قازىر قازاق قوعامى ءبىر قىزىق قۇبىلىس بەلەڭ الدى. ەلىمىزدە ينفلياتسيادان باستاپ وڭىرلىك قاۋىپسىزدىككە دەيىنگى ماسەلە حالىقتىڭ تالقىلاۋىنا سۇرانىپ تۇرعاندا كوپشىلىك ءانشى-ارتىستەردىڭ جەكە ءومىرىن بارىنشا ءسوز قىلعاندى ءجون سانايدى. ءبىر ءارىتىستىڭ كۇيەۋىنەن كەتىپ قالعانىن، بىرەۋىنىڭ ايەلى سۇحبات بەرگەنىن، ەندى بىرەۋىنىڭ stories-تە ايتقان ءسوزىن كۇنى بويى تالقىلايتىن بولادىق.

رەيتينگ قۋاتىن سايتتار ازاننان قارا كەشكە دەيىن وسى تاقىرىپتى قوزعاپ، وتقا ماي قۇيا تۇسەدى. وسى قۇبىلىسقا سىرتتان قاراعان ادام قازاق قوعامىنىڭ بارلىق ماسەلەسى شەشىلىپ، ەندى تەك جۇلدىزداردىڭ جەكە ءومىرىن تالقىلاۋ قالدى دەپ ويلاپ قالۋى مۇمكىن.

الەمدە مۇنداي جاعداي بولىپ تۇرادى. ءتىپتى دامىعان اقش-تىڭ وزىندە دە جۇلدىزداردىڭ ءومىرى كەڭىنەن تالقىلاناتىنىن بىلەمىز. ءبىر كەزدەرى امەريكادا كارداشيان اۋلەتىنىڭ جاڭالىقتارى كوپ وقىلدى. كاليفورنياداعى ورمان ورتەنىپ جاتقاندا، سالىقتىق رەفورماعا داۋ ءجۇرىپ جاتقاندا ميلليونداعان ادام ناقتى ساياساتتان گورى اتاقتى وتباسىنىڭ قىدىرعان جەرىن كورىپ، تاماشالايتىن-دى.

بىراق ولاردىڭ وزەكەتى ماسەلەمەن جۇيەلى تۇردە اينالىساتىن بيلىگى، ونىڭ باسقان-تۇرعان قادامىن باقىلايتىن پارتيالىق جۇيەسى بار. دەمەك امەريكاندىقتاردىڭ كارداشيان اۋلەتىنىڭ جەكە ءومىرىن مۇمكىندىگى بولدى.

سول سياقتى ءۇندىستاندا بولليۆۋدتاعى ارىستەردىڭ نەكەلەسۋى مەن اجىراسۋ جاڭالىعى اۋىل شارۋاشىلىعىنداعى داعدارىستان كوبىرەك ترەندكە شىعىپ كەتەتىن كەزدەر بولعان. بىراق مولشەرى مەن شەگى بار. ال بىزدە شوۋ-بيزنەستىڭ جاڭالىعى قوعامدىق-ساياسي كۇن ءتارتىبىن تولىق باسىپ الدى.

قازاق قوعامى بۇگىنگى تاڭدا ەلدىڭ دامۋىنا تىكەلەي اسەر ەتەتىن سالالاردىڭ ءبارىن بيلىككە تاپسىرىپ قويعانداي... ساياسي رەفورما جۇرسە، ونى ماماندار ىستەي بەرەدى، ەكونوميكانى ۇكىمەت رەتتەيدى دەپ ويلايمىز.

ەگەر ءبىز ساياساتتى، ەكونوميكانى، ءبىلىمدى بيلىكتىڭ قولىنا تولىعىمەن بەرسەك، ال ءوزىمىز تەك جۇلدىزدىڭ اجىراسقانىن ءسوز قىلىپ وتىرساق، قوعام قاشان ەسەيەدى؟ بۇعان قوعامنىڭ قىزىعۋشىلىعى قايدا باعىتتالسا، قولىنا قالام ۇستاعان جۋرنالسيتەردىڭ اركەتىن قوسساڭىز، بۇل قۇبىلىستىڭ ەلىمىز ءۇشىن قانشالىقتى قورقىنىشتى ەكەنىن بايقايسىز.

قىزىعى سول، بىزدە اجىراسقان ءانشىنىڭ ۇستىنەن سىن ايتقان ادام ءبىر كۇندە باتىر بولىپ شىعا كەلەدى. ال مەملەكەت بيۋدجەتىنىڭ جۇمسالۋىنا قاتىستى اڭگىمە ايتقان ساراپشىنىڭ ءۇنى ەشقاشان ەستىلمەيدى.

ءيا، قوعامنىڭ پسيحولوگيالىق تۇرعىدان قاراپايىم وقيعاعا جابىلا تالقىلاۋىن تۇسىنۋگە بولادى. ويتكەنى ساياسات پەن ەكونوميكا كۇردەلى، ساندارى كوپ، تەرميندەرى بار. ال جۇلدىزدىڭ داۋى انىق. ايەل ايتتى، ەركەك جاۋاپ بەردى. ال ارى قاراي تالقىلاي بەر. سيۋجەت ۇعىنىقتى. ەڭ قاۋىپتىسى وسى تۇس. كۇردەلى تاقىرىپتى ىسىرىپ تاستاپ، جۇلدىزدىڭ جەكە ءومىرىن جابىلا تالقىلاۋ حالىقتىڭ ويلاۋ قابىلەتىن شەكتەيدى.

كەزىندە لاتىن امەريكاسىنىڭ كەيبىر ەلدەرىندە تەلەنوۆەللا مادەنيەتى جۇرتتىڭ نازارىن ۇزاق ۋاقىت بويى الەۋمەتتىك ادىلەتسىزدىكتەن بۇرىپ اكەتتى. ناتيجەسىندە ەليتا ەكونوميكاسىن ءوز ىڭعايىنا بۇرىپ، حالىق سەريالىن كورىپ وتىردى.

سول سياقتى افريكانىڭ كەيبىر ەلدەرىندە فۋتبول مەن مۋزىكالىق جۇلدىزدار توڭىرەگىندەگى اڭگىمە قازىردىڭ وزىندە سىبايلاس جەمقورلىقتى، جەر داۋىن، ەتنيكالىق تەڭسىزدىكتى ەكىنشى قاتارعا سىرعىتىپ جىبەرۋدەن كەزدەر بولعان. ۇنەمى جەڭىل كونتەنتكە ۇيرەنگەن قوعام كەيىن اۋىر تاقىرىپتى قابىلداي الماي، سورماڭداي كۇيگە تۇسەدى.

نۇرلان جۇماقانوۆ

Abai.kz