كەشە ءماجىلىس وتىرىسىندا ايتىس ساحناسىنان پارلامەنت پارتاسىنا جايعاسقان دەپۋتات امانجول التاەۆ پەن كتج وكىلى دايىر كوشەروۆ نەگىزگى ماسەلە - استىق تاسىمالى تۋرالى ەمەس، اتا زاڭدا مەملەكەتتىك مارتەبەسى ايقىن جازىلسا دا, 30 جىلدان بەرى جىرى بىتپەگەن انا ءتىلىمىز جايىندا ءسوز قاعىستىرىپتى.

شەنەۋنىك انا تىلىنە سۋداي بولسا دا ورىس ءتىلىنىڭ ءوز ويىن جەتكىزۋگە ىڭعايلى ەكەنىن ايتىپ، دەپۋتاتتىڭ بەتىن قايتارىپتى.

قاراپ تۇرساق وتە وكىنىشتى جاعداي. انا ءتىلىنىڭ مارتەبەسىن اسقاقتاتپاق بولعان اقىندى دا، ءوز سالاسى قازاقشالانباعان شەنەۋنىكتى دە ايايسىڭ. بۇدان 20 جىل بۇرىن پارلامەنت تورىندە ەسەبىن ورىسشا سۋدىراتىپ وقي جونەلگەن سول كەزدەگى ەكونوميكا ءمينيسترى قايرات كەلىمبەتەۆكە مارقۇم شەرحان مۇرتازا ايۋداي اقىرىپ: «قازاقتىڭ ەرتە زامانعى ادەبيەت تاريحىن» جازعان نەمات كەلىمبەتوۆتىڭ ۇلىنىڭ انا ءتىلىن بىلمەۋى ۇلكەن ايىپ ەكەنىن»، - بەتىنە تىكە ايتقان ەدى. كىشى كەلىمبەتوۆ سول كۇيى انا تىلىندە ءتىل سىندىرا الماي كەتتى. سول جاعداي اينا قاتەسىز جاڭا قازاقستاننىڭ پارلامەنتىندە قايتالانىپ وتىر. اقىن-دەپۋتاتتىڭ ارەكەتىن كوپشىلىك «حايپ» دەپ باعالاپ وتىر. پارلامەنت تورىندە شەنەۋنىكتەردىڭ رەسەيدىڭ مەملەكەتتىك تىلىندە بايانداما جاساۋىنا شۇيلىگىپ، ۇپاي جينايمىن دەۋدىڭ بوس اۋرەشىلىك ەكەنىن تۇسىنەتىن كەز جەتتى. ونى ۋاقىت ءوزى دالەلدەدى. ءتىل ماسەلەسى بارعان سايىن كۇردەلىلەنىپ بارادى. ونىڭ ءتۇپ تامىرى تەرىستىك كورشىمىزدىڭ ورىس ءتىلىن گەوساياسي مۇددەگە تىقپالاپ، ساياسي قۇرالعا اينالدىرىپ العانىنان ەكەنى انىق.

بۇل كۇندە انا ءتىلىمىزدىڭ مەملەكەتتىك مارتەبە الۋى ءۇشىن كۇرەسكەن شەرحان مۇرتازاداي الىپتار باقيلىق بولدى. مۇحتار شاحانوۆتى قارتتىق جەڭدى. اشىعىن ايتساق، جاريالىق كەزەڭىنەن باستالعان ءتىل ءۇشىن كۇرەس جەڭىلىسپەن اياقتالدى. وعان دالەل قازاقستاننىڭ رەسەيدەگى ەلشىسى داۋرەن اباەۆتىڭ كۇنى كەشە ايتقان «قازاقستاندىقتاردىڭ 90 پايىزى ورىس ءتىلىن سۋداي بىلەدى»دەگەن مالىمدەمەسى.

ول از دەسەڭىز، قازاقستان تاۋەلسىزدىك العان جىلى مەكتەپ بوساعاسىن اتتاعاندار مەملەكەتتىك تىلدە ءبىلىم الىپ، ەلدىڭ ناعىز پاتريوتى بولىپ جەتىلۋى كەرەك ەدى. ءىس جۇزىندە ونداي بولماي شىقتى. وعان دالەل ولجاس بايديلدينوۆ دەگەننىڭ سوڭعى ارانداتۋ ارەكەتى. ول ەش قىمسىنباي: «قازاقستاندا قازاقشا سويلەيتىندەر كوبەيىپ بارادى، وعان رەسەي ارالاسىپ، شارا قولدانۋى كەرەك»، - دەگەن.

مۇمكىن ول: «قازاقشا سويلەيتىندەر كوبەيىپ كەتتى»، - دەپ پارلامەنتتەگى قازىبەك يسا، امانجول التاەۆ، ماقسات تولىقپاي، نارتاي ارالبايلاردى، اقىن رينات زايىتوۆتاردى مەڭزەگەن شىعار. ەگەر پارلامەنت پارتاسىندا وتىرعان دەپۋتاتتار ناعىز انا ءتىلىنىڭ جاناشىرى بولسا، تاۋەلسىز قازاقستاننىڭ وتىز جىلداعى ۇرپاعىنىڭ ورىستانىپ بارا جاتقانىن وتكىر ماسەلە رەتىندە قويىپ، مەملەكەتتىك ءتىلدىڭ قولدانۋ اياسىن كەڭەيتۋدىڭ زاڭدىق تەتىگىن جاساپ، سول ءۇشىن كۇرەسۋى كەرەك ەدى. سوندا تاۋەلسىز ەلدە ولجاستاي ازعىندار شىقپاس ەدى. شەنەۋنىكتەر دە انا تىلىندە بايانداما جاسار ەدى.

Abai.kz