ەرتەڭ، ياعني 30 قىركۇيەكتە الماتىنىڭ ورتالىق ستاديونىندا چەمپيوندار ليگاسىنىڭ كەزەكتى ماتچى وتەدى. «قايرات» فۋتبول كومانداسى اتاقتى «رەال» (مادريد، يسپانيا) فۋتبولشىلارىمەن كەزدەسەدى. قوناقتار كەشە ءتۇن ورتاسىندا الماتىعا ۇشىپ كەلىپ، ستاديونعا تاياۋ ورنالاسقان InterContinental Almaty قوناقۇيىنە ورنالاستى.

يسپان كلۋبىن «اتاقتى» دەۋىمىز جاي ءسوز ەمەس، ولاردىڭ داڭق-دارەجەسى راسىندا دا تاڭقالارلىقتاي. سوناۋ 1902 جىلى قۇرىلعان كوماندا – راسىندا دا الەمدەگى ەڭ تانىمال، ەڭ جەڭىمپاز، ەڭ جۇلدەسى كوپ فۋتبول ۇجىمى. «رەال» 36 رەت يسپانيا چەمپيونى اتانعان، 20 رەت ەل كۋبوگىن، 13 رەت ەل سۋپەركۋبوگىن جەڭىپ العان. ۋەفا چەمپيوندار ليگاسىنىڭ 15 دۇركىن جەڭىمپازى (1956, 1957, 1968, 1959, 1960, 1966, 1998, 2000, 2002, 2014, 2016, 2017, 2018, 2022, 2024). فيفا  مادريدتىك سۋپەركلۋبتى «حح عاسىردىڭ ۇزدىك كومانداسى» دەپ تانىدى. «رەال» قازىر دە ۋەفا رەيتينگىندە 1-ورىندا تۇر.

سۋرەت: fondoruso.ru سايتىنان الىندى.

ارينە، مۇنداي قارسىلاستان ۇپاي جىرىپ الۋدىڭ ءوزى «قايرات» كومانداسىنا وڭايعا سوقپاسى انىق. ءتىپتى قازاق جانكۇيەرلەرىنىڭ اراسىندا «ايتەۋىر ماسقارا بولماي، ابىرويمەن جەڭىلسەك تە جامان بولماس ەدى» دەگەن كوڭىل كۇيدىڭ باسىم ەكەنى دە جاسىرىن ەمەس.

«رەالدى» الەم ءباسپاسوزى ءتۇرلى اتاۋمەن اتاي بەرەدى. سونىڭ ىشىندە «كىلەگەيلىلەر» (ورىسشا «سليۆوچنىە»، يسپانشا «Los Merengues») دەگەن اتاۋ ءجيى كەزدەسەدى. مۇنىڭ سىرى نەدە؟

الدىمەن جالپى يسپان فۋتبول كوماندالارىنىڭ لاقاپ اتتارىنا شولۋ جاساپ كورەيىك.

يسپانيا قۇراماسىنىڭ لاقاپ اتى «فۋريا روحا» (La Furia Roja) ەكەنىنەن حاباردار شىعارسىزدار. ياعني «قىزىل فۋريا». فۋريا – كونە ريم ميفولوگياسىنداعى كەك ءتاڭىرياسى (بوگينيا مەستي). يسپان فۋتبول كومانداسىنىڭ «مىنەزىنە» وراي سولاي اتالىپ كەتكەن.

«بارسەلونانى» كيىمىنىڭ تۇسىنە قاراي «بلاۋگراناس» (كاتالونشا) نەمەسە «اسۋلگراناس» (يسپانشا) دەپ اتايدى: كاتالونشا «بلاۋ» جانە يسپانشا «اسۋل» – «كوك» دەگەن ءسوز، ال «گرانا» – «انار» جەمىسىنىڭ (گرانات) ءتۇسىن بىلدىرەتىن ۇعىم.

«ۆالەنسيا» كومانداسىن «Murcielagos» (Mۋرسەلاگوس), ياعني «جارقاناتتار» (لەتۋچيە مىشي) دەيتىن سەبەبى – بۇل تۇنگى قۇس كوماندانىڭ گەربىندە بار. جارقانات جالپى ۆالەنسيا ايماعىنىڭ سيمۆولى سانالادى. اڭىز بويىنشا، ءحىىى عاسىردا كەزەكتى شايقاس الدىندا ۆالەنسيا مەن كاتالونيا ءوڭىرىن اراب جاۋلاۋشىلارىنان قورعاعان ءى حايمە قولباسشىنىڭ دۋلىعاسىنا ءبىر جارقانات كەپ جاربيىپ قونا قالىپتى. سول شايقاس بۇلار ءۇشىن تابىستى ءوتىپ، حايمەنىڭ اسكەرى جاۋلاۋشىلاردى ويسىراتا جەڭگەن ەكەن. «بىزگە وسى جارقانات ساتتىلىك اكەلدى» دەپ ۇعىنعان جۇرت سودان بەرى جارقاناتتى اۋليە تۇتپاسا دا، كادىمگىدەي اسپەتتەيتىن بولىپتى.

بيلباونىڭ «اتلەتيك» كومانداسىن جۇرت «ارىستاندار» دەپ اتايدى. سەبەبى – باسك حالقىنىڭ باتىرى مامەستى حريستيان دىنىنە وتكەنى ءۇشىن راديكال ماجۋسيلەر قازىلعان ورداعى اش ارىستانداردىڭ اۋزىنا تاستاپ ولتىرگەن. ونى جۇرت «ارىستان جۇرەكتى مامەس» دەپ ءپىر تۇتقان. بيلباوداعى ستاديون قازىر «سان مامەس» (اۋليە مامەس) دەپ اتالادى.

