جەتىسۋ وبلىسىندا قارتتار كۇنىنە وراي ۇلى وتان سوعىسىنىڭ جالعىز ارداگەرى ىسقاق قۇسايىنوۆقا ارنايى قۇرمەت كورسەتىلدى. وبلىس اكىمىنىڭ اتىنان ارداگەردى وبلىس اكىمىنىڭ ورىنباسارى دياس ەسداۋلەتوۆ پەن وبلىستىق ارداگەرلەر كەڭەسىنىڭ توراعاسى ەرمەك كەلەمسەيىت قۇتتىقتادى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

https://www.gov.kz/

ارداگەرمەن اڭگىمەلەسىپ، مەرەكەمەن قۇتتىقتاعان دياس راحمەتۇلى مەن ەرمەك ءابىلماجىنۇلى قۇرمەتتى قارياعا ۇلى جەڭىستىڭ 80 جىلدىعىنا وراي شىعارىلعان «ۇرپاققا ۇران بولعان ۇلى جەڭىس» كىتابىن، گۇل شوعىن جانە ازىق-تۇلىك سەبەتىن سىيعا تارتتى. 101 جاستاعى ارداگەر وزىنە كورسەتىلگەن قۇرمەتكە ريزاشىلىق ءبىلدىرىپ، اق باتاسىن ارنادى.

ىسقاق ابىلپەيىسۇلى قۇسايىنوۆ 1924 جىلى الاكول اۋدانىنداعى كولباي اۋىلىندا دۇنيەگە كەلگەن. مايدانعا 1942 جىلى ءوزى سۇرانىپ اتتانعان. امۋر اسكەري-تەڭىز فلوتىنداعى «زەنيت» ديۆيزياسىندا فاشيست باسقىنشىلارىنا قارسى سوعىسقان ارداگەر «اسكەري-تەڭىز فلوتىنىڭ ۇزدىگى» اتاعىن العان. جاپون سوعىسىنا قاتىسقاننان كەيىن تۋعان جەرگە ورالىپ، پەدۋچيليششەدە ءبىلىم الىپ، ەكپىندى اۋىلىنداعى مەكتەپكە مۇعالىم بولىپ جۇمىس ىستەيدى. كەيىننەن سول مەكتەپتىڭ ديرەكتورى بولدى. ءبىلىم سالاسىنا 40 جىلىن سارپ ەتكەن ۇستاز – مەكتەپ وقۋشىلارىنا ارنالعان بىرنەشە وقۋلىقتىڭ اۆتورى. مايدانداعى ەرلىگى ءۇشىن ءىى دارەجەلى وتان وردەنىمەن ماراپاتتالعان ارداگەر – ەڭبەك قىزىل تۋ وردەنىنىڭ جانە باسقا دا مەدالدارمەن مەن ماراپاتتاردىڭ يەسى. بەيبىت كۇندە «ەرەن ەڭبەگى ءۇشىن» مەدالىن كەۋدەسىنە قاداعان.

ايتا كەتەيىك، بيىل «BATYR MAN» جوباسىنىڭ اياسىندا ەكىنشى دۇنيەجۇزىلىك سوعىستىڭ ارداگەرى ىسقاق قۇسايىنوۆ تۋرالى جەكە كىتاپ جارىق كورگەن بولاتىن. تۋىندىنى وبلىستىق جاستار رەسۋرستىق ورتالىعىنىڭ قىزمەتكەرلەرى دايىندادى.

Abai.kz