قازاقستان رەسپۋبليكاسىنىڭ جاساندى ينتەللەكت جانە تسيفرلىق دامۋ مينيسترلىگى مەن امەريكالىق BETA Technologies كومپانياسى اقپاراتتىق تەحنولوگيالار جانە ەلەكترلىك اۆياتسيا سالاسىنداعى ىنتىماقتاستىقتى دامىتۋعا باعىتتالعان ءوزارا تۇسىنىستىك تۋرالى مەموراندۋمعا قول قويدى.

كەلىسىم پيلوتتىق جوبالاردى ىسكە اسىرۋ جانە ەلەكترلىك ۇشاقتار، وزىق تەحنولوگيالار مەن ينتەللەكتۋالدى كولىك جۇيەلەرى سالاسىنداعى يننوۆاتسيالىق شەشىمدەردى ىلگەرىلەتۋ بويىنشا بىرلەسكەن جۇمىستى كوزدەيدى.

«قازاقستان جاڭا تەحنولوگيالىق باعىتتاردى جۇيەلى تۇردە دامىتىپ، يننوۆاتسيالاردى ەنگىزۋگە قولايلى ورتا قالىپتاستىرۋدا. BETA Technologies كومپانياسىمەن ىنتىماقتاستىق وڭىردەگى كوشباسشىلىعىمىزدى نىعايتىپ، «اقىلدى» جانە ەكولوگيالىق تازا كولىك شەشىمدەرىن دامىتۋ ءۇشىن جاڭا مۇمكىندىكتەر اشاتىنىنا سەنىمدەمىز»، - دەپ اتاپ ءوتتى قازاقستان رەسپۋبليكاسى پرەمەر-ءمينيسترىنىڭ ورىنباسارى، جاساندى ينتەللەكت جانە تسيفرلىق دامۋ ءمينيسترى جاسلان ماديەۆ.

مەموراندۋمعا قول قويۋ ءراسىمى ۆاشينگتوندا، C5+1 بيزنەس-كونفەرەنتسياسىنىڭ اياسىندا ءوتتى. ءىس-شارا ورتالىق ازيا ەلدەرى - اقش اراسىنداعى تەحنولوگيا جانە ورنىقتى دامۋ سالاسىنداعى سەرىكتەستىك ماسەلەلەرىن تالقىلاۋعا باعىتتالعان.

Abai.kz