گۇلۇر ەلدوسقىزى1984 جىلى جەتىسۋ وبلىسى، پانفيلوۆ اۋدانىنىڭ المالى اۋىلىندا دۇنيەگە كەلگەن. بالا كەزىنەن-اق اسكەريلەردىڭ فورماسىنا ەرەكشە قىزىعۋشىلىق تانىتىپ، ءتارتىپ پەن ادىلدىكتى جوعارى قويا بىلەتىن. مەكتەپتە جۇرگەنىندە-اق بولاشاق ماماندىعىن ىشتەي ايقىنداپ، ەلگە قىزمەت ەتۋدى ۇلكەن ارمان قىلىپ وسەدى. سول ارمانىنا ادال بولىپ، زاڭگەر ماماندىعىن مەڭگەرگەن سوڭ، ءومىرىن قۇقىق قورعاۋ سالاسىمەن بايلانىستىردى.

2007 جىلدان بەرى الماتى قالاسى پوليتسيا دەپارتامەنتىنىڭ جەدەل باسقارۋ ورتالىعىندا 102 وپەراتور بولىپ 18 جىل بويى ۇزدىكسىز ەڭبەك ەتۋدە. وسى ۋاقىت ىشىندە ول شامامەن 50 000 قوڭىراۋدى قابىلداپ، 1 200 شۇعىل جاعدايعا جەدەل ارالاستى. بۇل قىزمەت سىرت كوزگە قاراپايىم كورىنگەنىمەن، ەل تىنىشتىعى ءۇشىن ەڭ جاۋاپتى، ءارى ەڭ ماڭىزدى مىندەتتەردىڭ ءبىرى. سەبەبى، تۇرعىنداردىڭ العاشقى جانايقايى، ەڭ وزەكتى شاعىمى نەمەسە شۇعىل جاعدايداعى كومەك سۇراۋى – ءبارى ەڭ الدىمەن وپەراتوردىڭ قۇلاعىنا جەتەدى. ءبىر ساتتىك شەشىم، جەدەل ارەكەت ادام تاعدىرىن، كەيدە تۇتاس ءبىر وتباسىنىڭ اماندىعىن ايقىنداپ جاتادى.

«وقۋشى كەزىمنەن فورما كيگەن ادامدارعا ەرەكشە قۇرمەتپەن قارايتىنمىن. سول ءۇشىن ۆاكانسيا اشىلعانىن ەستىگەندە بىردەن كەلىپ، وسى ورتالىققا قىزمەتكە ورنالاستىم» دەيدى ول. ارمان مەن ماقسات جولىندا جاسالعان وسى قادام ونىڭ ومىرلىك باعىتىنا اينالدى.

ءاربىر كەزەكشىلىك – جاڭا سىناق، ءاربىر قوڭىراۋ – ۇلكەن جاۋاپكەرشىلىك. كەيدە جاي عانا تۇرمىستىق ماسەلەدەن حابارلاسادى، كەيدە قىلمىس پەن توتەنشە وقيعالار تۋرالى دابىل تۇسەدى. مۇنداي ساتتە وپەراتوردىڭ كاسىبيلىگى، ءتوزىمى مەن سابىرلىعى سىنعا تۇسەدى.

گۇلنۇر ەلدوسقىزىنىڭ جادىندا ماڭگى ساقتالعان ەرەكشە كەزەڭ – 2022 جىلعى قاڭتار وقيعاسى. 5 قاڭتار كۇنى كەزەكشىلىككە تۇسكەن ول ەلىمىزدىڭ تاريحىندا اۋىر ءىز قالدىرعان دۇربەلەڭنىڭ تىكەلەي كۋاسى بولدى. كوشەدەگى بەينەباقىلاۋ كامەرالارى ارقىلى بۇكىل قالاداعى احۋالدى كوزبەن كورىپ وتىرعان ورتالىقتاعى ءاربىر ءسات جۇرەككە سالماق سالدى. «بۇل مەنىڭ ەڭبەك جولىمداعى ەڭ اۋىر كەزدەردىڭ ءبىرى بولدى. سەبەبى ءبىز ەكران ارقىلى بارلىعىن كورىپ وتىردىق. قيىندىقتى سىرتتاي باقىلاۋ دا وڭاي ەمەس. بىراق ءبىز ءوز مىندەتىمىزدەن اينىعان جوقپىز» دەيدى ول.

وسىنداي ساتتەردە پوليتسيا قىزمەتكەرىنىڭ جۇرەگىندە تەك حالىق الدىنداعى جاۋاپكەرشىلىك، ەلدىڭ اماندىعى ءۇشىن الاڭداۋشىلىق قانا بولادى. بۇل – ناعىز قىزمەتكە ادالدىقتىڭ بەلگىسى.

بۇگىنگى تاڭدا مەملەكەت تاراپىنان پوليتسيا قىزمەتكەرلەرىنە ۇلكەن قولداۋ كورسەتىلىپ وتىر. جاڭا باعدارلامالار، الەۋمەتتىك قامقورلىق، زاماناۋي تەحنيكالىق جابدىقتالۋ – مۇنىڭ ءبارى ولاردىڭ جۇمىسىن جەڭىلدەتىپ قانا قويماي، قوعام الدىنداعى مىندەتىن ابىرويمەن اتقارۋعا جاعداي جاساۋدا.

گۇلنۇر حانىم جاستارعا قاراپ:

«ەگەر جۇرەگىڭدە ارمان بولسا، ودان قورىقپاي قادام باس. بۇل سالا – تەك باتىلدىق پەن ادالدىقتى تالاپ ەتەدى. ءتارتىپ ساقشىسى بولۋ – ۇلكەن مارتەبە. ويتكەنى قوعام تىنىشتىعى – ءبىزدىڭ ەڭ باستى پارىزىمىز»، – دەپ سەنىممەن ايتادى.

18 جىل بويى ءبىر ورىننان تابان اۋدارماي ەڭبەك ەتۋ – ناعىز تاباندىلىقتىڭ، ەڭبەكقورلىقتىڭ ۇلگىسى. ول – ءوزىنىڭ ادالدىعىمەن ارىپتەستەرىنە ۇلگى، قايسارلىعىمەن كەيىنگى بۋىنعا ونەگە بولىپ وتىر.

قوعام تىنىشتىعىن كۇزەتكەن جانداردىڭ ەڭبەگى – ەلەۋسىز قالماۋى ءتيىس. ويتكەنى ءاربىر بەيبىت تاڭ، ءاربىر تىنىش كەش – وسىنداي ادال قىزمەتكەرلەردىڭ تىنىمسىز ەڭبەگىنىڭ ارقاسى. سول ءۇشىن دە گۇلنۇر ەلدوسقىزى سىندى ءتارتىپ ساقشىلارى – ەلدىڭ ارقا سۇيەر اسىل جاندارى.

Abai.kz