بۇگىنگى كۇن سەمەي تاريحىنداعى جاڭا بەلەس.

12 قازان سەمەيلىكتەر ءۇشىن تاريحي داتا. كۇن شىقپاي جاتىپ سايلاۋ ۋچاسكەلەرىنىڭ الدىنا اعىلعان جۇرتتىڭ قيمىلىنان-اق بۇل كۇننىڭ قاراپايىم ەمەس ەكەنى بايقالدى.

ۇيىمداستىرۋشىلاردان الىندى

بۇگىن قالا تۇرعىندارى ءوز اكىمىن العاش رەت تىكەلەي داۋىس بەرۋ ارقىلى تاڭداۋدا.

ولار ءۇشىن تاڭعى ساعات 07:00-دە قالاداعى بارلىعى 128 سايلاۋ ۋچاسكەسى ەسىگىن ايقارا اشتى. ولاردىڭ ىشىندە 110-ى اشىق، ال 18-ءى جابىق ۋچاسكە، ياعني اۋرۋحانا، اسكەري ءبولىم سەكىلدى ازاماتتار ۋاقىتشا تۇرىپ جاتقان ورىنداردا ۇيىمداستىرىلعان.

قالانىڭ سايلاۋ كوميسسيالارىندا 929 ادام جۇمىس ىستەسە، 220 761 سايلاۋشى ءوز تاڭداۋىن جاساۋعا قۇقىلى.

تاڭمەن كەلگەن سايلاۋشىلاردىڭ جۇزىندە جاۋاپكەرشىلىك پەن ءۇمىت. قارتتار مەن جاستار يىق تىرەستىرىپ، ءبىر ماقساتتى كوزدەگەن قالىڭ جۇرت قالانىڭ بولاشاعى ءۇشىن داۋىس بەرۋگە اسىقتى.

“بۇگىن اۋانىڭ ءوزى ەرەكشە”، دەيدى زەينەتكەر راحيماش مۋسينوۆا.  ء“وزىم ەلۋ جىل سەمەيدە تۇرامىن. قانشا جىلدار بويى كەيىنگە شەگەرىلگەن دۇنيەلەردىڭ سوڭعى جىلدارى بىرىنەن سوڭ ءبىرى شەشىلىپ جاتقانىن كورەمىن-اۋ دەگەن ءۇمىت تە بولماعان ەدى… بىراق جاقسىلىقتىڭ جارشىسى بولىپ، جاڭا باستاماعا ءوزىمىز سەبەپكەر بولىپ، سايلاۋعا قاتىسىپ جاتىرمىز. ءبىز كوپ جىل بويى وسىنداي ءادىل سايلاۋدى كۇتكەنبىز”، - دەيدى زەينەتكەر.

وسى ءبىر تاريحي كۇنى كەيبىر ۋچاسكەلەردە سايلاۋشىلاردى جىلى شىرايمەن قارسى الىپ، باۋىرساق پەن شاي ۇسىنعان تۇرعىندار دا بار. ال ەرتە كەلگەن العاشقى داۋىس بەرۋشىلەرگە ەستەلىك سىيلىقتار تابىستالدى.

تاريحي ناۋقانعا ەل اعالارى دا ءۇن قوستى. مادەنيەت قايراتكەرى قۇسمىليا نۇرقاسىم تاڭعى ۋاقىتتا كەلىپ، ءوز تاڭداۋىن جاسادى.

“بۇل سايلاۋ ەلىمىزدىڭ دەموكراتيالىق دامۋىنداعى ايرىقشا كەزەڭ. اسىرەسە جاستاردىڭ بەلسەندىلىگى قۋانتادى. ولاردىڭ وتانسۇيگىشتىگى مەن جاۋاپكەرشىلىگى ەلدىڭ بولاشاعىنا دەگەن سەنىمدى نىعايتادى”، -دەدى ول.

سايلاۋ دوداسىندا ءۇش كانديدات باق سىناۋدا. ولار: گەودەزيا، كارتوگرافيا جانە قۇرىلىس كوللەدجىنىڭ ديرەكتورى قانىش تولەۋوۆ، اباي وبلىسى كوكپەكتى اۋدانىنىڭ اكىمى ادىلەت قوجانباەۆ جانە سەمەي تۇرعىنى، بۇرىنعى ءىىب قىزمەتكەرى ايبولات بەكجاساروۆ.

ءاربىرى سايلاۋالدى باعدارلاماسىندا قالانىڭ ينفراقۇرىلىمىن جاقسارتۋ، جاستاردى قولداۋ جانە الەۋمەتتىك سالانى دامىتۋ باعىتتارىن ۇسىندى.

اباي وبلىسىنىڭ اكىمى بەرىك ءۋالي دە سەمەي حالقىمەن بىرگە سايلاۋ ۋچاسكەسىنە كەلىپ، ءوز تاڭداۋىن جاسادى. ول №93 ۋچاسكەدە داۋىس بەرىپ، جۋرناليستەرگە قىسقاشا پىكىر ءبىلدىردى.

“بۇگىن سەمەي ءۇشىن تاريحي كۇن. حالىقتىڭ بەلسەندىلىگى ەلدىڭ ساياسي مادەنيەتىنىڭ وسكەنىن كورسەتەدى. سەمەيلىكتەر ءوز قالاسىنىڭ تاعدىرىنا بەيجاي قارامايتىنىن دالەلدەپ وتىر”، - دەدى ايماق باسشىسى.

كۇن سايىن جاڭارىپ، وركەندەپ كەلە جاتقان سەمەيدىڭ تاعدىرى ەندى ءوز حالقىنىڭ قولىندا.

حالىق جۇزىندە ءبىر عانا سەزىم بايقالادى - سەنىم.

Abai.kz