قىتاي بيلىگى 2030 جىلعا دەيىن عارىشكەرلەردىڭ اي بەتىنە قونۋىن قامتاماسىز ەتۋدى ماقسات تۇتىپ وتىر. بۇل باعىتتا ەل اي ميسسياسىنا ارنالعان قاناتقاقتى قارقىندى عىلىمي-زەرتتەۋ جانە سىناق جۇمىستارىن جۇرگىزىپ جاتىر،  دەپ حابارلايدى سينحۋا.

قىتايدىڭ قاناتقاقتى عارىشتىق باعدارلامالار باسقارماسىنىڭ (CMSA) مالىمەتىنشە، الداعى ماڭىزدى سىناقتاردىڭ قاتارىنا «لانيۋە» قونۋ ءمودۋلىنىڭ كەشەندى سىناقتارى، «مەنچجوۋ» عارىش كەمەسىنە ارنالعان جىلۋ جانە اەروديناميكالىق قىسىم سىناقتارى، سونداي-اق «چانچجەن-10» (Long March-10) زىمىرانىنىڭ تومەن بيىكتىكتەگى جانە باقىلاۋ ۇشۋلارى كىرەدى.

«CMSA رەسمي وكىلى چجان تسزينبونىڭ ايتۋىنشا، كەلەسى جىلى وتەتىن قوعامدىق لوگوتيپ بايقاۋى «مەنچجوۋ-1» عارىش كەمەسى ميسسياسىنا جانە قىتايدىڭ عارىش ستانتسياسىنا قاتىستى جوبالارعا ارنالماق. «مەنچجوۋ-1» نەگىزىنەن اي ميسسيالارىنا، سونىمەن قاتار جەر ماڭىنداعى وربيتاداعى عارىش ستانتسياسىنىڭ جۇمىسىنا قولداۋ كورسەتۋگە ارنالعان»، دەپ جازدى سينحۋا.

چجان تسزينبونىڭ مالىمدەۋىنشە، پيلوتتى اي ميسسياسىنا قاتىستى بارلىق جوبالاۋ جانە قۇرىلىس جۇمىستارى بەلگىلەنگەن كەستەگە ساي ءجۇرىپ جاتىر. «چانچجەن-10» زىمىران تاسىعىشى، «مەنچجوۋ» عارىش كەمەسى، «لانيۋە» قونۋ ءمودۋلى، «ۆانيۋي» اي سكافاندرى جانە ايدا جۇرەتىن «تانسو» تەحنيكاسى سياقتى نەگىزگى ۇشۋ جابدىقتارىنىڭ جوبالارى دايىندالعان.

سونداي-اق عىلىمي زەرتتەۋ جانە تاجىريبەلىك قولدانۋعا ارنالعان پايدالى جۇكتەمەلەردىڭ جوبالانۋى اياقتالعان. ال جەردەگى ينفراقۇرىلىم — ۇشىرۋ الاڭى، باقىلاۋ جەلىسى مەن قونۋ الاڭدارىنىڭ قۇرىلىسى جەدەل قارقىنمەن جۇرگىزىلىپ جاتىر.

سينحۋانىڭ حابارلاۋىنشا، بيىل بىرنەشە سىناق ءساتتى ءوتتار وتكەن ەكەن. ال چجان تسزينبو كوپتەگەن جاڭا تەحنولوگيالاردىڭ ءالى دە سىناقتان وتكىزىلىپ، قولدانۋعا جارامدىلىعى تەكسەرىلۋى ءتيىس ەكەنىن اتاپ وتكەن.

Abai.kz