىسىقتادى.

شارتتى قارسىلاستىڭ راديوتەحنيكالىق بولىمشەلەرىنە بارلاۋ-سوققى جاساۋشى دروندارمەن سوققى بەرىلدى. اۋە بارلاۋى مەن شابۋىل ماقساتىندا SkyLark-1LEX جانە Anka ۇشقىشسىز ۇشۋ اپپاراتتارى قولدانىلدى. ال اۋە شابۋىلىنا قارسى تۇرۋ ءۇشىن س-300پس، س-125, بۋك-م2ە جانە تور-م2ك زەنيتتىك-زىمىران كەشەندەرى پايدالانىلدى.

وقۋ-جاتتىعۋ اياسىندا العاش رەت «اۋە-اۋە» ساناتىنداعى باسقارىلاتىن ر-60م زىمىراندارى ءساتتى سىناقتان ءوتتى. سونىمەن قاتار، اۋە شابۋىلىنا قارسى وپەراتسيا بارىسىندا اسكەري وقۋ ورىندارىنىڭ كۋرسانتتارى قۇراستىرعان درونداردىڭ مۇمكىندىكتەرى كورسەتىلدى. سىناقتار زىمىرانداردىڭ دالدىگى مەن تيىمدىلىگىن، سونداي-اق قازىرگى زامانعى ۇرىسقا اۆياتسيالىق بولىمشەلەردىڭ دايىن ەكەندىگىن دالەلدەدى.

قارسىلاستىڭ ۇشقىشسىز ۇشۋ اپپاراتتارىن باسۋ ءۇشىن «الماز» راديو جانە راديوتەحنيكالىق باقىلاۋ ءارى نىسانا كورسەتۋ كەشەنى، دروندارعا قارسى راديوەلەكتروندىق كۇرەس جۇيەسى – «يانتار»، ۇشقىشسىز اپپاراتتاردىڭ سپۋتنيكتىك ناۆيگاتسياسىن تۇنشىقتىراتىن «مارجان» جۇيەسى، سونداي-اق «گروزا-ر2» جانە «مەرۋەرت» انتيدروندىق قارۋلارى قولدانىلدى.
تومەن جىلدامدىقپەن ۇشاتىن جانە كوزگە ءتۇسۋى قيىن نىسانداردى جويۋدا پزرك «يگلا»، «سترەلا-1م»، «سترەلا-10» جانە «شيلكا» زەنيتتىك كەشەندەرىنىڭ ەسەپتوپتارى ءوز شەبەرلىگىن كورسەتتى.

وقۋ-جاتتىعۋدىڭ جابىلۋ سالتاناتىندا قورعانىس ءمينيسترى جاۋىنگەرلىك دايىندىقتىڭ جوعارى دەڭگەيىن، ەسەپتوپتاردىڭ ۇيلەسىمدى ارەكەتىن اتاپ ءوتتى.

وقۋ-جاتتىعۋدان كەيىن اۆياتسيا گەنەرال-لەيتەنانتى داۋرەن قوسانوۆ سارىشاعان جانە پريوزەرسك گارنيزوندارىنداعى اسكەري بولىمدەرگە بارىپ، كومانديرلەردىڭ ەسەپتەرىن تىڭداپ، اسكەري نىسانداردى ارالادى. قورعانىس ءمينيسترى وقۋ-جاتتىعۋ مىندەتتەرىن ساپالى ورىنداۋ، اسكەري ينفراقۇرىلىم نىساندارىن جۇمىس كۇيىندە ۇستاۋ، قارۋ-جاراق پەن وق-دارىلەردى ساقتاۋ ءتارتىبىن قاتاڭ ساقتاۋ جونىندە ناقتى تاپسىرمالار بەردى.

Abai.kz