قازاقستاندا 330 ميللياردان استام تسيفرلىق تەڭگە اينالىمعا شىقتى. بۇل تسيفرلىق تەڭگەلەر مەملەكەتتىك ساتىپ الۋلار كەزىندە، اۋىل شارۋاشىلىعى سالاسىندا سۋبسيديا بەرۋ بارىسىندا جانە تاعى باسقا بىرقاتار پيلوتىق جوبا اياسىندا قولدانىلعان. تسيفرلىق تەڭگەنى ەنگىزۋدەگى جاڭاشىلدىقتار جايىندا قر ۇلتتىق بانكى اقپارات جانە كوممۋنيكاتسيالار دەپارتامەنتىنىڭ ديرەكتورى اسان احمەتجان “24KZ” تەلەارناسىنداعى ء“تۇيىن” باعدارلاماسىنا بەرگەن سۇحباتىندا ايتتى.

“وسى كۇنگە دەيىن نارىققا، ەكونوميكامىزعا اينالىمعا شىققان تسيفرلىق تەڭگەنىڭ كولەمىن ايتار بولساق، 330 ميللياردان استام تسيفرلىق تەڭگە اينالىمعا شىقتى. تسيفرلىق تەڭگە بۇل - بىرىنشىدەن، مەملەكەت تاراپىنان بولىنەتىن قاراجاتتىڭ ماقساتتى جۇمسالۋىن جۇزەگە اسىرۋعا زور مۇمكىندىكتەر بەرەدى. تاعى ءبىر ارتىقشىلىعى - بىرقاتار قۇقىقبۇزۋشىلىقتاردى، الاياقتىق ارەكەتتەردىڭ الدىن الۋعا مۇمكىندىك بەرەدى”، - دەدى اسان احمەتجان.

باعدارلاما قوناعى تسيفرلىق تەڭگە قولدانىلعان ناقتى جوبالاردى مىسالعا كەلتىردى. دوستىق-مويىنتى تەمىر جولىنىڭ قۇرىلىسى، اقمولا وبلىسىندا ديقاندارعا سۋبسياديا ءبولۋ بارىسىندا تسيفرلىق تەڭگە قولدانىلعان. تسيفرلىق تەڭگەنىڭ باستى ارتىقشىلىعى - ونىڭ قاي ماقساتقا جۇمسالاتىنىن باعدارلامالاۋعا بولادى.

“تسيفرلىق تەڭگەنى باعدارلامالاعان كەزدە، مىسالى، جول قۇرىلىسىنا بولىنگەن قاراجاتتى مەردىگەر كومپانيا وسى جولدى سالۋعا قاجەتتى ماتەريالداردى، قىزمەتتەردى ساتىپ الۋعا، باسقا دا شىعىندارىنا جۇمساي الادى. بىراق، ودان تىس پايدالانۋعا، شەتەلگە اۋدارۋعا مۇمكىندىك بولمايدى. سول سياقتى، ديقانداردىڭ قىزمەتىندە دە. مىسالى ول سۋبسيديا تىڭايتقىش ساتىپ الۋعا ءبولىندى مە، ول اقشانى تەك قانا تىڭايتقىش ساتىپ الۋعا جۇمساي الادى. سۋبسيديانى الىپ وزىنە جاڭا كولىك ساتىپ الا المايدى، پاتەر ساتىپ الا المايدى دەگەن سياقتى مەحانيزمدەرى بار”، - دەدى ۇلتتىق بانك وكىلى.

باعدارلامانىڭ تولىق نۇسقاسى:

https://youtu.be/MAps7nctT7I?si=8yGt2I6hBEmdQlp4

Abai.kz