سيريادا جەكسەنبى كۇنى پارلامەنتتىك سايلاۋ ءوتتى. ساياسي ناۋقان تىكەلەي ەمەس سايلاۋ قۇقىعى نەگىزىندە ءوتتى، ياعني سايلاۋ كوللەگياسىنىڭ مۇشەلەرى داۋىس بەرگەن.

ونىڭ ناتيجەسى ءبىر-ەكى كۇن ىشىندە بەلگىلى بولادى. ءبىر پالاتالى حالىقتىق كەڭەسكە بارلىعى 210 دەپۋتات سايلانادى. ولاردىڭ ۇشتەن ءبىرىن ەلدىڭ قازىرگى پرەزيدەنتى احمەد اش-شاراا تاعايىندايدى. قالعان دەپۋتاتتاردى سايلاۋ القاسى قۇرعان وڭىرلىك كوميتەتتەر انىقتايدى.

32 دەپۋتاتتىق ورىن بوس قالىپ وتىر. سەبەبى ءۇش پروۆينتسيادا سايلاۋ قاۋىپسىزدىككە بايلانىستى كەيىنگە قالدىرىلعان. ماسەلەن، ەس-سۋۆايدادا شىلدە ايىندا درۋزدار مەن بەدۋيندەر اراسىندا قاقتىعىستار بولدى. ال ەل-حاساكا مەن ەر-راككا ايماقتارى كۇردتەردىڭ «سيريا دەموكراتيالىق كۇشتەرىنىڭ» ءىشىنارا باقىلاۋىندا قالدى.

سايلاۋعا قاتىسۋ ءۇشىن بارلىعى 1578 ادام تىركەلگەن، ۇمىتكەرلەردىڭ تەك 14 پايىزى عانا ايەلدەر.

Abai.kz