وتاندىق ءونىم قازىردىڭ وزىندە Amazon جانە Walmart ونلاين پلاتفورمالارىندا ساتىلۋدا. العاشقى 50 توننا بيداي ۇنى نيۋ-يورككە جەتكىزىلىپ، Eurasian Legacy برەندىمەن تۇتىنۋشىلارعا ۇسىنىلدى.

بۇل – اقش-تا ۇلتتىق تاۋارىمىزدى ساتۋدىڭ جاڭا ستراتەگياسى اياسىندا جۇزەگە اسقان العاشقى ءىرى ەكسپورتتىق جوبا. الداعى ۋاقىتتا QazTrade قولداۋىمەن اي سايىنعى جەتكىزىلىم كولەمىن 100 توننادان اسىرۋ كوزدەلىپ وتىر، - دەپ حابارلادى ساۋدا مينيسترلىگى.

Amazon-داعى قازاق ۇنىنىڭ باعاسى – 1,36 كەلى قاپتاماسى ءۇشىن $14,50. قاپتامادا «Product of Kazakhstan» دەگەن بەلگى بار. ونلاين ساۋدادان بولەك، قازىر قازاقستاندىق ۇندى مەيرامحانالارعا، كوفەحانالارعا جانە جەرگىلىكتى اسحانالارعا جەتكىزۋ جونىندە كەلىسسوزدەر جۇرگىزىلۋدە. سونىمەن بىرگە، اقش-تىڭ ءىرى ساۋدا جەلىلەرى – Costco, Whole Foods جانە Trader Joe’s دۇكەندەرىنە شىعۋ مۇمكىندىگى دە قاراستىرىلىپ جاتىر.

ءبىز ۇنمەن عانا توقتاپ قالمايمىز. قاراقۇمىق، گرانولا، تالقان، شوكولاد پەن كاكاونى دا تانىستىردىق. نيۋ-يورك، چيكاگو جانە ۆاشينگتونداعى سەرىكتەستەرىمىز بۇل ونىمدەردىڭ ساپاسىن كوردى. امەريكانىڭ نارىعىنا شىعۋ شىلدە ايىندا ۆاشينگتوندا QazTrade كەڭسەسى اشىلعاننان كەيىن مۇمكىن بولدى، - دەدى QazTrade باس ديرەكتورى ايتمۇحاممەد الداجاروۆ.

QazTrade – قر ساۋدا جانە ينتەگراتسيا مينيسترلىگى جانىنداعى ەكسپورتتى دامىتۋعا جاۋاپتى بىرىڭعاي وپەراتور.

Abai.kz