«اتلەتيكو ءمادريدتىڭ» ەكى لاقاپ اتى بار. ءبىرى – «ماتراسشىلار» (نەمەسە «ماتراس كيۋشىلەر»). ويتكەنى حح عاسىردىڭ باسىندا ءبىراز ۋاقىت قارجىلىق قيىندىققا ۇشىراعان كوماندا قوجايىندارى فۋتبولشىلارعا فورمانى ەڭ ارزان ماتادان – بىلايعى جۇرت توسەك-ورىندارىن (ماتراستارىن) قاپتايتىن اق-قىزىل ءتۇستى ماتادان تىگىپتى. سودان Los Colchoneros (ماتراسشىلار) دەگەن ات بۇلارعا كۇيەدەي جابىسقان. ايتپەسە يسپانيادا «اتلەتيكونى» Rojiblancos, ياعني «قىزىل-اق كيىمدىلەر» («روحو» – «قىزىل»، «بلانكو» – «اق») دەپ تە اتاي بەرەدى.

«اتلەتيكونىڭ» تاعى ءبىر لاقاپ اتى – «ۇندىستەر» (يندەيتسى، indios). بىراق بۇلاي اتايتىندار «اتلەتتەردىڭ» اتا جاۋى – «رەالدىقتار». 1973 جىلى «اتلەتيكو» ارگەنتينانىڭ ءۇش لەگيونەرىن ساتىپ الدى – رۋبەن دياس، رۋبەن ايالا جانە رامون ەرەديا. ءبىر قىزىعى، ۇشەۋى دە ءۇندىس تايپالارىنىڭ ۇرپاقتارى بولسا كەرەك، تۇرلەرى باياعى چينگاچگۋك پەن وتسەولادان اۋمايتىندار ەكەن. سودان «رەال» جانكۇيەرلەرى بۇل كومانداعا «ۇندىستەر» دەگەن لاقاپ ات تاقتى. قازىر دە «اتلەتيكودا» وڭتۇستىك امەريكادان شىققان ويىنشىلار از ەمەس.

«ۆيلياررەال» كومانداسىن جۇرتتىڭ ءبارى Submarino Amarillo («سارى سۇڭگۋىر قايىق»، «جەلتايا سۋبمارينا») دەپ اتايدى. بىراق بۇل اتاۋ ءاۋ باستا «كاديس» كومانداسىنىڭ لاقاپ اتى بولعان. 1966 جىلى ايگىلى «بيتلز» توبىنىڭ «Yellow Submarine» اتتى ءانى سۇمدىق حيت بولعانى بەلگىلى. الەمنىڭ بۇكىل ەلىن ارالاعان «بيتلز» يسپانياعا دا گاسترولمەن كەلىپ، كاديس قالاسىندا ءبىراز ايالداپ، كونتسەرت بەرگەن. «كاديستىڭ» فورماسى دا سارى ءتۇستى بولعان سوڭ، جەرگىلىكتى جانكۇيەرلەر وزدەرىنىڭ سۇيىكتى فۋتبول كومانداسىن ايگىلى ءاننىڭ اتاۋىمەن اتاي باستاعان. كەيىن، ءححى عاسىردا «كاديستەن» گورى سارى فورمالى تاعى ءبىر كلۋب – «ۆيلياررەالدىڭ» اتى شىعىپ كەتتى دە، «Submarino Amarillo» اتاۋى وسى كومانداعا جابىستى. «كاديس» تىلەۋلەستەرى بۇل اتاۋدى «ۆيلياررەالدان» ءالى دە قىزعاناتىن كورىنەدى.

سۋرەت: sport25.pro سايتىنان الىندى.

ال «رەال ءمادريدتى» – نەگە «كىلەگەيلىلەر» (ورىسشا «سليۆوچنىە»، يسپانشا «Los Merengues») دەيدى؟ «ەل مەرەنگە» (El merengue) دەگەنىمىز – قانت پەن جۇمىرتقانىڭ اعىن قوسىپ جاسايتىن كوپىرشىگەن اق كىلەگەي. يسپاندىقتاردىڭ سۇيىكتى اسىنىڭ ءبىرى. «رەالدىڭ» فورماسى – تۇتاستاي اق بولعاسىن سول كىلەگەيگە تەڭەپ، سولاي اتاپ كەتكەن. «Los blancos» دەپ تە اتايتىنى سوندىقتان («بلانكو» – جوعارىدا ايتقانىمىزداي، يسپانشا «اق» دەگەن ءسوز).

«رەال» دەگەن اتاۋدىڭ ءوزى، كەيبىرىمىز ويلاعانداي، «رەالدى» («رەالنىي») دەگەننەن شىقپاعان. يسپانشا rey (رەي) – «كورول» دەگەن ءسوز. يسپان كورولىنىڭ قامقورلىعىمەن قۇرىلعان كوماندا بولعاسىن سولاي اتاعان. يسپانيادا بۇل داڭقتى كوماندانى، نەگىزى، ەشكىم دە «رەال» دەمەيدى، «مادريد» دەيدى. ويتكەنى بۇل ەلدە «رەال» دەگەندەر جەتىپ ارتىلادى: «رەال بەتيس»، «رەال ساراگوسا»، «رەال سوسەداد»، ت.ب. ءبىر-بىرىنەن اجىراتۋ ءۇشىن كوبىنەسە قالا اتتارىمەن اتايدى.

«قايرات» ەرتەڭ «كوپىرشىگەن اق كىلەگەيگە» مەلدەكتەپ تويا ما، الدە سول «كىلەگەيدىڭ ورتاسىندا مالتىعا باتپاقتاپ»، ماسقارا بولا ما؟

فۋتبول كورەيىك.

سۋرەت: قازسپورت ارناسىنان الىندى.

ساكەن سىبانباي

Abai.kz