ليۆان ۇكىمەتى «حەزبوللا» ۇيىمىن قارۋسىزداندىرۋ شەشىمىن قابىلداعان ەدى. اتالعان شەشىمدى جۇزەگە اسىرۋ ليۆان بيلىگى ءۇشىن قيىنعا سوعۋدا. بۇل تۋرالى Mezgil.kz اقپاراتتىق پورتالى جازدى. 

«حەزبوللا» شەشىمدى مويىندامايتىنىن، ءوز ەركىمەن قارۋسىزدانبايتىنىن ايتتى. ساراپشىلار ليۆان ۇكىمەتى مەن «حەزبوللا» اراسىنداعى شيەلەنىس ۋشىقسا، جاعداي قارۋلى قاقتىعىسقا اكەلۋى مۇمكىن دەپ قاۋىپتەنۋدە.

تۇركيالىق Harici سايتى، حەزبوللا ۇيىمىن قارۋسىزداندىرۋ بويىنشا ساراپتاما جاساپ، اقش ۇكىمەتىنىڭ، ليۆان بيلىگىنىڭ قۇجاتتارىنا سۇيەنە وتىرىپ، بىرقاتار سانداردى جاريا ەتتى. رەسەيلىك ساراپشى دەنيس كوركۋدينوۆتىڭ پىكىرىنشە، «حەزبوللانى» قارۋسىزداندىرۋعا بىرنەشە ملرد دوللار قارجى ءبولىنۋى مۇمكىن. قارجىنىڭ 70 پايىزى گۋمانيتارلىق-ەكونوميكالىق ماقساتتا قولدانىلسا، 17 پايىزى اسكەري ماقساتتا قولدانىلماق. ال قالعان بولىگى قوسىمشا رەزەرۆ رەتىندە قاراستىرىلعان.

ليۆان بيلىگى باتىستىق وداقتاستارىنان قارجى الىپ، الەۋمەتتىك-ەكونوميكالىق رەفورمالار جۇرگىزۋدى ويلاستىرۋدا. بەيرۋت «حەزبوللانى» قارۋسىزداندىرىپ قانا قويماي، اتالعان ۇيىمعا قارجى تابۋ ءۇشىن مۇشە بولعىسى كەلەتىن جاستاردىڭ سانىن دا ازايتۋدى قالايدى. ول ءۇشىن ليۆاننىڭ وڭتۇستىگىندە الەۋمەتتىك-ەكونوميكالىق رەفورمالار جۇرگىزۋ قاجەت. بيلىكتىڭ شەشىمىن ناسيحاتتاۋ ءۇشىن ۆيدەو-كونتەنتتەر دە ازىرلەنەتىن بولادى.

اقپارات كوزدەرى 2025 جىلدىڭ، 15-قاراشاسىنا دەيىن ليۆاننىڭ بەس ايماعىندا «حەزبوللانىڭ» قارۋىن جينايتىن ورتالىقتار اشىلاتىنىن جازۋدا. اتالمىش ورتالىقتىڭ كۇزەتىن ليۆان اسكەرى مەن اقش-تىڭ ارنايى جاساقتارى كۇزەتۋى ىقتيمال. قازىرگى ساتتە بۇل بويىنشا بەيرۋت پەن ۆاشينگتون كەلىسسوز وتكىزۋدە. «حەزبوللا» جاساقتارىنا قارۋدى ءوز ەركىمەن بەرىپ، قارجى تابۋ مۇمكىندىگى ۇسىنىلۋى مۇمكىن. اۋىر ارتيللەريا، زەڭبىرەك نەمەسە زىمىران ءۇشىن 20 مىڭ دوللار، اتىس قارۋى ءۇشىن 5 مىڭ دوللار وتەماقى بەرىلۋى دە عاجاپ ەمەس دەيدى ماماندار.

باعدارلاما «التىن قالقان» اتتى اتاۋعا يە بولماق. اتالعان اقپاراتتى جاريا ەتكەن Harici باسىلىمى اقپاراتتىڭ پەنتاگونمەن بايلانىسى بار دەرەككوزدەردەن الىنعانىن ايتتى.

قازىرگى ساتتە اقش بيلىگى ساۋد ارابياسى، كاتار جانە ءباا-مەن كەلىسسوز جۇرگىزۋدە. ۆاشينگتون اتالعان مەملەكەتتەر وڭتۇستىك ليۆاندى قالپىنا كەلتىرۋگە ينۆەستيتسيا قۇيۋى قاجەت دەيدى.

ال «حەزبوللا» بۇل اقپاراتتاردى جوققا شىعاردى. ۇيىم باسشىسى كاسەم نايم «حەزبوللا» جاساقتارى قارۋىن تاستامايتىنىن ايتتى.

Abai.kz