قازاقستان پرەزيدەنتى قاسىم-جومارت توقاەۆ حالىققا جولداۋىندا فۋتبول كلۋبتارىن جەكەشەلەندىرۋ جۇمىسىن كۇشەيتۋدى تاپسىردى. سونداي-اق مەملەكەت باسشىسى بەلگىلى كاسىپكەرلەر قازاقستاننىڭ 4 فۋتبول كلۋبىنىڭ يەسى اتانعانىن حابارلادى. سونىمەن قازاقستاندا فۋتبول كلۋبتارىن جەكەشەلەندىرۋ بويىنشا قانداي جۇمىستار ءجۇرىپ جاتىر؟.

"اتىراۋ" جانە "ورداباسى"

باسەكەلەستىكتى قورعاۋ جانە دامىتۋ اگەنتتىگىنىڭ مالىمەتىنشە، جەكەگە بەرۋگە بولاتىن كۆازيمەملەكەتتىك سەكتوردىڭ 475 كاسىپورنىنىڭ ءتىزىمى جاسالدى. ونىڭ ىشىندە 8 فۋتبول كلۋبى دا بار. ولار: "اقتوبە", "استانا", "اتىراۋ", "ورداباسى", "تۇران", "تاراز", "كاسپي" جانە "شاحتيور".

شىمكەنت قالاسىنىڭ دەنە شىنىقتىرۋ جانە سپورت باسقارماسى ازىرگە "ورداباسى" كلۋبىن جەكەشەلەندىرۋ پروتسەسى جۇرگىزىلمەگەنىن، الەۋەتتى ينۆەستورلار تۋرالى اقپارات جوق ەكەنىن ايتتى.

اتىراۋ وبلىسىنىڭ دەنە شىنىقتىرۋ، سپورت جانە تۋريزم باسقارماسى "اتىراۋ" فۋتبول كلۋبىن جەكەشەلەندىرۋدى كوممۋنالدىق مەنشىك جانە مەملەكەتتىك مۇلىك باسقارماسى ۇيىمداستىراتىنىن حابارلادى. قازىر الەۋەتتى ينۆەستورلاردى ىزدەۋ جۇمىسى ءجۇرىپ جاتىر.

بولاشاق ينۆەستورلارعا قويىلاتىن نەگىزگى تالاپتار:

• بالالار مەن جاسوسپىرىمدەر فۋتبولىن دامىتۋ;
• كلۋبتىڭ سپورت ينفراقۇرىلىمىن كەڭەيتۋ جانە جاڭعىرتۋ;
• بىلىكتى جاتتىقتىرۋشىلارمەن قامتاماسىز ەتۋ، شەتەل ماماندارىن تاجىريبە الماسۋعا تارتۋ;
• جەرگىلىكتى سپورتشىلاردى كاسىبي دايىندىقتان وتكىزۋ، كەيىن ەرەسەكتەر قۇراماسىنا قوسۋ;
• يننوۆاتسيالار ەنگىزۋ جانە ايماقتاعى فۋتبولدىڭ جالپى دەڭگەيىن كوتەرۋ;
• قارجى جاعىنان تۇراقتى بولىپ، كلۋبتى دامىتۋعا جەكە قاراجات سالۋعا دايىن بولۋ.

سونىمەن قاتار جەكەشەلەندىرۋ اياسىندا ينۆەستورلارعا الەۋمەتتىك مىندەتتەمەلەر قويىلادى. اتاپ ايتقاندا فۋتبول ورتالىعىن دامىتۋ، ينفراقۇرىلىمدى كەڭەيتۋ، جاتتىقتىرۋشىلار قۇرامىن قولداۋ جانە كوماندانىڭ سپورتتىق ناتيجەلەرىن جاقسارتۋ.

وسى تۇستا "اتىراۋ" كلۋبىن جەكەشەلەندىرۋ 2025-2026 جىلدارى جوسپارلانعانىن ايتا كەتەيىك.

"تۇران"

تۇركىستان وبلىسى اكىمدىگىندە "تۇران" فۋتبول كلۋبىن دامىتۋ ءۇشىن ينۆەستورلاردى تارتۋ ماقساتىندا "قازاتومونەركاسىپ" ۇاك" اق وكىلدەرىمەن كەلىسسوزدەر جۇرگىزىلگەنىن ايتتى.

كومپانيا قازىر ىقتيمال بولاتىن ءارتۇرلى نۇسقالاردى قاراستىرىپ جاتىر، دەسە دە تۇپكىلىكتى شەشىم ازىرگە دايىن ەمەس. قوسىمشا اقپارات كەيىن بەرىلمەك.

سونىمەن بىرگە "ساۋتس-ويل" جشس-نە كلۋبتى دامىتۋعا اتسالىسۋ تۋرالى رەسمي حات جولدانعان.

ينۆەستورلارعا قويىلاتىن تالاپتار:

• قارجى جاعىنان تۇراقتى بولۋ;
• رەسۋرستاردىڭ جەتكىلىكتى بولۋى;
• زاڭدى تۇلعا رەتىندە تىركەلۋ;
• فۋتبولدى نەگىزگى باعىت رەتىندە دامىتۋعا بەيىمدەلۋ.

"قىزىل-جار سك", "جەڭىس", "شاحتيور" جانە "قايسار"

الەۋمەتتىك جەلىدە "قىزىل-جار سك", "جەڭىس", "شاحتيور" جانە "قايسار" كلۋبتارى جەكەشەلەندىرۋ ءۇشىن ينۆەستور تاپقان دەگەن اقپارات تاراعان ەدى.

"قىزىل-جار سك" ءباسپاسوز قىزمەتى سولتۇستىك قازاقستان وبلىسى اكىمدىگى ينۆەستور س.ۆ.كانمەن بىرگە كلۋبتى جەكەگە بەرۋدىڭ مەحانيزمىن دايىنداعانىن حابارلادى.

2026-2028 جىلدارداعى وتپەلى كەزەڭدە كلۋبتى قارجىلاندىرۋ ەكى كوزدەن جۇزەگە اسىرىلادى. بىرەۋى – جەكە ينۆەستيتسيالار، ەكىنشىسى – وبلىستىڭ قولداۋى، – دەلىنگەن حابارلامادا.

ەلوردالىق "جەڭىس" كلۋبى اقپاراتتى تۇسىندىرۋدەن باس تارتسا، قىزىلوردانىڭ "قايسار" كلۋبىندا جەكەشەلەندىرۋ جوسپارى جوق ەكەنىن ايتتى.

قاراعاندى وبلىسى اكىمدىگى "شاحتيور" كلۋبىنا قاتىستى پىكىر ءبىلدىرۋ ءالى ەرتە ەكەنىن، قازىر ول وبلىستىق دەنە شىنىقتىرۋ جانە سپورت باسقارماسىنىڭ قاراماعىندا ەكەنىن جەتكىزدى.

Abai.kz