جەتىسۋ وبلىسىندا ءدىنتانۋشىلار مەن ءدىني بىرلەستىكتەر جەتەكشىلەرىنىڭ "رۋحاني كەلىسىم جولى: سەزد يدەياسىن جۇزەگە اسىرۋ" اتتى رەسپۋبليكالىق فورۋمى ءوتتى. فورۋم  مەملەكەتتىك ورگانداردىڭ، ءدىني بىرلەستىكتەردىڭ، عىلىمي قاۋىمداستىق پەن ازاماتتىق سەكتور وكىلدەرىنىڭ باسىن قوستى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

(سۋرەت:https://www.gov.kz/)

تالدىقورعاندا وبلىستىق ءدىن ىستەرى باسقارماسى مەن ءدىن سالاسىنداعى ماسەلەلەردى زەرتتەۋ جانە وڭالتۋ ورتالىعىنىڭ بىرلەسىپ ۇيىمداستىرۋىمەن وتكەن شاراعا وبلىس اكىمىنىڭ ورىنباسارى دياس ەسداۋلەتوۆ قاتىستى.

قۇتتىقتاۋ ءسوز سويلەگەن د. ەسداۋلەتوۆ وبلىس اكىمى اتىنان فورۋم قاتىسۋشىلارىنا بەيبىتشىلىك پەن كەلىسىمدى نىعايتۋعا، بارشاعا ورتاق ادامگەرشىلىك قۇندىلىقتاردى ساقتاۋ مەن ناسيحاتتاۋعا قوسقان ۇلەستەرى ءۇشىن العىس ءبىلدىردى.

– پرەزيدەنت ايتقانداي، ەلىمىزدە ەتنوسارالىق جانە كونفەسسياارالىق كەلىسىمدى نىعايتۋ بويىنشا تولىمدى تاجىريبە جيناقتالعان. «سان الۋاندىقتاعى بىرلىك» دەگەن امبەباپ قاعيدا قازاقستاندىق ەتنيكالىق جانە ءدىني توزىمدىلىك مودەلىنىڭ نەگىزى بولىپ وتىر. قازىرگى ۋاقىتتا قازاقستاندا 100-دەن استام ەتنوس وكىلدەرى تاتۋ-ءتاتتى ءومىر ءسۇرىپ، 18 كونفەسسيانى بىرىكتىرەتىن شامامەن 4000-عا جۋىق ءدىني بىرلەستىك ەركىن قىزمەت اتقارىپ كەلەدى. مۇنداي ەتنيكالىق جانە ءدىني ارالۋاندىق ءبىزدىڭ وبلىس اۋماعىندا دا كورىنىس تاپقان. بۇل – ءبىزدىڭ باعا جەتپەس بايلىعىمىز ءارى ارتىقشىلىعىمىز. فورۋمنىڭ جۇمىسى تابىستى وتەدى دەپ سەنەمىن، ال تالقىلاناتىن يدەيالار مەن ۇسىنىستار قوعامداعى بەيبىتشىلىك پەن تۇراقتىلىقتى نىعايتۋ ىسىندە ماڭىزدى ءرول اتقارادى دەپ ويلايمىن، – دەدى ول.

ءوز كەزەگىندە فورۋمعا قاتىسۋشىلار دا وي-پىكىرلەرىن ءبىلدىردى.

– بارلىق دىندەر مەن كونفەسسيالار وكىلدەرىنىڭ باسىن قوسقان بۇل فورۋمدى اسا ماڭىزدى شارا دەپ ەسەپتەيمىن. كەز كەلگەن وزەن بىرنەشە سالادان قۇرالادى، ولاردىڭ ءبارى تۇپتەپ كەلگەندە ءبىر ۇلكەن مۇحيتقا قۇيادى. سول سياقتى ءبىزدىڭ فورۋم شاعىن بولسا دا، الەمدەگى بەيبىتشىلىكتى نىعايتۋ ىسىنە ءوز ۇلەسىن قوسۋعا باعىتتالعان، – دەدى «ۇشتوبەلىك پرەسۆيتەريان شىركەۋى» جەرگىلىكتى ءدىني بىرلەستىگىنىڭ پاستورى نادەجدا كيم گۆان دجۋن.

وعان تالدىقورعان قالاسى 3-بولىمشەدەگى «تاۋبە» مەشىتىنىڭ رۋحاني جەتەكشىسى راديون يۋ دا قوسىلدى:

– ەڭ الدىمەن ءبىز ورتاق ەڭبەگىمىزدىڭ بىرلەسكەن ناتيجەسىنە جەتۋدى ماقسات ەتەمىز. رۋحاني قۇندىلىقتاردى ۇمىتپاي، ادامي قاسيەتتەردى دامۋعا ۇمتىلعان ءجون. بارشاڭىزعا باقىت، بەيبىت ءومىر، مول يگىلىك تىلەيمىن! – دەدى ول.

سونداي-اق تالدىقورعان رپتس ۆيكارياتتىڭىنىڭ باسقارۋشىسى، تالدىقورعان ەپيسكوپى كلاۆديان دا وسى پىكىردى قۋاتتايدى:

– ءبىزدىڭ فورۋم ءداستۇرلى شاراعا اينالىپ ۇلگەردى، ول جىل سايىن رۋحاني كەلىسىم كۇنىنە ارنالىپ وتكىزىلەدى. ءارتۇرلى كونفەسسيالار مەن ۇلت وكىلدەرى اراسىنداعى رۋحاني كەلىسىم – بۇگىنگى كۇنى وتە وزەكتى، سەبەبى ءبىز كوپۇلتتى مەملەكەتتە ءومىر ءسۇرىپ جاتىرمىز. ءبىز ءبىر-بىرىمىزبەن ارالاسىپ، كەزدەسىپ، ماڭىزدى ماسەلەلەردى بىرلەسىپ شەشىپ، زاماناۋي سىن-قاتەرلەردى ەڭسەرۋىمىز كەرەك. بارشالارىڭىزعا رۋحاني ۇيلەسىم، تىنىشتىق پەن بىرلىك تىلەيمىن! – دەدى ول.

فورۋم اياسىندا قوعامداعى بەيبىتشىلىك پەن كەلىسىمدى ساقتاۋ، رۋحاني قۇندىلىقتاردى ناسيحاتتاۋ ىسىنە ەلەۋلى ۇلەس قوسقان بىرقاتار ازاماتتارعا وبلىس اكىمىنىڭ العىس حاتى تابىس ەتىلدى. سونداي-اق جىل بويى بەلسەندى قىزمەتىمەن كوزگە تۇسكەن ءدىني بىرلەستىك وكىلدەرى دە نازاردان تىس قالعان جوق.

كەزدەسۋ سوڭىندا قاتىسۋشىلار رۋحاني كەلىسىم مەن بەيبىتشىلىكتى ساقتاۋ بارشانىڭ ورتاق بورىشى ەكەنىن اتاپ ءوتىپ، وسى باعىتتاعى بىرلەسكەن جۇمىستى جالعاستىرۋعا دايىن ەكەندىكتەرىن ءبىلدىردى.

Abai.kz