قر پرەزيدەنتى قاسىم-جومارت توقاەۆتىڭ امەريكا قۇراما شتاتتارىنا رەسمي ساپارى اياسىندا ۆاشينگتون قالاسىندا قر عىلىم جانە جوعارى ءبىلىم مينيسترلىگى مەن الەمدەگى جەتەكشى ونلاين-ءبىلىم بەرۋ پلاتفورمالارىنىڭ ءبىرى – Coursera كومپانياسى اراسىندا ءوزارا تۇسىنىستىك تۋرالى مەموراندۋمعا قول قويىلدى. بۇل تۋرالى عىلىم جانە جوعارى ءبىلىم مينيسترلىگى مالىمدەدى.

قۇجاتقا قر عىلىم جانە جوعارى ءبىلىم ءمينيسترى ساياسات نۇربەك پەن Coursera كومپانياسىنىڭ وكىلدەرى قول قويدى. مەموراندۋم اياسىندا اكادەميالىق ىنتىماقتاستىقتىڭ جاڭا فورمالارىن دامىتۋ جانە ءبىلىم بەرۋ ۇدەرىسىنە وزىق تسيفرلىق قۇرالداردى ەنگىزۋ كوزدەلگەن. اتاپ ايتقاندا، ىنتىماقتاستىق جاساندى ينتەللەكت تەحنولوگيالارىن پايدالانۋ ارقىلى پروكتورينگ جانە ءبىلىمدى باعالاۋ جۇيەلەرىن ەنگىزۋدى قامتيدى. بۇل ستۋدەنتتەردىڭ وقۋ جەتىستىكتەرىن باعالاۋدا اشىقتىق پەن وبەكتيۆتىلىكتى ارتتىرۋعا مۇمكىندىك بەرەدى.

ىنتىماقتاستىقتىڭ نەگىزگى باعىتتارىنا قازاقستاندىق ستۋدەنتتەر مەن وقىتۋشىلار ءۇشىن الەمنىڭ جەتەكشى ۋنيۆەرسيتەتتەرىنىڭ ونلاين باعدارلامالارىن دامىتۋ، ءبىلىم الۋشىلار مەن پەداگوگتەردى حالىقارالىق ستاندارتتار بويىنشا سەرتيفيكاتتاۋ، سونداي-اق Coursera شەشىمدەرى نەگىزىندە ۇلتتىق تسيفرلىق ءبىلىم بەرۋ پلاتفورماسىن قۇرۋ كىرەدى.

سەرىكتەستىك ونلاين-ءبىلىم بەرۋ جانە تسيفرلىق ترانسفورماتسيا سالاسىنداعى بىرلەسكەن جوبالار ارقىلى جۇزەگە اسىرىلادى.

كەلىسىمنىڭ ماڭىزى – قازاقستاننىڭ ورتالىق ازياداعى تسيفرلىق ءبىلىم بەرۋ جانە جاساندى ينتەللەكت قۇزىرەتتەرىن دامىتۋ ورتالىعى رەتىندەگى پوزيتسياسىن نىعايتۋىندا. بۇل باستاما ەلىمىزدىڭ جاھاندىق ءبىلىم كەڭىستىگىنە ينتەگراتسيالانۋىنا جانە ۇلتتىق جوعارى ءبىلىم بەرۋ جۇيەسىنىڭ باسەكەگە قابىلەتتىلىگىن ارتتىرۋعا ماڭىزدى قادام بولماق.

مەموراندۋمعا قول قويۋ وقيعانى ەلىمىزدىڭ تسيفرلاندىرۋ، يننوۆاتسيالىق دامۋ جانە حالىقارالىق ىنتىماقتاستىققا اشىقتىق باعىتىنداعى ستراتەگيالىق باعىتىنىڭ جالعاسى رەتىندە باعالاۋعا بولادى.

ايتا كەتەيىك، وتاندىق جوو-لار ChatGPT Edu ءبىلىم بەرۋ پلاتفورماسىنا قوسىلادى.

Abai.kz