بۇۇ باس اسسامبلەياسىنىڭ 80-ءشى سەسسياسى الاڭىندا قاسىم-جومارت توقاەۆ ۆلاديمير زەلەنسكيمەن كەزدەستى. كەزدەسۋ ۋكراينا تارابىنىڭ سۇراۋى بويىنشا ۇيىمداستىرىلعان. كەڭەس شەكپەنىنەن شىققان ەكى ەلدىڭ باسشىلارى ورىس تىلىندە ەمەس، اعىلشىن تىلىندە اڭگىمە وتكىزگەن.

اقوردانىڭ تاراتقان مالىمەتىندە: «مەملەكەتتەر باسشىلارى ەكىجاقتى ەكونوميكالىق جانە گۋمانيتارلىق ىنتىماقتاستىق ماسەلەلەرىن تالقىلادى.

ۆلاديمير زەلەنسكي ۋكرايناداعى جاعدايعا بايلانىستى كوزقاراسىن جەتكىزدى.

قازاقستان پرەزيدەنتى وسىناۋ اسا كۇردەلى احۋالعا قاتىستى پىكىر ءبىلدىرىپ، قاقتىعىستى توقتاتۋ ماقساتىندا ديپلوماتيالىق جۇمىستاردى جالعاستىرۋ قاجەت ەكەنىنە نازار اۋداردى»، - دەلىنگەن.

ۋكراينا باسشىسى ۆلاديمير زەلەنسكي مەملەكەت باسشىسى قاسىم-جومارت توقاەۆپەن كەزدەسۋدەن كەيىن ح الەۋمەتتىك جەلىسىندەگى پاراقشاسىندا جازبا جاريالاعان.

وندا: «ءبىز ۋكراينانىڭ، اقش-تىڭ، ەۋروپانىڭ جانە الەمنىڭ باسقا سەرىكتەستەرىنىڭ سوعىستى توقتاتۋ جانە قانتوگىستى دوعارۋ جونىندەگى كۇش-جىگەرىن ەگجەي-تەگجەيلى تالقىلادىق. سونداي-اق ساۋدا-ەكونوميكالىق ىنتىماقتاستىق پەن قازاقستاندىق كومپانيالاردىڭ ۋكراينانى قالپىنا كەلتىرۋگە قاتىسۋعا قىزىعۋشىلىعىنا توقتالدىق», – دەي كەلە ۋكراينا پرەزيدەنتى قازاقستانعا ەلدىڭ ەگەمەندىگى مەن اۋماقتىق تۇتاستىعىن قولداعانى ءۇشىن العىسىن جەتكىزگەن.

ورىس اسكەرى ۋكرايناعا باسىپ كىرگەن 2022 جىلدىڭ 24 اقپاننان بەرى قاراي قازاقستاننىڭ ۋكراينا تاعدىرى تالقىعا تۇسكەن الەمدىك باسقوسۋلاردا رەسەيدىڭ شاپقىنشىلىعىن قولداماي، بەيتاراپ پوزيتسيا ۇستانىپ كەلە جاتقانى بەلگىلى.

پرەزيدەنت توقاەۆ سانكت-پەتەربۋركتە وتكەن ەكونوميكالىق فورۋمدا ءپۋتيننىڭ كوزىنشە كرەمل وزىنە قوسىپ العان ءتورت وبلىستىڭ ەگەمەندىگىن مويىنداۋدان باس تارتقانى دا ەل ەسىندە. رەسەي سىرتقى ىستەر ءمينيسترى لاۆروۆ ونى ءالى كۇنگە ۇمىتا الماي، بيىل قايتا تالقىعا سالعانى دا جۇرتقا ايان.

Abai.kz